Durante e último 30 añanan, hopi hende tabata pensa ku e situashon na mundu tabata bastante stabil. Asta nan tabata pensa ku situashon di mundu tabata mehorando. Sinembargo, loke ta tumando lugá último tempu a pone hopi hende kambia di opinion.

•   “Israel i Hezbollah ta bringando na frontera di Líbanòn. P’esei, hende a kuminsá preokupá ku e guera na Gaza lo influensiá e otro paisnan den bisindario.”—Reuters, 6 di yanüari 2024.

•   “E partidonan ku ta kolaborá ku Iran ta atakando for di diferente punto stratégiko. Fuera di esei, Iran a kuminsá atrobe ku su programa nuklear. Debí na e desaroyonan ei, Iran ta birando un menasa pa Merka i Merka su aliadonan, spesialmente ku awor Rusia i China ta apoyá Iran.”—The New York Times, 7 di yanüari 2024.

•   “E atakenan di Rusia riba Ukrania ta kousa hopi daño.”—UN News, 11 di yanüari 2024.

•   “China su ekonomia ta sigui krese i su forsa militar ta sigui oumentá. Taiwan ta sinti mas i mas ku nan ke ta independiente. Anto e relashon entre e gobièrnu di Merka i di China ta sigui empeorá. Tur e kosnan ei ta pone ku kualke momento por surgi un krísis entre e paisnan ei.”—The Japan Times, 9 di yanüari 2024.

 Beibel ta papia tokante e situashon instabil ku tin na mundu aworakí? E situashon ei lo hiba na un guera mundial?

 Beibel no a profetisá tokante ningun guera spesífiko ku ta tumando lugá awe. Sinembargo, Beibel a profetisá sí tokante e oumento di guera, ku ta indiká e tempu ku nos ta biba aden i ku ta “kita pas for di riba tera.”—Revelashon 6:4.

 E buki Dánièl a profetisá ku “den e tempu di fin,” vários potensia mundial lo drenta den konflikto ku otro; nan lo lucha pa poder. E bringamentu ei lo enbolbé poder militar grandi, i e paisnan lo gasta nan “tesoronan,” òf rekurso finansiero.—Dánièl 11:40, 42, 43.

 Beibel ta mustra ku situashon na mundu lo bira pió promé ku e bira mihó. Hesus a profetisá ku “lo tin un tribulashon grandi manera no a yega di sosodé nunka, for di prinsipio di mundu te awor.” (Mateo 24:21) E “tribulashon grandi” akí lo kaba den un guera ku yama Armagedon. Armagedon ta ser deskribí komo “e guera ku lo tuma lugá riba e gran dia di Dios, e Todopoderoso.”—Revelashon 16:14, 16.

 Sinembargo, Armagedon lo salba humanidat, no destruyé. Mediante e guera akí, Dios lo trese un fin na tur gobièrnu humano, ku a kousa hopi guera destruktivo. Pa haña sa kon Armagedon lo trese pas pa semper, lesa e siguiente artíkulonan:

•   “Kiko e Guera di Armagedon Ta?”

•   “Armagedon Ta Bon Notisia!”