Bɛwole me wɔ kpalɛ bie mɔɔ menli lɛ ezukoa ekyi wɔ zo wɔ Bilbao, mɔɔ wɔ Spain sɔlɔ la azo. Yɛle ngakula nna na medame a metɔ zolɛ nwiɔ a. Ɛnee yɛ abusua ne kulo Katɔlek asɔne ne kpalɛ, na ɛnee dahuu mekɔ Mass. Menyianle ɛvolɛ 23 la, menyɛle kilehilevolɛ—ɛnee ɔle gyima mɔɔ mekulo na menyɛle ye ɛvolɛ 40. Mengilele ninyɛne ngakyile, ɔyɛ me fɛ kɛ ɛnee mekile debie wɔ Katɔlek asɔne ne anu la, ɛnee ɔdwu nɔsolɛ a mekilehile ngakula mraalɛ memaa bɛdie kominio mɔɔ lumua la.

Mengɔle agyalɛ ɛvolɛ 12 mɔɔ yɛ anyelielɛ la anzi, menyɛle kunlavolɛ na ɛnee ɔwɔ kɛ menea ngakula mraalɛ nna. Ɛnee meli ɛvolɛ 33 ala! Membɔle mɔdenle kɛ memaa me Katɔlek diedi ne akyekye me rɛle, noko ɛnee kpuyia dɔɔnwo gyegye me. Membizale kɛ: ‘Saa Kelaese ɛwu ɛlie yɛ ngoane a, duzu ati a alesama tɛwu a? Saa sonlakpalɛ kɔ anwuma a, duzu ati a yɛsɛlɛ kɛ Nyamenle Belemgbunlililɛ ne ɛrɛla a?’ Mɔɔ hyia kpalɛ la, membizale kɛ: ‘Saa yɛwu a Nyamenle bua yɛ ndɛne a, duzu ati ɔwɔ kɛ nzinlii yɛfi anwuma, ɛleka mɔɔ bɛte ɛtanevolɛma anwo anzɛɛ hell na yɛba yɛmaa bɛbua yɛ ndɛne bieko a?’

Membizale ɛsɔfoma bie kpuyia ɛhye mɔ. Bɛ nuhua ko buale kɛ: “Menze. Biza ɛsɔfo kpanyinli ne. Ɔle debie mɔɔ nwolɛ hyia ɔ? Ɛdie Nyamenle ɛdi, ɔnle zɔ ɔ? Mmadwenle nwolɛ!” Noko menyɛle kɛ mekpondɛ nwolɛ mualɛ ne. Nzinlii, mendiele ɛsɔfoma mɔɔ kilehile Gyisɛse anwo debie, bɛkɔ Pɛntekɔso yɛɛ menli mɔɔ die ninyɛne ngakyile di la ngilehilelɛ ne bie. Noko biala ambua me kpuyia ne mɔ kpalɛ.

Mekɛ mɔɔ ɛnee mebo ɛvolɛ 60 la, sukulu kakula ekyi mɔɔ ɛli ɛvolɛ nsuu la dole ɛsalɛ vɛlɛle me kɛ membɛla Gyihova Alasevolɛ debiezukoalɛ ne bie. Me nye liele mɔɔ menwunle ye nee mɔɔ mendele la anwo, noko ɔluakɛ menlɛ alagye la ati, meamkpondɛ Alasevolɛ ne mɔ abo zo bieko. Ɛvolɛ nwiɔ anzi, Alasevolɛ agyalɛma mɔɔ bɛfɛlɛ bɛ Juan nee Maite la bɔle me anlenkɛ ne anu. Wɔ siane nsa anu ɛnee mebiza bɛ kpuyia dɔɔnwo na bɛye ɔ nloa, na awieleɛ bɔkɔɔ ne ɔhakyile Baebolo ɛzukoalɛ.

Nea kɛzi ɛnee me nye la debiezukoalɛ ko biala ade la! Menyɛle debie biala anwo neɛnleanu kpalɛ, menvale Baebolo ngakyile  nsa meneanle kɛ mɔɔ Gyihova Alasevolɛ kilehile la amgba le nɔhalɛ a. Yeangyɛ, menwunle kɛ asɔne ɛmaa meyɛ basaa wɔ ɛvolɛ dɔɔnwo anu. Ngakyile kpole mɔɔ wɔ me diedi dɛba ne nee mɔɔ melɛsukoa wɔ Baebolo ne anu la gyegyele me. Me nwo bubule me, ɔle kɛ asɛɛ me diedi ne le baka kpole bie mɔɔ bɛlɛtu ɔ bo la.

