“Singger Kayo ed Dios, et Sikato so Onsingger Naani ed Sikayo”

Antis tan Kayari​—Anguma-uman so Bilay To

AGAYLAN makapasinagem tan andiay kabaliksan so nagmaliwan na bilay nen Matsepang! Sikato so ugaw a bii a taga Lesotho, sakey a bansa diad sentro na Abalaten ya Aprika. Si Matsepang so pinabaleg bilang sakey a Katoliko. Balet, imbes a tulongan ya onapit ed Dios, pigay taon a sikatoy inabuso na saray madre a mamapasoksok ed sikato pian nasagyat a mibiang ed imoral iran kagagawa.

Bilang resulta, si Matsepang so adismaya ed relihyon tan agto naawat a walay maaron Manamalsa a peteg a mangiyaansakit ed saray totoon pinalsa to. Lapud sikato so inkaindan tan inabuso, sinagmak nen Matsepang so emosyonal ya ot-ot tan liknaen ton anggapoy kakanaan to a balot. Sikatoy binmaleg a busangel tan agresibo. Saya so nanresulta ed impagmaliw ton kriminal.

Diad kaunoran, si Matsepang so nagmaliw a membro na sakey a pangkat a tatakewan daray totoo diad loob na tren. Sikatoy inaresto tan impriso diad Abalaten ya Aprika. Diad saginonor, sikatoy pinaskar a pinasempet ed binalegan ton bansa, diad Lesotho, a diman et sikatoy siansia nin kriminal, mainum, busangel, tan imoral.

Sanen asabin sikatoy adepres a maong, si Matsepang so desperadon nampikasi a tulongan na Dios. Oniay insipan to: “Dios ko, no natalonaan koy kipapasen ko, gawaen koy anggaay nayarian ko pian panlingkoran ka.”

Ag-abayag, si Matsepang so inasinggeran na saray misionaryo a Tasi nen Jehova. Inyopresi ran sikatoy iyaralan da na Biblia. Diad panaaral to, amoria to ya aliwan agmananginenen tan aliwan agmanangiyansakit so Dios. Diad tua et atebek to ya uusaren nen Satanas, say “ama na tila,” so masilib tan mapalikdo iran taktika pian liknaen na arum ya anggapoy kakanaan da tan pian napanisia ton ag-iran balot naaro nen Jehova.​—Juan 8:44; Efeso 6:11.

Diad kasunian, agaylan makaligliwa ed si Matsepang sanen naaralan to a nayarian tayo so nawalaan na suston panagrespeto ed inkasikatayon dili no magbabawi itayo ed apalabas a kasalanan tayo, onkerew na panamerdona ed Dios, tan panggunaetan a sikato so napaliket! Sikatoy atulongan a makatebek a ‘say Dios so babaleg nen say puso tayo’ tan momoriaen To itayo ed paraan a nayarin duma ed pangipapasen tayo ed inkasikatayo.​—1 Juan 3:19, 20.

Si Matsepang so aliketan ed impakabasa to ed sarayan salita na salmistan David: “Si Jehova asingger ed saray wala ed kipapasen na sakey a nabtagan na puso; tan ilaban to so totoo a wala ed sakey a kamarerwa a masakit ed panagbabawi.” (Salmo 34:18) Bilang sakey ed saray “masakit ed panagbabawi,” amoria to ya ag-ikakaindan nen Jehova iray lingkor to, anggaman arum ed sikara so maer-ermen odino manliknan aliwan makana. Makapagayaga  ed sikaton naamtaan ya iyaansakit na Dios so amin a karnero to tan manusustuni ed sikara diad mairap iran panaon. (Salmo 55:22; 1 Pedro 5:6, 7) Nagkalalo lan atenyeg so liknaan to ed saray balikas a: “Singger kayo ed Dios, et sikato so onsingger naani ed sikayo.”​—Santiago 4:8.

Ag-abayag, say pakayari na Salitay Dios, say Biblia, so napatnagan la ed bilay nen Matsepang. Sikatoy regular lan onaatendi ed saray miting na Kristiano tan intalirak to la iray agmakasulatan ya agamil to. Antoy resulta? Agto la liknaen a sikato so agmakana ed panangaro tan pabor na Dios. Manlapu la nen abautismoan bilang sakey ed saray Tasi nen Jehova, sikatoy akapangusar la na nilibon oras ed ministeryo na Kristiano bilang manangiyabawag na maong a balita na Panarian. Anggaman nalilikna to so emosyonal ya ot-ot lapu ed apalabas, si Matsepang so walaan la natan na maliket tan walaay gagalan bilay. Agaylan pakapatnagan na pakayari na Biblia a paaligwasen so bilay!​—Hebreos 4:12.

[Blurb ed pahina 9]

“Dios ko, no natalonaan koy kipapasen ko, gawaen koy anggaay nayarian ko pian panlingkoran ka”

[Kahon ed pahina 9]

Makatulong Iran Prinsipyo na Biblia

Kabiangan ed saray prinsipyo na Biblia a nanligliwa ed saray biktima na panangabuso et say onggendan:

“Dia ed kinaraklan na saray kanonotan ko ed loob ko saray ligliwam [Dios] pinaliket da so kamarerwak.” (Salmo 94:19) ‘Saray ligliwa’ nen Jehova a naromog ed Salita to so makatambayon maong. Say panmorekdek ed saratan legan a mandadalepdep tan manpipikasi so ontulong pian napakepa so nagogonigon a nonot tan napabiskeg so panagmatalek ed Dios bilang makatalos a Kaaro.

“Sikato [Jehova] paabigen to so saray binmetag ed puso, tan bedberen to so sugasugat da.” (Salmo 147:3) No papablien tayo so panangasi tan say intarya nen Jehova pian nabayaran iray kasalanan tayo panamegley na dondon bagat nen Jesus, matalek itayon makaasingger ed Dios ya agliknaen a nakokondena. Saya so mangitarok na agnaparaan ya inawa tan deen na nonot.

“Anggapo so too a makadago ed siak [Jesu-Kristo], likud no say Ama ya angibaki ed siak sikato so yasingger to; et sikato so paolien ko ed bilay ed kaunoran ya agew.” (Juan 6:44) Diad panamegley na masanton espiritu to tan diad panangipulong ed Panarian, iyaasingger itayo a mismo nen Jehova ed Anak to tan iikdan to itayo na ilalon manbilay ya andi-anggaan.