Antoy Itsura na Diablo?

I-PLAY

Say ebat na Biblia

Say Diablo et agnanengneng ya espiritun persona, kanian anggapo so pisikal ya laman to.—Efeso 6:11, 12.

Say kaslakan ya panideskribe na arum ed Diablo et singa kanding, idodrowing da ni ingen itan ya walaan na saklor, ikol tan sankabembenan toy baleg ya tinidor. Panisiaan na arum ya totoo ya indrowing itan na saray artist ya nambilay manga 1,000 taon lay apalabas, tan naimpluensyaan na saray kustombre tan alamat.

No anto so ibabaga na Biblia nipaakar ed Diablo

Deneskribe na Biblia so Diablo ed nanduruman paraan. Natulongan itayo na saratan pian natalosan no antoy personalidad to, aliwan say itsura to. Singa say:

Mankukunwarin anghel na liwawa. Mankukunwarin pankaabigan so iter to ed saray totoon labay ton impluensyaan ya ontumbok ed saray bangat to imbes ya unoren da so Dios.—2 Corinto 11:14.
Managlem a leon. Aatakien to iray mandadayew ed Dios.—1 Pedro 5:8.
Baleg a dragon. Sikatoy manataktakot, mabiskeg tan talagan manederal.—Apocalipsis 12:9.

Saray bersikulo ed Biblia nipaakar ed Diablo

2 Corinto 11:14: “Si Satanas a mismo et mankunkunwarin sakey ya anghel na liwawa.”

Say labay ya ibaga: Mankukunwarin pankaabigan so iter to ed saray totoon labay ton impluensyaan ya ontumbok ed saray bangat to imbes ya unoren da so Dios.
Efeso 6:11: “Isulong yoy kompleton armas ya inter na Dios pian nalabanan yo iray masilib a pakana na Diablo.”

Say labay ya ibaga: Manguusar na nanduruman taktika so Diablo pian ag-unoren na saray totoo so Dios.
Santiago 4:7: “Manpasakop kayo ed Dios; balet sumpa yo so Diablo, tan ibatikan to kayo.”

Say labay ya ibaga: Sarag ya taloen na too so Diablo diad pangunor ed Dios.
1 Pedro 5:8: “Say Diablo a kabusol yo et siber-siber a singa managlem a leon, a manaanap na buagen to.”

Say labay ya ibaga: Kabusol na Diablo iray ontutulok ed Dios tan labay ton deralen so pikakaaro da ed Sikato.