DAKEL SO MANGIBABAGA YA MALIKET KA TAN MAONG SO BILAY MO NO DAKEL SO KAYKAYARIAN O KAYAMANAN MO. Lapud satan, minilyon so mangiyuupot na oras da ed trabaho pian makalmo ray dakel ya kuarta. Balet kasin say kuarta tan kaykayarian so mangiter na permanentin liket? Antoy ipapanengneng na ebidensya?

Ibabaga na Journal of Happiness Studies ya no wala lay naakan, kawes, tan panayaman tayo, agtanton naaruman so liket tayo anggano naaruman so nanaalmo tayon kuarta. Aliwan kuarta so isyu. Say “pananap lan pananap na [kuarta] et sakey a panlalapuan na ermen,” so kuan na artikulo ed magasin ya Monitor on Psychology. Mipara itan ed bilin ya walad Biblia ya insulat manga duan libon taon lay apalabas: “Say panangaro ed kuarta et lamot na amin a makaderal a bengatla, tan diad panggugunaet na arum a peneken iyan panangaro, . . . sinasaksak day sarili ra na dakel a pakasakitan.” (1 Timoteo 6:9, 10) Anto ray nayarin kaiba ed saratan ya pakasakitan?

KAPAGAAN TAN AGPAKAUGIP LAPUD KAUKOLAN YA PROTEKTAAN SO KAYAMANAN. “Masamit so ugip na samay manlilingkor, daiset man odino dakel so kakanen to, balet say dakel a kayarian na toon mayaman et agto pakaugipan.”​—Eclesiastes 5:12.

PAKADISMAYA NO AGNALIKNA SO LIKET YA IILALOAN. Nayarin nadismaya so sakey ta say pampirawat ed kuarta et agbalot napenek. “Say mangaaro ed pilak et agbalot napenek ed pilak, tan say mangaaro ed kayamanan et agbalot napenek ed nanaalmo to.” (Eclesiastes 5:10) Ontan met, no say sakey et labalabay toy nawalaan na kayamanan, nayarin napaulyanan to ray importantin bengatla ya panlapuan na liket, singa say panaon ya nakaiba toy pamilya tan kakaaro to odino say pangiyuna to ed panagdayew tod Dios.

ERMEN TAN SAKIT NA LINAWA NO SAY KUARTA O IMPUONAN ET NAUPOT ODINO ALUGI. “Agmo uupotey biskeg mo ed pananap na kayamanan. Tunda ka la tan ipatnag moy pakatalos. Sano pasikmatan mo itan et anggapoy wadtan, ta seguradon ontubo iray payak to a singa sakey ya agila tan ontikyab.”​—Proverbio 23:4, 5.

INKAKONTENTO. “Anggapon balot so inawit tayo diad mundo, tan anggapon balot so naawit tayo manlapu dia. Kanian, no walay naakan tan kawes tayo, mankontento tayo la ed saratan.” (1 Timoteo 6:7, 8) Maslak ed saray totoo ya kontento et agmareklamo, tan ontulong itan pian ag-ira nainggit ed arum. Tan lapud agda pipirawaten iray bengatlan agda nasaliw, napapaliisan day manpaga tan na-stress.

INKAMAITER. “Mas makapaliket so mangiter nen say mangawat.” (Gawa 20:35) Maliket iray maiter ta nai-enjoy dan paliketen so arum, anggan say niiter da labat et daiset ya panaon tan biskeg da. Tan say mabetbet ya nanaawat da et saray agnasaliw na kuarta​—panangaro, respeto, tan tuan kakaaro ya mabunbunlok ya mangiiter met ed sikara!​—Lucas 6:38.

PANGIYUNA ED TOTOO IMBES YA MATERYAL. “Mas maong ni mangan na pisipising a walay aroan nen say mangan na karne na pinataban baka a walay busolan.” (Proverbio 15:17) Antoy punto na sayan bersikulo? Say maong ya relasyon ed arum et mas mabli nen say materyal a kayamanan. Tan singa nanengneng tayo ed ontumbok iran artikulo, say panangaro et importante ed liket.

Si Sabina, ya taga South America, et naaralan ton importante iray prinsipyo na Biblia. Sikatoy tinaynan na asawa to, kanian nairapan ya mananap na pambilay to tan parad duaran anak ton bibii. Duara so trabaho to tan agew-agew ya ombabangon na alas-4 na palbangon. Anggan ontan so eskedyul to, nandesisyon si Sabina ya manaral na Biblia. Antoy resulta?

Ag-inmasenso so bilay nen Sabina. Pero anguman ya maong so pakanengneng tod bilay! Singa bilang, alikna toy liket lapud napepenek iray espiritual a pankaukolan to. (Mateo 5:3) Awalaan na tuan kakaaro ed saray kapananisiaan to. Tan naeksperiensya toy liket na pangiter diad pangipapaamta tod arum na saray nanaaralan to.

“Say karunongan et napaneknekan a duga ed panamegley na saray resulta na satan.” (Mateo 11:19; paimanod leksab) Kanian say pagmaliw a kontento tan maiter pati say pangiyuna ed totoo nen saray materyal et talagan apaneknekan ya duga!