Mɔɔ limoa, nyia arɛlekyekyelɛ wɔ nɔhalɛ edwɛkɛ ɛhye anu: Nyamenle nwu amaneɛnwunlɛ mɔɔ wɔ ewiade ɛnɛ la, na yebɔ kpɔkɛ kɛ ɔbayɛ nwolɛ debie. (Edwɛndolɛ 72:13, 14) Wɔ ye Edwɛkɛ, Baebolo ne anu, Nyamenle ɛbɔ ɛwɔkɛ kɛ ɔbaye “nyane mɔɔ bɛlɛnwu ye la bɛ kɔme zo.” Kenlenzu ɔ? “Ɔbayɛ ɛhye wɔ mekɛ mɔɔ Awulae Gyisɛse vi anwuma, ɔ nee ye soanvolɛma mɔɔ lɛ tumi la . . . kɛra kɛ ɔbadua bɛdabɛ mɔɔ bɛnze Nyamenle, nee bɛdabɛ mɔɔ bɛnli Edwɛkpa ne mɔɔ fane yɛ Awulae Gyisɛse anwo la azo la kakɛ la.” (2 Tɛsalonaekama 1:7, 8) Gyisɛse bayɛ ɛhye wɔ kenle bie mɔɔ Baebolo ne fɛlɛ ye “Nyamenle Bedevinli ne Kenle kpole ne” mɔɔ eza bɛfɛlɛ ye Amagɛdɔn la anu.—Yekile 16:14, 16.

Wɔ konle ɛhye anu, tɛ dasanli na emomu Nyamenle bamaa ɔ Ra, Gyisɛse Kelaese nee sunsum abɔdeɛ mɔɔ lɛ tumi la aho atia amumuyɛma. Anwuma ɛlɔnema bava nzisi kɔsɔɔti ara awieleɛ.—Ayezaya 11:4; Yekile 19:11-16.

Badwu ɛnɛ, kɛzi Nyamenle bu konle la ɛtɛkakyile. Ɔtɛbu konle kɛ ɔle adenle kpalɛ mɔɔ ɔdua zo ɔye nzisi nee amumuyɛyɛlɛ ɔfi ɛkɛ a. Noko ɔle nɔhalɛ kɛ ɔvi tete ne amuala Nyamenle angomekye a lɛ adenle si mekɛ mɔɔ ɔwɔ kɛ bɛko nee awie mɔɔ baho bie la anwo kpɔkɛ a. Kɛ mɔɔ yɛnwu ye la, Nyamenle ɛzi kpɔkɛ kɛ ɔbamaa ɔ Ra, Gyisɛse Kelaese a aho alie bɛdabɛ mɔɔ bɛlɛsisi bɛ la na yeaye  amumuyɛma yeavi ɛkɛ a. Ɛhye kile kɛ Nyamenle ɛnlie konle mɔɔ bɛko ye wɔ azɛlɛ ye azo ɛnɛ la ɛndo nu, ɔnva nwo kɛzi ɔde ye biala la.

Ndonwo bie ɛne: Fa ye kɛ ngakula nwiɔ mɔɔ bɛ ze ɛdu adenle la ɛlɛko. Bɛgyakyi konle ne na bɛfɛlɛ bɛ papa wɔ fonu zo. Bɛ nuhua ko ka kɛ ko ne a vale konle ne rale a, yɛɛ ko noko ka kɛ ɔlɛyɛ ye asa. Biala fa ye edwɛkɛ to ɔ ze anyunlu, mɔɔ bɛ nye la kɛ ɔbaha bie yeamaa bɛ. Noko akee, selɛ ne tie bɛ wie a, ɔse bɛ kɛ bɛmmako bieko na bɛhendɛ ye saa ɔba sua nu a ɔbaziezie bɛ avinli edwɛkɛ. Ngakula ne mɔ kendɛ mekɛ ekyii. Noko yeangyɛ eza bɛko. Mekɛ mɔɔ selɛ ne rale sua nu la, ɔ nye anlie bɛ nwo na ɔdeanle bɛ kɛ bɛandie ye la.

