“O Jehova, Agayla so Kinaraklan na Saray Gawam!”
Say Karakpan na Palsa nen Jehova
“O Jehova, Agayla so Kinaraklan na Saray Gawam!”
BALANGLAN manaayam itayo diad uma odino diad syudad, diad kapalandeyan odino diad gilig na dayat, sikatayo so apaliberan na makapadinayew a karakpan na palsa. Matukotukoy a say 2004 Calendar of Jehovah’s Witnesses so angiparungtal ed nanduruman litrato na makapakelaw a gawa nen Jehova a Dios.
Saray maapresyan totoo so lawas mangiimano ed saray kimey na Dios. Alimbawa, konsideraen si Solomon, a “tinalonaan [na kakabatan] to so kakabatan na saray amin ya anak ed bukig.” Inkuan na Biblia a: “[Sikato so] nansalita nipaakar ed saray kiew, manlapu ed cedro a wala ed Libano angga ed hisopo ya ontubo ed bakor: sikatoy nansalita met nipaakar ed saray monanakap, tan saray manok ed tagey, tan saray bigis, tan saray sira.” (1 Arari 4:30, 33) Si Arin David, ya ama nen Solomon, so mabetbet a nandalepdep ed saray obra-maestra na Dios. Sikatoy apakiwas ya onkelyaw ed say Nanggawa ed sikato: “O Jehova, agayla so kinaraklan na saray gawam! Dia ed karunongan so nanggawaan mo ed saraya ya amin: say dalin napno na kaykayamanan mo.”—Salmo 104:24. *
Sikatayo so nepeg met a mangimano tan mangusisa ed saray palsa. Singa bilang, nayarian tayon ‘itangay so kamataan tayo’ tan itepet tayon: “Siopa so amalsa ed sarayan bengatla?” Siempre, si Jehova a Dios, a walaan na “daakan a dinamikon biskeg” tan peteg a “mabiskeg ed pakapanyari”!—Isaias 40:26, NW.
Panon a mangapekta ed sikatayo so pandalepdep ed saray pinalsa nen Jehova? Diad taloran paraan. Satan so (1) mangipanonot ed sikatayon pablien so bilay tayo, (2) mamakiwas ed sikatayon tulongan so arum a makaaral ed palsa, tan (3) managdag ed sikatayon kabaten tan apresyaen a nagkalalo so Manamalsa tayo.
Lapud say bilay tayon totoo et lalon atagtagey nen say bilay na ayayep odino ‘monananakap ya andian na panagkatunongan,’ nayarian tayon obserbaan tan pablien iray pakelaw na palsa. (2 Pedro 2:12) Nanengneng na mata tayo so karakpan na kaliberliber. Narengel na layag tayo so balibalin uni na kamanokan. Tan say pakatebek tayo ed panaon tan pasen so makapangipanonot ed sikatayo ed saray makapaliket ya agawgawa ed apalabas. Anggaman ag-ayadyari so bilay tayo natan, seguradon makabkabaliksan so pambilay!
Napanggayagaan na atateng so nisipor lan panlikliket na ananak da ed palsa. Agaylan panliketan na ugugaw so mandokdok na saray baley (shell) diad gilig na dayat, mangomponi na ayep, tan onkalab ed kiew! Kaliktan na atateng a tulongan so ananak da a natebek so pisiglaotan na palsa ed say Manamalsa. Say takot tan respeto a nababayuboan na ugugaw ed impamalsa nen Jehova so nipaslep ed sikara legay bilay da.—Salmo 111:2, 10.
Ataptapew so pakatebek tayo no pandinayewan tayo so palsa balet ta agtayo irayew so Amalsa. Say propesiya nen Isaias so ontulong ed sikatayon mannodnonot ed sayan punto sanen inkuan na satan: “Agmo ta naamtaan? Agmo ta nadngelan? Say ando lan ando a Dios, si Jehova, a Manamalsa ed saray sampot na dalin, ag-onkapuy, tan agmet nakesawan; anggapo so makausisa ed linawa to.”—Isaias 40:28.
On, papaneknekan na saray gawa nen Jehova so atagtagey a kakabatan to, agnaparaan a pakapanyari to, tan say aralem a panangaro to ed sikatayo. Sano nanengneng tayo so alay dakep a kaliberliber tayo tan natebek iray kalidad na samay Nanggawa ed amin na satan, napakiwas itayo komon a mangiyaniweng ed saray imbalikas nen David: “Anggapo a balot so mipara ed sika, O Katawan; anggapo met so mipara ed saray gawam.”—Salmo 86:8.
Makaseguro itayo a saray matulok a totoo so mantultuloy a nasagyat ed saray pinalsa nen Jehova. Diad ando lan ando, sikatayo so lawas makaaral na dakel ni nipaakar ed si Jehova. (Eclesiastes 3:11) Tan diad lalon pakakaaral tayo nipaakar ed Manamalsa tayo, lalon sikato so naaro tayo.
[Paimano ed leksab]
^ par. 4 Nengnengen so 2004 Calendar of Jehovah’s Witnesses, November/December.
[Kahon ed pahina 9]
Panangirayew ed Manamalsa
Bibidbiren na dakel a maapresyan sientista so betang na Dios ed panamalsa. Niraya so pigaran alimbawa:
“Say kaimportantian tan gayaga ed inaral ko a siensia et manlalapud saray matalag a pankanawnawa a siak so makakadiskobre na balon bengatla tan ibabagak ed inkasiak, ‘Ontan manaya so impanggawa na Dios ed satan.’ Kalat kon natalosan so anggan melmelanting a kabiangan na plano na Dios.”—Henry Schaefer, propesor na chemistry.
“No nipaakar ed sengegan na inkiwala na maaw-awang a Uniberso, akauley la so managbasa a mangiter na konklusyon to, balet aliwan nagnap so pakatalos tayo ed satan no Sikato [say Dios] et anggapo.”—Edward Milne, Britanon kosmologo.
“Amta tayo a say palsa et nadeskribe na sankanayarian lan matematika lapud ginawa itan na Dios.”—Alexander Polyakov, Ruso a matematiko.
“Diad panaaral tayo ed palsa, kokonsideraen tayo so kanonotan na Manamalsa, kakabisadoen tayo iray pakatalos to, ipapaliwawa tayo so sistema To ya aliwan sistema tayo.”—Louis Agassiz, Amerikanon biologo.
[Litrato ed pahina 8, 9]
Saray gentoo penguin, Antarctic Peninsula
[Litrato ed pahina 9]
Grand Teton National Park, Wyoming, E.U.A.
[Credit Line]
Jack Hoehn/Index Stock Photography
Ompan Nagustoan Mo Met
VIDEO
Ipapanengneng na Saray Makapakelaw ya Palsa so Gloria na Dios
No nengnengen tayon maong so inkadesinyo na saray palsa ed kaliberliber tayo, natebek tayo ray kualidad na Amalsa tan onapit tayo ed sikato.
SAY PANAG-BANTAYAN
Kasin Nanenengneng Moy Dios ya Agnanengneng?
Aralen no panon ya usaren “iray mata na puso yo.”