Loke Nos Por Siña for di Maria Su Ehèmpel

Bo a yega di sintí bo aplastá debí na un prueba òf responsabilidat inesperá? Bo ta kansá òf agotá di e lucha diario pa por kubri bo nesesidatnan básiko? Kisas bo ta entre e miónes di hendenan ku tin miedu i ku ta konfundí pa motibu ku nan mester a bandoná nan pais natal komo refugiado. I kua di nos no a sinti un doló profundo i un bashí despues ku un ser kerí di nos a muri?

BO TABATA sa ku Maria, mama di Hesus, a eksperensiá tur e kosnan ei? Es mas, el a surpasá nan tur ku éksito! Kiko nos por siña for di su ehèmpel?

Sin duda, Maria ta konosí rònt mundu. I esei no ta nada straño pasobra el a hunga un papel úniko den kumplimentu di Dios su propósito. Ademas, miónes i miónes di hende ta venerá Maria. Religion katóliko ta vener’é komo un Mama stimá i komo un ehèmpel di fe, speransa i bondat. Hopi hende a wòrdu siñá ku Maria ta intermediá entre Dios i hende.

Kiko abo ta pensa di e mama di Hesus? I mas importante ainda, kon Dios ta mira Maria?

Un Asignashon Úniko

Maria, e yu muhé di Elí, tabata un israelita di e tribu di Huda. E promé biaha ku Beibel ta menshoná Maria ta relashoná ku un suseso ekstraordinario. Un angel a bishit’é i a bis’é: ‘Saludo, abo ku ta altamente faboresí! Yehova ta ku bo.’ Na promé instante, Maria a keda masha turdí i a kuminsá “pensa kiko e saludo ei por ta nifiká.” P’esei, e angel a bis’é ku Dios a skoh’é pa kumpli ku un asignashon asombroso pero tambe sumamente serio. E mester a konsebí, duna lus na e Yu di Dios i kri’é.—Lukas 1:26-33.

E hende muhé hóben i soltero akí a hañ’é ku un responsabilidat pisá! Kon el a reakshoná? Kisas Maria a puntra su mes ken lo a kere su relato. E embaraso ei lo por a pon’é pèrdè e amor di Hosé, su komprometido, òf ekspon’é na bèrgwensa públiko? (Deuteronomio 22:20-24) Pero e no a duda pa aseptá e asignashon importante akí.

Debí na Maria su fe fuerte, e por a someté su mes na e boluntat di su Dios, Yehova. E tabata konvensí ku Dios lo a perkurá p’e. P’esei el a bisa: ‘Ata e sirbidó di Yehova; laga sosodé ku mi segun bo palabra.’ Maria tabata dispuesto pa enfrentá e situashon difísil ku tabata sper’é, pasobra el a balorá e privilegio akí mediante kua lo e por a duna onor na Dios.—Lukas 1:38.

Ora Maria a bisa Hosé ku e tabata na estado, Hosé kier a terminá nan kompromiso. Esei mester tabata un tempu di masha angustia pa nan dos. Beibel no ta bisa kuantu tempu e situashon difísil akí a dura.  Sinembargo, tantu Maria komo Hosé mester a haña un gran alivio ora e angel di Yehova a aparesé na Hosé. E mensahero di Dios a splika Hosé kon bin Maria tabata na estado di e manera inusual ei i a ordená Hosé pa tuma Maria komo su esposa.—Mateo 1:19-24.

Tempunan Trabahoso

Awendia, hopi hende muhé na estado ta tuma lunanan pa prepará pa e binida di un beibi, i kisas Maria a hasi meskos. E beibi akí lo tabata su promé yu. Sinembargo, susesonan inesperá a trese kambio den su plannan. Cesar Ougusto a saka un dekreto pa tene un senso ku a rekerí pa tur hende registrá nan mes den e stat kaminda nan a nase. Pues, Hosé a sali ku Maria, kende tabata nuebe luna na estado, riba un biahe di mas o ménos 150 km, probablemente riba un buriku! Bètlehèm tabata yen di hende ku a bini pa registrá, i Maria tabatin mester di un lugá privá pa por a duna lus. Pero e úniko sitio disponibel tabata un stal. Pa Maria duna lus den un stal lo mester tabata difísil. Probablemente e tabata sintié inkómodo i tabatin miedu.

