“Antokaman so gagawaen yo, gawa yo itan ed interon kamarerwa a singa parad si Jehova, tan aliwan parad totoo.”—Colosas 3:23, Balon Mundo a Patalos.

 “Antokaman a gawaen yo, gawa yon mabulbulos, a singa kayo manlilingkor ed Katawan, aliwa labat a diad too.”—Colosas 3:23, Maung a Balita.

 Kaukolan ya mankuli so sakey ya Kristiano ed pantratrabaho to, ta walay koneksion na pangipapasen tod trabaho to tan say panagdayew to ed si Jehova a Dios.

 “Antokaman so gagawaen yo.” Diad amin ya gawaen da, dapat ya tumboken na saramay malabay ya mandayew ed si Jehova so ibabaga na Biblia. Mansasagpot iran magmaliw ya makuli, matua, tan napantiwalaan diad abung, trabaho, tan diad eskuelaan.—Proverbio 11:13; Roma 12:11; Hebreo 13:18.

 “Gawa yo itan ed interon kamarerwa.” Say balikas ya “ed interon kamarerwa” et impatalos manlapud Griegon balikas ya “ontutukoy ed determinasyon na sakey ya too ya gawaen odino sumpalen so panlabayan na Dios diad interon biskeg to.” a

 Kanian say sakey ya komikimey et kaukolan ton usaren so amin ya pakasarag to ed pisikal tan say abilidad ton mannonot sano walay kikimeyan to. Diad arum iran patalos na Biblia ibabalikas met itan bilang “mabulbulos.”—Nengnengen so “ Say Colosas 3:23 ed Arum ya Patalos.”

 “Parad si Jehova, tan aliwan parad totoo.” Seseryosoen na saray Kristiano so antokaman ya gagawaen dan kimey ta amta ran walay epekto na satan ed relasyon da ed si Jehova. Si Jehova so manuna ya labay dan paliketen aliwan saray amo ra odino arum nin too. No makuli tan mamapasya so sakey ya Kristiano ed trabaho to, balibali so pakanengneng na arum ya too ed sikato tan ed Dios ya dadayewen to. Diad satan et gagawaen na sakey a Kristiano so anggaay nayarian to “pian agbalot pansalitaan na mauges so ngaran na Dios.”—1 Timoteo 6:1; Colosas 3:22.

 Say libro na Biblia ya Colosas et insulat nen apostol Pablo parad saray Kristiano nensaman ya manaayam diad syudad na Colosas. b Posiblin insulat to itan antis ya nibulos manlapud samay unonan impakapriso to diad Roma, manga 60-61 C.E.

 Karga na libron Colosas iray bilin ya ontulong ed saray Kristiano pian mankakasakey iran mandayew ed Dios inerman so nanlapuan da tan antokaman so kipapasen dad bilay. (Colosas 3:11) Papasesegen ira na saya ya ipanengneng iray kualidad na Dios ya singa say aro, kamaongan, tan panangasi. (Colosas 3:12-14) Ipapaliwawa met na satan ya say panagdayew ed Dios et nepeg ya walay epekto to ed amin ya aspekto na bilay na sakey a too.—Colosas 3:18–4:1.

 “Dinanman a gawaen yo, gawaen yon mabulos, a singa nipaakar ed Katawan, et aliwan dia ed saray totoo.”—Say Biblia.

 Bantayan iyan antikey ya video pian nawalaan kay ideya ed libro na Colosas.