Nen Marso 2020, sanen indeklara na World Health Organization ya say COVID-19 et sakey lan pandemic, ag-inilaloan na dakel ya kayari masulok ya sakey taon et siansia nin apektado so interon mundo lapud sayan virus. Minilyon ya totoo, kaiba la ray Tasi nen Jehova, so nanairapan ed pisikal, emosyonal, tan pinansyal lapud epekto na pandemic. Panon ya angorganisa tan angiter na tulong iray Tasi nen Jehova legan na sayan krisis?

 Diad panangidaulo na Coordinators’ Committee na Mananguley ya Ulop na Saray Tasi nen Jehova, masulok a 950 ya Disaster Relief Committee (DRC) so binuo ed interon mundo lapud sayay COVID-19. Wala ray inyuksoy dan tulong manlapud saray mismon agagi, tan wala ra met so inkagawa ya akaawat na tulong manlapud gobierno iray Tasi. Nanggawa met iray DRC na angkabaleg iran uksoyan pian makapangiter na tulong.

 Singa bilang, imanoen so agawa ed Paraguay. Imbalita na sakey a dyaryo ya lapud naapektoan na pandemic so ekonomya, “dakdakel ya Paraguayan so naeerasan ta anggapoy magenap ya naakan da.” Balet akapangibunog la so DRC ed Paraguay na saray suplay parad duaran simba—nankarga itan na magenap ya naakan, panaglinis, tan personal iran gamit parad sakey ya pamilya ya apatiray membro. Kada balkot na suplay et manbili na manga $30 (U.S.).

 Panon ya proprotektaan na sarayan mangiiter na tulong so sarili da tan saray arum pian ag-ira naalisan na COVID-19? Mansusulong ira na mask tan pansiasiansiaen day physical distancing. Seseguroen da met ya saray kompanyan pangaalaan day naakan et malinis iray pasilidad da tan istrikto dan tutumboken iray safety precaution. Seseguroen da met ya amin ya mamebemben ed saray suplay ya iiter et mansusulong ira na personal protective equipment, lilinisan tan idi-disinfect da iray luluganan da, tan iiyan da iray suplay ed a-disinfect ya pasen. Tan sampot, saray mangibubunog na suplay et pansiasiansiaen day physical distancing ed saray agagi ya mangawat ed satan.

 Nen Enero 2021, inaprobaan na Coordinators’ Committee so pangusar na masulok ya 25 million dollars (U.S.) ya itulong ed saray apektado na COVID-19. Aasikasoen ya maong na saray branch tan saray DRC so panguusar da ed sarayan indonasyon ya pundo tan mantutulongan ira pian makalmo na mas abeban presyo parad saray kaukolan. Singa bilang diad Chile, labay na saray agagin mangoorganisa na relief work so mangaliw na 750 kilo na lentil. Balet diad loob labat na sakey bulan, adoble so presyo na lentil! Pinmayag iray agagi ya saliwen so lentil diad mas atagey a presyo, pero kayari duay oras impaamta ed sikara na samay managlako ya walay sananey ya kustomer to ya angipawil na inorder ton lentil. Kanian imbes ya say singilen to et amay mas atagey ya presyon nampaknaan da, inlako to ra may impawil ya lentil diad presyo nen imbeneg ya bulan!

 Balet nen alaen la na saray agagi tayo iramay lentil, labay ya babawien na managlako may apantongtongan da, tan aakusaan to ra ya aliwan patas kuno so pangibubunog da na saray naakan ya singa gagawaen na arum ya organisasyon. Kayari na antikey ya makalnan pikakasi, imbaga na sakey ed saray agagi tayo ed samay managlako ya a-survey la so kada kongregasyon pian naamtaan no siopan talaga ray mankaukolan. Impaliwawa met na saray agagi ya saray makaawat na suplay et nandurumay kultura da kanian say karga na kada suplay et imbagay ed no antoy talagan kaukolan na pamilya ya makaawat ed satan. Insan da impaseguro ed samay managlako ya amin ya donasyon ya kuarta tan sagpot ya nanaawat na saray Tasi nen Jehova et boluntaryo. Mandinayew ya maong lapud satan. Kanian pinmayag imay managlako ed samay mas mamuran presyo tan angidonasyon ni ingen na 400 kilo na lentil ed sinmublay ya impangaliw na agagi.

 Si Lusu, sakey ya maedad lan balo ya tagad Liberia, et walay kaamong ton limaran membro na pamilya to. Sakey ya kabuasan, legan iran man-aalmusal tan pantotongtongan day teksto ed satan ya agew, naimano na apo nen Lusu ya mantaon na pitora ya anggapo lay akeran naakan diad abung da. Kuan to: “Anto lay kanen tayo ey?” Pinaseguroan nen Lusu so apo to ya impikasi to lan wala komoy ontulong ed sikara tan imbaga ton matalek ya taryaan ira nen Jehova. Diad satan ya mismon ngarem, tinawagan na saray elder ed kongregasyon si Lusu tan imbaga ran walay awaten ton suplay na naakan tan sarag to lan alaen. Oniay inistorya nen Lusu: “Kuan to may apok ya natan et amta to lan dedengelen tan eebatan nen Jehova iray pikakasi ta inebatan nen Jehova imay pikakasik.”

 Walay sakey ya bii ed Democratic Republic of Congo ya walay kaabay dad abung ya pamilya na saray Tasi. Nen anengneng ton akaawat na naakan iyan pamilya manlapud saray kaagian da, say kuan to: “Kayari na pandemic, magmaliw kami met lan Tasi nen Jehova ta aasikasoen da ray kaagian da legan na sayan mairap ya panaon.” Tinepetan na asawa to: “Akin, magmaliw ka lan Tasi nen Jehova lapu labat ed sakey sakon belas?” Say inyebat to: “Siempre andi, pero aman ya sakey sakon belas et ebidensya na tuan panangaro.”

 Maples ya niiiter na Saray Tasi nen Jehova iray pankaukolan na saray agagi tayo legan na sayan pandemic lapud saray mabulos ya donasyon yo. Salamat ed saray kontribusyon ya iiter yo panamegley na saray paraan ya abitla diad donate.isa4310.com.