«Климӕт афтӕ тынг ивы, ӕмӕ тагъд ноджы стырдӕр бӕллӕхтӕ цӕудзӕн: стыр горӕттӕ доны бын фӕуыдзысты, уыдзӕн ӕнахуыр тынг тӕвд, ӕвирхъау тыхдымгӕтӕ, тынг бирӕ рӕтты дон нӕ фаг кӕндзӕн, зайӕгойтӕй ӕмӕ цӕрӕгойтӕй милуангай хуызтӕ фесӕфдзысты. Адӕттӕ нӕхӕдӕг не ’рхъуыды кодтам кӕнӕ хабар барӕй нӕ ныддиссаг кодтам. Ахуыргӕндтӕ куыд зӕгъынц, афтӕмӕй уымӕ ӕркӕндзӕн, абон энергийӕ куыд пайда кӕнӕм, уый» (Иугонд Нациты Организацийы сӕйраг секретарь Антонио Гутерришы раныхасӕй, климӕт куыд ивы, уый иртасӕг ахуыргӕндтӕ 2022 азы 4 апрелы цы доклад скодтой, уый фӕдыл).

 «Ахуыргӕндтӕ фӕдисы хъӕр кӕнынц, зӕгъгӕ, климӕт кӕй ивы, уый тагъд стыр зиан ӕрхӕсдзӕн [Америкӕйы Иугонд Штатты] националон парктӕн се ’ппӕтӕн дӕр, сты 423. Уӕлдай тӕссаг та сын у, климӕт тӕвдӕй-тӕвддӕр кӕй кӕны, уый тыххӕй. Климӕт кӕй ивы, уый цы бӕллӕхтӕ расайдзӕн, уыдон сты, Библийы кӕй кой цӕуы, уыцы бӕллӕхты хуызӕн. Цынӕтӕ цӕуы: зынгсирвӕзтытӕ ӕмӕ донивылдтӕ, ӕнусон цъититӕ тайынц, денджызты дон фылдӕр кӕны ӕмӕ ӕнахуыр тынг тӕвд вӕййы» («Донивылд Йеллоустоны равдыста, цы бӕллӕхтӕ нӕм ӕнхъӕлмӕ кӕсы», «Нью-Йорк таймс», 2022 аз, 15 июнь).

 Цымӕ искуы афтӕ уыдзӕн, ӕмӕ ӕрдз ничиуал чъизи кӕндзӕн? Кӕд о, уӕд уыцы фарста чи аскъуыддзаг кӕндзӕн? Ӕркӕсӕм, Библийы уый тыххӕй цы фыст ис.

 Библийы фыст ис, Хуыцау кӕй фесафдзӕн, «зӕхх чи сафы, уыдоны» (Раргомад 11:18). Ацы стихӕй базонӕн ис ӕртӕ хъуыддаджы:

1.  1. Адӕм зӕхх сафдзысты.

2.  2. Адӕм зӕххӕн зиан ӕнустӕм нӕ хӕсдзысты.

3.  3. Адӕм нӕ, фӕлӕ Хуыцау сараздзӕн афтӕ, цӕмӕй зӕхх мачиуал чъизи кӕна.

 Библийы фыст ис, зӕгъгӕ, «зӕхх... лӕууы ӕнустӕм» (Екклесиаст 1:4). Зӕххыл алкӕддӕр адӕм цӕрдзысты.

•   «Рӕстгӕнджытӕ зӕхх бынӕн райсдзысты ӕмӕ йыл цӕрдзысты ӕнустӕм» (Псалом 37:29).

 Адӕм зӕххӕн цы зиан ӕрхастой, уымӕй фӕд дӕр нал баззайдзӕн.

•   «Ӕдзӕрӕг быдыр ӕмӕ ӕнӕдон бӕстӕ фырцинӕй зардзысты, хус бӕстӕ цин кӕндзӕн ӕмӕ шафранау дидинӕг калдзӕн» (Исай 35:1).