Pronto—Bon Salú pa Tur Hende!

“E IDEA di no bira malu nunca mas . . . ta na moda e dianan aki,” segun e revista aleman Focus. Sin embargo e idea aki no ta nobo. Ora bida humano a cuminsá, niun ora so no tabata e Creador su intencion pa humanidad ta malu. Su propósito pa humanidad no tabata simplemente “un nivel aceptabel di salú pa tur hende na mundu.” (Letter cursivo ta di nos.) E propósito di nos Creador tabata pa tur hende tin salú perfecto!

Pues di con nos tur ta sufri di malesa i enfermedad? Bijbel ta bisa nos cu Jehova Dios a traha Adam cu Eva, e mayornan di henter humanidad, perfecto. Una bes el a completá su creacion, “Dios a mira tur cos cu el a traha i, mira! e tabata hopi bon.” Nunca e intencion di nos Creador amoroso no tabata pa bida humano ser plagá cu malesa i morto. Pero ora Adam cu Eva a scoge pa bandoná e caminda di bida prescribí pa nan, nan a cai den picá. E resultado di picá adámico tabata morto cu a ser pasá na tur hende.—Génesis 1:31; Romanonan 5:12.

Jehova no a djis bandoná humanidad. Ni e no a bandoná su propósito original pa nan i pa e tera. Den henter Bijbel e ta haci conocí cu su propósito ta pa restorá hende obediente na nan condicion original di bon salú. Tempu cu e Yu di Dios, Jesucristo, tabata riba tera, el a demostrá Dios su poder di cura malesa. Por ehempel, Jesus a cura hende ciegu, cu lepra, surdu, cu waterzucht, cu epilepsia i hende paralítico.—Mateo 4:23, 24; Lucas 5:12, 13; 7:22; 14:1-4; Juan 9:1-7.

Pronto Dios lo instruí su Rey Mesiánico, Jesucristo, pa tuma e asuntunan di humanidad over. Bou di su administracion, e profecia di Isaías lo ser realisá: “Ningun residente lo bisa: ‘Mi ta malu.’ E pueblo cu ta biba den e tera lo ta esnan pordoná pa nan eror.” (Isaías 33:24) Con esaki lo tuma lugá?

Nos ta ripará cu e profeta ta skirbi cu hende lo ser “pordoná pa nan eror.” Pues, lo kita e causa original di enfermedad: humanidad su picá heredá. Con? Lo aplicá e balor di Jesus su sacrificio di rescate na humanidad obediente, i asina eliminá e base di malesa i  morto. Tur skina di tera lo tin condicionnan di paradijs. E apostel cristian Juan a skirbi: “[Dios lo] seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas. E cosnan anterior a pasa bai.” Esaki lo sosodé pronto!—Revelacion 21:3, 4; Mateo, capítulo 24; 2 Timoteo 3:1-5.

Mantené un Balansa

Miéntras tantu, malesa i enfermedad ta e destino di miyones di hende. Pues, ta natural cu hende ta preocupá cu nan salú i cu salú di nan sernan kerí.

Cristiannan awe ta apreciá mashá e esfuersonan dje profesion médico. Nan ta dal pasonan razonabel pa recuperá nan salú of pa keda salú. Sin embargo, e promesa bíblico di un futuro sin malesa ta yuda nos mantené nos balansa relacioná cu esaki. Tanten cu e Rey Mesiánico no tuma asuntunan humano over, salú perfecto no ta posibel. Manera nos a mira, asta e descubrimentunan di mas espectacular no a haci posibel pa medicina yega na e fruta di mas sabroso cu tin den top dje palu: bon salú pa tur hende.

Pronto nos lo logra e meta di “un nivel aceptabel di salú pa tur hende na mundu.” Pero no via Nacionnan Uní ni Organisacion Mundial di Salú ni planeadónan ambiental ni reformadónan social ni dokternan. E logro ei ta reservá pa Jesucristo. Ki un goso lo ta ora humanidad por fin lo ser “librá for di sclabitud na corupcion i lo tin e glorioso libertad dje yunan di Dios”!—Romanonan 8:21.

[Plachinan na página 10]

Lo tin bon salú pa tur hende den Dios su mundu nobo