Durante e momentonan difísil akí di su bida, siguramente Maria lo a deshogá su mes serka Yehova, ku e konfiansa ku lo el a perkurá p’e i pa e beibi. Poko despues, algun wardadó di karné a bini i nan tabata ansioso pa mira e beibi. Nan a bisa ku angelnan a yama e yu akí “un Salbadó, kende ta Kristu, e Señor.” Despues nos ta lesa: “Maria a warda tur e kosnan akí, i a keda pensa riba nan den su kurason.” Pues, el a meditá riba e palabranan akí i a haña fortalesa for di nan.—Lukas 2:11, 16-19.

Kiko di nos? Probablemente, nos lo eksperensiá kosnan doloroso den bida. Ademas, Beibel ta mustra ku “tempu i suseso imprevisto” por alkansá kualke un di nos, i esei por resultá den tur klase di difikultat i desafionan pa nos. (Eklesiastés 9:11, NW) Si esei sosodé, nos lo bira amargá i kulpa Dios? Lo no ta mihó pa nos imitá e aktitut di Maria i hala mas serka Yehova Dios dor di siña for di su Palabra, Beibel, i meditá riba loke nos a siña? Esei siguramente lo yuda nos perseverá bou di prueba.

Pober i Refugiado

Maria a eksperensiá otro difikultatnan tambe, entre otro, pobresa i el a hañ’é obligá ta bandoná su pais natal. Abo a yega di haña bo ku difikultatnan asina? Segun un informe, “mitar di e poblashon di mundu—kasi tres mil mion hende—ta biba ku ménos di dos dòler pa dia,” i tin miónes mas ku ta lucha pa por kubri nan nesesidatnan básiko ounke nan ta biba den paisnan ku supuestamente ta próspero. Kiko di abo? E trabou duru pa perkurá diariamente pa bo famia tin kuminda, paña i kas sa lagá bo agotá i asta aplastá?

Beibel ta indiká ku Hosé i Maria tabata masha pober. Kon nos por sa esei? Evangelionan di Mateo, Marko, Lukas i Juan ta revelá masha poko detaye di e pareha akí. Pero un di e kosnan ku sí nan a revelá ta ku 40 dia despues ku Maria a duna lus, e i Hosé a bai na e tèmpel pa ofresé e sakrifisio  rekerí, esta, “dos tòrteldùif òf dos pichon.” * (Lukas 2:22-24) Segun e Lei, solamente hende pober ku no por a ofresé un lamchi di karné machu tabata permití pa ofresé e sakrifisio akí. P’esei, probablemente Hosé ku Maria tabatin un lucha pa perkurá pa e nesesidatnan di nan famia. Apesar di esei, nan a logra krea un ambiente amoroso den nan famia. Ta klaru anto, ku asuntunan relashoná ku adorashon di Dios tabatin prioridat den nan bida.—Deuteronomio 6:6, 7.

No muchu tempu despues di Hesus su nasementu, Maria su bida a bolbe kambia kompletamente. Un angel a bisa Hosé p’e hui bai Egipto ku su famia. (Mateo 2:13-15) Esaki tabata e di dos biaha ku Maria mester a bandoná un ambiente ku e tabata konosé bon, pero e biaha akí e mester a bai un pais stranhero. Na Egipto tabatin un grupo grandi di hudiu, pues Maria ku Hosé lo por a biba entre nan mes hendenan. Apesar di esei, bida den un pais stranhero por ta difísil i konfuso. Abo i bo famia ta entre e miónes di hendenan ku mester a bandoná nan pais natal, kisas pa bienestar di nan yunan òf pa skapa di peliger? Si ta asina, bo por komprondé bon kiko ta algun di e difikultatnan ku Maria lo a eksperensiá na Egipto.

Un Esposa i Mama Dediká

Fuera di e relatonan tokante nasementu i kriamentu di Hesus, e Evangelionan ta menshoná Maria masha poko biaha. Pero, nos sa ku Maria ku Hosé tabatin por lo ménos seis yu mas. Kisas esaki ta sorprendé bo. Sinembargo, konsiderá loke e Evangelionan ta bisa.

