Diad akaunan artikulo, naamtaan tayo so tanda ya imbaga nen Jesus. Satan a tanda et malinew ya ebidensya ya niletneg la so Panarian na Dios diad tawen tan si Jesu-Kristo so Ari.

Ibabaga na Biblia ya no manuley lay Jesus ed Panarian na Dios, ekalen tod tawen si Satanas tan saray demonyo to. Kanian say sarag da labat ya impluensyaan et saray walad dalin, tan atan so rason no akin ya linmoor so kaugsan manlapu la nen 1914.​—Apocalipsis 12:7, 9.

Anggaman onloloor iray nagagawa ed mundo, tutulongan nen Jesus, say Ari ed Panarian na Dios, iray totoo ed interon dalin. Panamegley na sankamundoan a kimey ya panagbangat ed Biblia ya impasakbay nen Jesus, dakdakel so makakaaral tan mangiyaaplika na saray prinsipyo na Biblia. (Isaias 2:2-4) Naaralan na minilyon no panon ya magmaliw a mas maliket so pamilya da tan agda ipasen ya sankaimportantian ed bilay da so sekular a trabaho odino saray materyal iran bengatla. Nababangatan ira no panon iran nagunggonaan natan tan makapanparaan ya manbilay diad uley na Panarian na Dios.

Anggaman manuuley lay Jesus diad tawen, siansia nin manuuley iray gobierno na too diad dalin. Balet ingganggan na Dios si Jesus: “La ka, manuley ka ed pegley na kakabusol mo.” (Salmo 110:2) Asingger lan deralen nen Jesus so amin ya kalaban tan ikdan toy pakainawaan iramay labay dan unoren so Dios.

Diad satan ya panaon, onkiwas so Panarian na Dios pian:

• Deralen so palson relihyon. Naandi la iray relihyon ya mangibabangat na tila nipaakar ed Dios tan mamapairap ed saray totoo. Inkompara na Biblia so palson relihyon ed sakey ya imoral a bii. Dakel so nabigla ed kaderal to.​—Apocalipsis 17:15, 16.

• Panganggaen so pananguley na too. Onkiwas so Panarian na Dios pian panganggaen so amin ya pananguley na too.​—Apocalipsis 19:15, 17, 18.

• Deralen iray mauges ya totoo. Antoy nagawa ed saramay determinadon manggaway mauges tan agda labay ya unoren so Dios? “Saray mauges et naandi diad dalin.”​—Proverbio 2:22.

• Deralen si Satanas tan saray demonyo. Si Satanas tan saray demonyo to et agda la “napalikdo iray nasyon.”​—Apocalipsis 20:3, 10.

Antoy epekto na sarayan amin ed saramay manpasakop ed Panarian na Dios?

Bilang Ari ed tawen, mas dakel ni nagawaan nen Jesus nen say siopaman ya toon manuley. Walay 144,000 ya kaiba ton manuley ya pinili manlapud limog na saray totoo. (Apocalipsis 5:9, 10; 14:1, 3) Seguroen to ya nagawa so linawa na Dios diad dalin. Antoy gawaen na Panarian na Dios parad saray manayam ed dalin?

• Ekalen na satan so sakit tan patey. “Anggapoy manaayam ditan a mangibagay: ‘Mansasakit ak,’” tan ontan met, “anggapo lay patey.”​—Isaias 33:24; Apocalipsis 21:4.

• Iter na satan so tuan kareenan tan kaligenan. “Magmaliw a daakan so kareenan na saray ananak mo,” tan “onyurong so balang sakey diad silong na ubas to tan diad silong na kiew ton igos, tan anggapoy manaktakot ed sikara.”​—Isaias 54:13; Miqueas 4:4.

• Ikdan na satan iray totoo na makapaliket ya kimey. “Sigpot a panliketan na saray pinilik so kimey na saray lima ra. Ag-ira mansagpot ed andi-kakanaan.”​—Isaias 65:22, 23.

• Resolbien na satan iray problema ed kaliberliber. “Manliket so kalawakan tan say amagaan a dalin, tan manggayaga so patar a desierto tan manrosas a singa safron.”​—Isaias 35:1.

• Ibangat na satan iray totoo pian manbilay ira na andi-anggaan. “Saya so mankabaliksay bilay ya andi-anggaan, a kabaten da ka, say saksakey a tuan Dios, tan samay imbakim, si Jesu-Kristo.”​—Juan 17:3.

Labay na Dios ya iter ed sika iratan ya bendisyon. (Isaias 48:18) Ipaliwawa na onsublay ya artikulo no antoy gawaen mo natan pian nawalaan kay marakdakep ya arapen.