Ɛnɛ, maanle mɔɔ bɛko la sɛlɛ Nyamenle kɛ ɔboa bɛ. Noko Nyamenle ɛngyi konle mɔɔ bɛko ye ɛnɛ la anzi. Emomu ye Edwɛkɛ Baebolo ne ka ye wienyi kɛ: “Saa awie yɛ bɛ ɛtane a, bɛmmadi ye nzenralɛ” na “Bɛmmafa ɛtane bɛtua ɛtane kakɛ ɛlɛ.” (Wulomuma 12:17, 19) Bieko, yemaa yela ali kɛ ɔwɔ kɛ alesama si “abotane kendɛ ye” maa ɔyɛ nwolɛ bie, ɔbayɛ ɛhye wɔ Amagɛdɔn. (Edwɛndolɛ 37:7) Saa maanle maanle ne mɔ angendɛ Nyamenle na bɛko a, ɔbu bɛ kɛ bɛmbu ye na ɔ nye ɛnlie bɛ konle ne anwo. Yemɔti Nyamenle bala ye ɛya ne ali wɔ Amagɛdɔn na yeaziezie maanle maanle ne mɔ avinli edwɛkɛ bɔkɔɔ yeamaa ‘bɛagyakyi konle wɔ azɛlɛ ye amuala azo.’ (Edwɛndolɛ 46:9; Ayezaya 34:2) Nɔhalɛ nu, Amagɛdɔn konle ne a badu konle kɔsɔɔti abo a.

Nyamenle Belemgbunlililɛ ne anu nyilalɛ ne ko a le kɛ ɔbaye konle yeavi ɛkɛ. Gyisɛse hanle arane zɔhane anwo edwɛkɛ wɔ asɔneyɛlɛ ɛhye mɔɔ bɛze ye kpalɛ la anu: “Wɔ belemgbunlililɛ ɛrɛla; Bɛyɛ Wɔ ɛhulolɛdeɛ wɔ azɛlɛ ye azo, Kɛmɔ bɛyɛ ye wɔ anwuma lɔ la.” (Mateyu 6:10) Nyamenle Belemgbunlililɛ ne baye konle kɔsɔɔti nee amumuyɛyɛlɛ mɔɔ fa konle ba la avi ɛkɛ. * (Edwɛndolɛ 37:9, 10, 14, 15) Ɔnyɛ nwanwane kɛ Gyisɛse ɛdoavolɛma anye la nyilalɛ mɔɔ Nyamenle Belemgbunlililɛ ne bava ara la ade a.—2 Pita 3:13.

Noko, mekɛ tendenle nyɛ a ɔwɔ kɛ yɛfa yɛkendɛ Nyamenle Belemgbunlililɛ ne yɛmaa ɔye amaneɛnwunlɛ, nzisi nee amumuyɛyɛlɛ ɔfi ɛkɛ a? Baebolo ngapezo mɔɔ ɛra nu la di daselɛ kɛ yɛwɔ ewiade ɛhye “awieleɛ mekɛ” nu. (2 Temɔte 3:1-5) * Ɔnrɛhyɛ, Nyamenle Belemgbunlililɛ ne balua Amagɛdɔn konle ne azo aye awieleɛ mekɛ ɛhye avi ɛkɛ.

Kɛ mɔɔ yɛlimoa yɛnwu ye la, bɛdabɛ mɔɔ bɛbawu wɔ konle ɛhye mɔɔ li awieleɛ anu la a le bɛdabɛ mɔɔ “bɛnli Edwɛkpa ne mɔɔ fane yɛ Awulae Gyisɛse anwo la azo la.” (2 Tɛsalonaekama 1:8) Noko kakye kɛ Nyamenle anye ɛnlie awie biala mɔɔ ɛtanevolɛma boka nwo la ewule nwo. (Yizikeɛle 33:11) Ɔluakɛ “ɔngulo kɛ bɛsɛkye awie biala” wɔ konle ɛhye mɔɔ li awieleɛ anu la ati, kɛkala ɔlɛmaa bɛabɔ edwɛkpa ne mɔɔ fale yɛ Awulae Gyisɛse anwo la “nolo wɔ aleɛabo amuala, amaa yeayɛ daselɛlilɛ yeamaa aleɛabo amra” kolaa na awieleɛ ne ara. (2 Pita 3:8, 9; Mateyu 24:14; 1 Temɔte 2:3, 4) Ɛhɛe, ɔlua edwɛkɛhanlɛ gyima ne mɔɔ Gyihova Alasevolɛ ne mɔ ɛlɛyɛ ye ewiade amuala la azo, yemaa menli ɛnyia adenle ɛnɛ kɛ bɛbanwu Nyamenle, bɛadie edwɛkpa ne mɔɔ fale Gyisɛse anwo na bɛadɛnla aze bɛanwu mekɛ mɔɔ konle ɛnle ɛkɛ ne bieko la.