Hosé tabatin masha rèspèt pa e privilegio ku Maria a haña pa duna lus na e Yu di Dios. P’esei, el a warda te despues ku Hesus a nase pa tene relashon seksual ku Maria. Mateo 1:25 ta bisa ku Hosé “no a tene relashon kuné te ora ku el a duna lus na un yu hòmber.” E ekspreshon “te ora” den e teksto akí ta indiká ku despues ku Hesus a nase, Hosé i Maria a tene relashon seksual manera ta normal entre esposo i esposa. I segun e relatonan di Evangelio, Maria a haña yu ku Hosé, tantu yunan hòmber komo muhé. Santiago, Hosé, Simon i Hudas tabata rumannan di Hesus parti di mama. Maria a haña por lo ménos dos yu muhé. (Mateo 13:55, 56) Sinembargo, e yunan akí sí el a konsebí den e manera usual. *

Maria a balorá su relashon ku Dios. Maske e Lei no a rekerí pa hende muhé asistí na e selebrashon di Pasku Hudiu, Maria tabatin kustumber di kompañá Hosé riba e biahe anual pa bai Yerusalèm pa e fiesta. (Lukas 2:41) Esaki a nifiká ku nan mester a hasi un biahe ida i buèlta di kasi 300 kilometer tur aña—i ku un famia ku tabata kresiendo! Pero e biahenan akí sin duda tabata okashonnan felis pa e famia.

Hopi hende muhé awendia ta imitá e bon ehèmpel di Maria. Nan ta traha duru i na un manera inegoista pa kumpli ku nan obligashonnan bíbliko. Hopi bes e esposanan deboto akí ta mustra pasenshi, perseveransia i humildat. Ora nan reflekshoná riba e aktitut di Maria, esei ta yuda nan mantené asuntunan relashoná ku adorashon di Dios na promé lugá den nan bida en bes di nan deseo pa plaser i bienestar personal. Nan sa, meskos ku Maria sin duda tabata sa, ku ora nan adorá Dios huntu ku nan esposo i yunan, esaki ta fortifiká i uni e famia.

Un biaha, ora Maria ku Hosé tabata regresá kas despues di un selebrashon na  Yerusalèm—probablemente kompañá pa algun yu—nan a realisá ku Hesus, kende tabatin 12 aña di edat, no tabata huntu ku nan. Bo por imaginá e angustia ku Maria a sinti durante e tres dianan ku e tabata buska su yu desesperadamente? Ora e ku Hosé finalmente a haña Hesus den e tèmpel, el a bisa nan: “Boso no tabata sa ku mi mester tabata den e kas di mi Tata?” Atrobe e relato ta bisa ku Maria “tabata warda tur e palabranan akí den su kurason.” Esaki ta un otro indikashon ku Maria tabata balorá mashá e punto di bista di Dios. El a meditá kuidadosamente riba tur loke tabata sosodé relashoná ku Hesus. Hopi aña despues, Maria probablemente a relatá loke el a kòrda bon kla di e suseso akí i di otro susesonan durante Hesus su hubentut na e eskritornan di e Evangelionan.—Lukas 2:41-52.

Perseverá Apesar di Sufrimentu i Pèrdida

Kiko a para di Hosé, Hesus su tata di kriansa? Despues ku Hosé ta ser menshoná brevemente den e insidente durante Hesus su hubentut, e Evangelionan no ta menshon’é mas. Algun hende ta pensa ku esaki ta un indikashon ku Hosé a muri un poko tempu promé ku Hesus a kuminsá ku su ministerio. * En todo kaso, ta parse ku Maria tabata biuda na fin di Hesus su ministerio. Ora ku Hesus tabata bai muri, el a  enkargá apòstel Juan ku kuido di su Mama. (Juan 19:26, 27) Probablemente Hesus lo no a hasi esei si Hosé tabata na bida ainda.

