Foa 3
Kɛzi Bɛdi Ngyegyelɛ Nwo Gyima La
“Bɛva bɛ ahonle muala bɛhulo bɛ nwo ngoko ngoko, ɔboalekɛ ɛhulolɛ maa bɛfa ɛtane dɔɔnwo bɛkyɛ.”—1 Pita 4:8
Mekɛ mɔɔ ɛ nee wɔ bokavolɛ ne ɛlɛbɔ ɛbɛla bo la, bɛbayia ngyegyelɛ. Kɛzi bɛdwenle, bɛte nganeɛ nee kɛzi bɛkulo kɛ bɛbɔ bɛ ɛbɛla la bahola ava ngyegyelɛ ara. Anzɛɛ bie a awie mɔ nee edwɛkɛ mɔɔ bɛ nye ɛnla la a bava ngyegyelɛ ne ara a.
Ɔnyɛ se kɛ yɛbabu yɛ nye yɛagua ngyegyelɛ zo, noko Baebolo ne tu yɛ folɛ kɛ yɛli yɛ ngyegyelɛ nwo gyima. (Mateyu 5:23, 24) Baebolo ngyinlazo a baboa wɔ yeamaa wɔali wɔ ngyegyelɛ nwo gyima a.
1 BƐZUZU NGYEGYELƐ NE ANWO
MƆƆ BAEBOLO NE KA LA: Yɛlɛ “mekɛ mɔɔ bɛtendɛ.” (Nolobɔvo ne 3:1, 7) Bɛkpondɛ mekɛ bɛha ngyegyelɛ ne anwo edwɛkɛ. Ka adwenle mɔɔ ɛlɛ ye wɔ nwo nee kɛzi ɛte nganeɛ la kile wɔ bokavolɛ ne. Ka “nɔhalɛ” kile wɔ bokavolɛ ne dahuu. (Ɛfɛsɛsema 4:25) Saa bɔbɔ edwɛkɛ ne yɛ wɔ nyane a, mmamaa ɔyɛ butule. Mualɛ bɛtɛɛ ɛnrɛmaa adwelielilɛ zɛhae ɛnrɛhakyi butule.—Mrɛlɛbulɛ 15:4; 26:20.
Saa ɛ nee wɔ bokavolɛ ne ɛnyɛ adwenle bɔbɔ a, maa wɔ ɛdendɛlɛ ɛyɛ fɛ, maa ɔnwu kɛ ɛkulo ye yɛɛ ɛbu ye. (Kɔlɔsaema 4:6) Bɛli ngyegyelɛ ne anwo gyima ndɛndɛ, bɛmmagyakyi adwelielilɛ.—Ɛfɛsɛsema 4:26.
DUZU A ƐBAHOLA WƆAYƐ A?:
-
Kpondɛ mekɛ kpalɛ bɛva bɛzuzu ngyegyelɛ ne anwo
-
Saa wɔ bokavolɛ ne ɛlɛtendɛ a tie ye, mmapɛ ɔ nloa azo. Wɔ mekɛ badwu
2 TIE NA TE Ɔ BO
MƆƆ BAEBOLO NE KA LA: “Bɛhulo bɛ nwo ngoko . . . na bɛbɔ mɔdenle bɛpele bɛbu bɛ gɔnwo mɔ kpalɛ kpalɛ.” (Wulomuma 12:10) Kɛzi ɛtie edwɛkɛ la anwo hyia. Bɔ mɔdenle kɛ ɛbade wɔ bokavolɛ ne edwɛkɛ bo ɔluakɛ Baebolo ne ka kɛ: “Bɛde bɛ gɔnwo mɔ nyane bo . . . na bɛbɛlɛ bɛ nwo aze.” (1 Pita 3:8; Gyemise 1:19) Mmayɛ kɛ asɛɛ ɛlɛtie. Saa ɔkɛyɛ boɛ a, gyakyi mɔɔ ɛlɛyɛ la na tie ye, anzɛɛ sɛlɛ ye maa bɛha nwolɛ edwɛkɛ amozii. Saa ɛbu wɔ agyalɛ bokavolɛ ne kɛ ɔwɔ wɔ afoa na ɔnle wɔ kpɔvolɛ a, ‘ɛnrɛva ɛya ndɛndɛ.’—Nolobɔvo ne 7:9.
DUZU A ƐBAHOLA WƆAYƐ A?:
-
Saa ɛngulo mɔɔ ɔlɛka la bɔbɔ a, kɔ zo tie ye
-
Tie adwenle mɔɔ wɔ ye edwɛkɛ ne anu la. Yɛ kɛzi ɔfa ye sonlabaka ne nee ɔ ne ɔsi edwɛkɛ zo la nzonlɛ
3 DI NWOLƐ GYIMA
MƆƆ BAEBOLO NE KA LA: “Nvasoɛ wɔ gyimayɛlɛ kɔsɔɔti azo, na ɛdendɛlɛ mgbane maa bɛdi ehyia.” (Mrɛlɛbulɛ 14:23) Saa bɛsi mɔɔ bɛbayɛ la anwo kpɔkɛ bɛwie a, ɔwɔ kɛ bɛdi nwolɛ gyima. Ɔbahyia kɛ ɛbɔ mɔdenle, noko ɛbanyia zolɛ nvasoɛ. (Mrɛlɛbulɛ 10:4) Saa bɛbɔ nu bɛdi nwolɛ gyima a bɛbanyia bɛ gyima ɛsesebɛ ne azo “nvasoɛ.”—Nolobɔvo ne 4:9.
DUZU A ƐBAHOLA WƆAYƐ A?:
-
Bɛzi mɔɔ bɛ nuhua ko biala bayɛ amaa bɛali ngyegyelɛ ne anwo gyima la anwo kpɔkɛ
-
Ɔwɔ nu dedee a, bɛnlea mɔɔ awie biala ɛhola ɛyɛ la
