SI Daniel tan Miriam et nankasal nen Setyembre 2000 tan nanayam irad syudad na Barcelona, Spain. “Awalaan kami na tatawagen dan normal a bilay,” so imbaga nen Daniel. “Lapud trabaho mi, makakapangan kami ed mablin restaurant, makakapanbiahe kamid arum ya bansa, tan makakapansulong kami na mablin kawes. Regular kami met ya makakapibiang ed ministeryo.” Balet walay agawan pananguman.

Diad sakey a kombension nen 2006, asabi so puso nen Daniel ed sakey a paliwawa ya oniay tepet: “Kasin gagawaen tayo so anggaan na nayarian tayo ya tulongan iramay ‘mantugingging a mamapaarap ed panagpateyan’ pian naromog day dalan ya ompugtad bilay?” (Pro. 24:11) Indanet na satan so responsabilidad ya ipaamta so manangisalbay-bilay ya mensahe na Biblia. (Gawa 20:26, 27) Nanonotan ni nen Daniel, “Say pakaliknak et mitotongtong ed siak si Jehova.” Abitla met ed paliwawa ya mas maliket so sakey no palaknaben toy ministeryo to. Amta nen Daniel ya tua itan. Ginmapo lan nampayunir si Miriam tan naeeksperiensya to la iray makapaliket ya bendisyon.

Imbaga nen Daniel ya panaon la pian sikatoy manggawa na baleg ya pananguman. Tan ontan so ginawa to. Binawasan toy oras na trabaho to, nampayunir, tan inisip to so liket ya nalikna da nen Miriam no manlingkor ira ed lugar ya mas baleg so pankaukolan parad saray manangipulong na Panarian.

Nen Mayo 2007, inmekal si Daniel tan Miriam ed trabaho ra tan linma rad Panama, sakey a bansa ya nakar da la nensaman. Say balon teritorya ra et diad pigaran isla ed Bocas del Toro Archipelago diad Dayat na Caribbean. Maslak a manaayam ditan et saray native ya totoon Ngabe. Inisip nen Daniel tan Miriam ya no usaren day atipon da, makapanbayag ira ed Panama na manga waloy bulan.

Manbiabiahe ira ed saray isla panamegley na baloto tan bisikleta, tan agda nalingwanan imay unonan biahe ra ya akabisikleta ira—manga 32 kilometro iman. Dinmalan ira ed nipalandey iran pasen tan mansasnit so petang na agew. Nalmay lawari si Daniel lapud kesaw. Balet, diad saray abung ya walad rota da, maliket iran papatuloyen na saray pamilyan Ngabe, lalo la nen wala lay amta dan pigaran salita da. Ag-abayag, 23 lay ikokondukta dan panangiyaral na Biblia.

Balet nen naupot lay tipon da, asalatan na ermen so liket da. Nanonotan ni nen Daniel: “Akaakis kami tan inisip mi lay ompawil ed Spain. Maer-ermen kami ta taynanan mi la ray iyaaralan mi na Biblia.” Balet kayari sakey bulan, walay naawat dan makapaliket a balita. Imbaga nen Miriam: “Naimbitaan kamin manlingkor bilang espisyal payunir. Malikeliket kami ta makapansiansia kami ed asainmin mi!”

Nen 2015, lapud pananguman ed organisasyon, kinerew ed si Daniel tan Miriam ya manlingkor ira bilang regular payunir. Antoy gawaen da? Nanmatalek ira ed promisa ya walad Salmo 37:5: “Ipiam ed si Jehova so dalan mo; manmatalek kad sikato, tan sikatoy onkiwas parad sika.” Akaromog iray trabaho ya pansuporta ed pampapayunir da, tan natan et manlilingkor ira ed sakey a kongregasyon diad probinsya na Veraguas, Panama.

Imbaga nen Daniel: “Antis kamin onalis ed Spain, agkami segurado no nasarag mi so simplin bilay. Balet ontan so bilay mi natan, tan walad sikami iray talagan kaukolan mi.” Antoy talagan panliliketan da? Imbaga da, “Agnaparaan so liket ya nalilikna mi diad itutulong mi ed mapaabeban totoo ya nakabat si Jehova!”