Maria i Hosé a pasa den masha hopi kos huntu. Nan a haña bishita di angel, nan a skapa for di un tirano, a muda vários biaha i a lanta un famia grandi. Kuantu biaha nan lo no a sinta anochi papia tokante Hesus i puntra nan mes kiko lo e tabatin ku enfrentá den futuro? Ademas, nan lo tabata preokupá si nan tabata dun’é e entrenamentu i preparashon korekto. Despues, diripiente Maria a keda su so.

Bo esposo a muri? Ainda bo ta sinti e doló i bashí ku un pèrdida asina ta kousa, asta despues di hopi aña? Nos por tin sigur ku Maria a haña konsuelo debí na su fe i debí ku e tabata sa ku lo tin un resurekshon. * (Juan 5:28, 29) Sinembargo, e pensamentu konsolador ei no a pone un fin na Maria su problemanan. Meskos ku hopi mama soltero awe, e tabatin e trabou duru di perkurá pa su yunan sin e yudansa di un kasá.

Ta rasonabel pa kere ku ta Hesus a bira esun prinsipal ku mester a gana e pan di kada dia pa e famia despues ku Hosé a muri. Segun ku Hesus su rumannan a bira grandi, nan lo por a yuda karga e responsabilidatnan di famia. Ora Hesus “tabatin mas o ménos trinta aña,” el a bandoná kas i a kuminsá ku su ministerio. (Lukas 3:23) Hopi mayor tin sintimentunan miksto ora nan yu hòmber òf muhé adulto bandoná kas. Bo ta hinka asina tantu tempu, esfuerso i sintimentu den kriamentu di yu, ku ora nan bai, bo ta keda ku un bashí. Abo tin yu ku a bandoná kas pa trata di kumpli ku nan metanan? Bo ta sinti bo orguyoso di nan, pero na e mesun momento bo ta deseá tin biaha pa nan tabata mas serka di bo? E ora ei, bo por imaginá bo kon Maria a sinti ora Hesus a bandoná kas.

Pruebanan Inesperá

Un otro prueba ku Maria a pasa aden ta algu ku kisas nunka el a spera. Segun ku Hesus tabata prediká, hopi hende a siguié—pero su rumannan mes no. Beibel ta bisa: “Pasobra ni su rumannan mes no tabata kere den dje.” (Juan 7:5) Probablemente, Maria a konta nan loke e angel a bis’é, esta, ku Hesus ta “Yu di Dios.” (Lukas 1:35) Apesar di esei, pa Santiago, Hosé, Simon i Hudas, Hesus tabata djis nan ruman hòmber mayó. Pues, Maria su famia tabata dividí den sentido religioso.

 Maria a bira desanimá i a stòp di hasi esfuerso pa yuda su yunan kambia nan aktitut? Klaru ku nò! Na un okashon ora Hesus tabata prediká na Galilea, el a drenta un kas pa kome i un multitut di hende a reuní einan pa skuch’é. Ken tabata pafó ta buska Hesus? Maria, su mama, i su ruman hòmbernan. Pues, ora Hesus tabata serka di nan kas, Maria a siguié i evidentemente el a bai ku su otro yunan, kisas ku e deseo ku nan lo kambia nan aktitut pa ku Hesus.—Mateo 12:46, 47.

Kisas bo tambe ta haña bo ku prueba pasobra bo ta hasi esfuerso pa sigui Hesus miéntras ku otro miembronan di bo famia no ke hasi esei. No desanimá ni stòp di yuda nan! Hopi hende, meskos ku Maria, a animá miembronan di nan famia pa años promé ku nan a mira un kambio den nan aktitut. E perseveransia akí ta presioso den Dios su bista, sea ku otro hende reakshoná bon òf nò.—1 Pedro 3:1, 2.

E Prueba di Mas Difísil

Maria su último prueba, registrá den Beibel, sin duda tabata esun ku a kous’é mas angustia mental i emoshonal. El a mira kon su yu stimá a muri den agonia despues ku su mes pueblo a rechas’é. E morto di un yu a ser deskribí komo e “pèrdida di mas grandi,” “e morto di mas devastador,” sea ku e yu ta un mucha ainda òf un adulto. Manera a ser profetisá dékadanan promé ku esei, Maria a sinti un doló profundo komo si fuera un spada a traspasá su kurason.—Lukas 2:34, 35.

