Manlapud Mayo 10 anggad 19, nansagpot a maong iray Tasi nen Jehova diad Israel ya mibiang ed public witnessing diad Tel Aviv. Inorganisa itan lapud nilibon turista so sinmabi pian onatendi ed nanduruman cultural event ed syudad. Singa bilang, manlapud Mayo 14 anggad 18, diad Tel Aviv so venue na Eurovision Song Contest, sakey ya contest ed musika, ya inatendian na manga samplon libo ya turista.

Oniay imbaga nen Brother Gennadi Korobov, ya tinmulong ed pan-organisa na public witnessing: “Nen naamtaan mi ya nilibo so onsabin turista parad contest diad Tel Aviv, naisip mi ya balibalin pankanawnawa iya pian napalaknab mi so panagpulong mi ed publiko. Malikeliket kami ta 168 ya manangipalapag ya nanlapud 22 a kongregasyon diad interon Israel so namboluntaryo.”

Inagew-agew ya angipasen iray agagi na saray literature display cart ed waloran pasen manlapud alas 9:00 ed kabuasan anggad alas 9:00 ed labi. Saray turista et nanlapud nanduruman bansa kanian saray agagi et angiyan ed cart na saray literatura ed samploran lenguahe: Arabic, Chinese, English, French, German, Hebrew, Italian, Japanese, Russian, tan Spanish.

Matalek tayo ya wala ray maabig ya resulta lapud sayan kaaruman ya panagpulong diad Israel. Sayan impansagpot na agagi et sakey nin ebidensya ya si Jehova et idadayew na saray totoo to “diad amin a panaon.”​—Salmo 34:1, 2.