Wala ray mantratrabahon atateng ya nandesisyon ya iloob iray agni mani-eskuela ya ananak da ed day-care center—sakey itan ya pasilidad ya singa met eskuelaan. Kasin makatulong itan ed anak yo?

•  No antoy nepeg yon itepet

•  No antoy nayari yon gawaen

 No man-day care so anak mi, wala kasi makapuy ya epekto na satan ed relasyon mid sikato? Nayari. Diad saray unonan taon na ugaw, mapmaples ya man-develop so utek to tan walay epekto na satan ed relasyon tod arum. Gawam so anggaay nayarian mon nakaiba so anak mo ed sarayan importantin taon ya mangapekta ed interon bilay to.—Deuteronomio 6:6, 7.

•    No plaplanoen na saray atateng ya iloob ed day care so anak da, nepeg dan isipen no panon dan napansiansia so maapit ya relasyon da ed sikato.

 Kasin onkapuy so impluensya mi ed anak mi no man-day care la? Nayari. “No mas mabetbet ya manuulop iray angkekelag nin ugugaw, mas mainomay dan naimpluensyaan so sakey tan sakey,” so kuan na libron Hold On to Your Kids.

•    No plaplanoen na saray atateng ya iloob ed day care so anak da, nepeg dan isipen no kasin naseguro dan sikara nin siansiay manunan mangimpluensya ed bilay na anak da.

 Kasin makatulong so pan-day care pian niparaan so anak mi ed pan-eskuela to? Wala ray mangibabagan, on. Ibabaga balet na arum ya daiset labat odino anggapoy nagawaan na satan ed abilidad na ugaw ya manaral. Dinan man ed saratan so duga, oniay insulat nen Penelope Leach, sakey a child psychologist: “Agyo basta-basta papanisiaan ya saray naaralan na ugugaw ed eskuelaan so manunan makatulong ed sikara ed bilay da, tan agyo papanisiaan ya mas maong no mas masakbay iran manaral ed eskuelaan. Ta no ontan, ompan nibabaliwala yo iray maabig ya epektod sikato na saray ibabangat yo manlapu lad inkiyanak to.”

•   No plaplanoen na saray atateng ya iloob ed day care so anak da, nepeg dan isipen no kasin makatulong itan tan no kasin talagan kaukolan itan.

 Nayari kasin agmantrabaho so sakey ed sikami pian walay mangasikaso ed anak mi? Wala ray pamilyan parehon mantratrabaho so duaran ateng pian labat napansiansia day magastos ya panagbilay da. Kasin sulit so pansasakripisyo da?

•   No plaplanoen na saray atateng ya iloob ed day care so anak da, nepeg dan isipen no kasin sarag dan bawasan iray gastos da pian walay natilak ed abung ya mangasikaso ed anak da.

 Nepeg yo nin ikonsidera so amin ya maong tan makapuy ya epekto na pan-day care na anak yo antis kayon mandesisyon. No agawaan yo la iratan, panon to no say desisyon yo et iloob yod day care so anak yo?

 Ibabaga na Biblia ya “samay makabat et dadalepdepen toy kada gawaen to.” (Proverbio 14:15) Base ed satan ya prinsipyo, isip yo nin maong antis kayon manpili no anton klase na day care so labay yo parad anak yo.

 Amtaen iray napampilian yo

•   Wala ray atateng ya mas labay dan iyakar so anak da ed day care ya walad abung—ditan et walay sakey odino pigaran manag-asikaso ed melag labat ya grupo na ugugaw.

•   Say arum balet et mangala ray managkomis odino kanayon da ya mangasikaso ed anak da diad abung da.

 Dinan man so napili yo et walay maong tan makapuy ya epekto to. Ompan mas maabig no mantepet kayo ni ed saray atateng ya asali da lay klase na day care ya iisipen yo. Ibabaga na Biblia: “Say karunongan et walad saramay onkekerew na simbawa.”—Proverbio 13:10.

 Panon to no say apili yo et diad day-care center? No ontan . . .

 Amtaen iray nipaakar ed pasilidad ya apili yo

•   Kasin lisensiado odino aka-rehistro itan unong ed kakaukolanen na gobierno? Antoy reputasyon odino ibabaga na totoo nipaakar ed satan?

•   Kasin malinis tan arawid peligro?

•   Anto ray aktibidad ya gawaen na anak yo ditan? a

 Amtaen so nipaakar ed saray manag-asikaso

•   Kasin walay training da? Singa bilang, amta ra kasi man-first aid tan man-CPR?

•   Antoy reputasyon na saray manag-asikaso?

•   Kasin mabetbet iran mansalat na manag-asikaso? No ontan, lanang ya man-adjust so anak yo ed balo iran manag-asikaso.

•   Pigaran ugaw so aasikasoen na kada manag-asikaso? No dakdakel so ugugaw, labay ton ibaga et agda natutukan ya maong so anak yo. Siempre, akadepende ed edad tan kapasidad na anak yo so atension ya kaukolan to.

•   Kasin mainomay ya katongtong iray manag-asikaso nipaakar ed pankaukolan tan situasyon na anak yo?