Maria a laga e último prueba akí destruyé emoshonalmente òf debilitá su fe den Yehova? Nò. E siguiente biaha ku Beibel ta menshoná Maria, e ta huntu ku Hesus su disipelnan, ‘perseverando den orashon.’ I e no tabata su so. Su otro yu hòmbernan, ku pa e tempu ei a kuminsá ehersé fe den Hesus, tabata huntu kuné. Esei mester tabata un gran konsuelo pa Maria! *—Echonan 1:14.

Komo un hende muhé, esposa i mama fiel, Maria tabatin un bida yen di nifikashon ku a dun’é satisfakshon. E tabatin hopi eksperensia agradabel den su sirbishi na Dios. El a surpasá hopi prueba i difikultat. Ora nos ta konfrontá pruebanan inesperá òf ora nos ta preokupá debí na problemanan den famia, nos siguramente por siña for di Maria su ehèmpel di fiel perseveransia.—Hebreonan 10:36.

[Nota]

[Kuadro/​Plachi na página 6]

Hesus Tabatin Ruman?

  Sí, e tabatin ruman. Algun teólogo a purba di desmentí e bèrdat akí ounke vários biaha e Evangelionan ta revelá esaki bon kla. (Mateo 12:46, 47; 13:54-56; Marko 6:3) Sinembargo, analistanan di Beibel tabatin dos komentario relashoná ku e teorianan ku ta bisa ku Maria no a haña mas yu. Di promé, tin un motibu pakiko hende ta promové e teorianan ei. Esaki ta pa apoyá un doktrina ku hende a bini kuné hopi tempu despues, esta, e siñansa di iglesia ku ta bisa ku Maria a keda bírgen henter su bida. Di dos, e teorianan akí no ta konvinsente ni no ta basá riba bèrdat.

Por ehèmpel, un di e teorianan ei ta bisa ku e personanan ku Beibel ta yama Hesus su “rumannan” tabata su rumannan di kriansa—yunan di Hosé for di un matrimonio anterior. E idea akí no tin base, pasobra e ta kontradisí e echo ku Hesus tin e derecho legal komo e primogénito pa heredá e reinado di David.—2 Samuel 7:12, 13.

Un otro teoria ta bisa ku e rumannan akí en realidat tabata primu di Hesus maske e Skritura Griego ta usa palabranan diferente pa “ruman hòmber,” “primu,” i “famia.” P’esei, e erudito Frank E. Gaebelein ta bisa ku e teorianan teológiko akí ta masha improbabel. E ta konkluí: “Ta mas natural pa komprondé ku e palabra ‘rumannan’ . . . ta referí na yunan di Maria ku Hosé, pues na Hesus su rumannan parti di mama.”

[Kuadro na página 7]

E Tabatin e Kurashi pa Kambia di Religion

  Maria a nase den un famia hudiu i el a sigui e kustumbernan di e religion hudiu. El a asistí na e snoa lokal, e lugá di adorashon hudiu, i el a bishitá e tèmpel na Yerusalèm. Sinembargo, segun ku Maria su konosementu di Dios su propósito tabata oumentá, el a komprondé ku e tradishonnan di su tatanan no tabatin e aprobashon di Dios mas. E lidernan religioso hudiu a laga mata su Yu, e Mesias. Promé ku esei a sosodé, Hesus a deklará na nan: “Mira, boso kas ta keda desolá pa boso!” (Mateo 23:38) Dios a kita su bendishon for di e sistema religioso den kua Maria a lanta.—Galationan 2:15, 16.

Tempu ku e kongregashon kristian a ser formá, Maria por tabatin mas o ménos 50 aña di edat. Kiko lo el a hasi? El a rasoná ku el a nase den e sistema religioso hudiu i ku e mester a keda fiel na e tradishonnan di su antepasadonan? El a bisa ku e tabata muchu bieu pa kambia? Klaru ku nò! Maria a komprondé ku awor Dios tabata bendishoná e kongregashon kristian, p’esei e tabatin e fe i kurashi pa kambia di religion.

[Plachi na página 5]

Nan a hui bai Egipto komo refugiado

[Plachi na página 8]

E eksperensia di mas difísil ku un mama por pasa aden