Akee me hu mɔɔ tɔ zo nwiɔ la anwo dole ye kpole na ɔwule. Zɔhane mekɛ ne ala, mengyakyile gyima na menvile Bilbao wɔ mekɛ bie anu. Juan nee Maite noko vile ɛkɛ. Ɔyɛ me nyane kɛ, mengyakyile Baebolo ɛzukoalɛ ne. Noko akee, wɔ me ahonle nu, ɛnee meze kɛ menyia agudeɛ bie. Me rɛle anvi ye ɛlɛ.

Ɛvolɛ kɛyɛ 20 anzi, mɔɔ ɛnee menyia ɛvolɛ 82 la, Juan nee Maite ziale rale Bilbao na bɛrakpɔlale me. Nea kɛzi me nye liele kɛ menwunle bɛ bieko a! Menwunle kɛ Gyihova arɛle ɛtɛfile me, na mendoale me debiezukoalɛ ne azo. Ɛnee Juan nee Maite lɛ me nwo abotane kpalɛ, ɔluakɛ ɛnee meta mebiza edwɛkɛ ko ne ala fane dɔɔnwo. Ɛnee ɔhyia kɛ mebiza Baebolo nu edwɛkɛ fane dɔɔnwo amaa meahola meaye kɛzi mete nganeɛ wɔ me diedi dɛba ne anwo la meavi ɛkɛ. Ɛnee eza mekulo kɛ menwu debie kpalɛ amaa meahola meahilehile Baebolo ne anu nɔhalɛ ne meahile me gɔnwo mɔ nee me abusua ne.

Kenle mɔɔ bɛzɔnenle me—mɔɔ ɛnee meli ɛvolɛ 87 la—le mekɛ mɔɔ me nye liele kpalɛ wɔ me ɛbɛlabɔlɛ nu a. Bɛzɔnenle me wɔ Gyihova Alasevolɛ nyianu bie mɔɔ bɛyɛle la abo. Keleseɛne kpanyinli bie luale Baebolo ne azo manle ɛdendɛlɛ mɔɔ fane yɛdayɛ mɔɔ bɛbazɔne yɛ la anwo titile. Ɛdendɛlɛ ne manle menzunle. Mendiele ye kɛ asɛɛ Gyihova ɛlɛtendɛ ahile me la. Bɛzɔnenle me bɛwiele la, Alasevolɛ dɔɔnwo rale me nwo ɛkɛ na bɛyɛle me mo—ɔnva nwo kɛ ɛnee bɛ nuhua dɔɔnwo ɛnze me la!

Ɛnee dahuu meze kɛ Gyisɛse Kelaese a le “adenle ne” a. (Dwɔn 14:6) Noko me Baebolo ɛzukoalɛ ne boale me manle menwunle Gyihova, ahenle mɔɔ yɛdua Gyisɛse anwo zo yɛnwu ye la. Kɛkala, mekola mesɛlɛ Nyamenle kɛ me kulovolɛ Selɛ nee me Gɔnwo. Draw Close to Jehovah * buluku ne mɔɔ mengengale la a boale me kpalɛ a. Mengengale ɔ muala wɔ nɔsolɛ kokye anu! Gyihova anwunvɔnezelɛ ne mɔɔ menzukoale la hanle me ahonle.

Saa menea mekɛ tendenle mɔɔ meva mekpondɛ ɛzonlenlɛ nu nɔhalɛ ne a, ɔmaa medwenle mɔɔ Gyisɛse hanle la anwo kɛ: “Bɛbiza na bɛ sa kɛha ye; bɛkpondɛ na bɛkɛnwu ye; bɛbɔ nu na bɛkɛbuke bɛ.” (Mateyu 7:7) Kɛkala mɔɔ menyia mualɛ ne mɔɔ ɛnee melɛkpondɛ la, me nye die kpole kɛ mebaha nwolɛ edwɛkɛ meahile awie mɔ.

Menyia ɛvolɛ 90 ɛdeɛ, noko mete nganeɛ kɛ metɛnyinle wɔ sunsum nu. Debiezukoalɛ biala mɔɔ mebahɔ wɔ Belemgbunlililɛ Asalo ɛkɛ la le mekɛ titile maa me—ɔlua ndelebɛbo mɔɔ sonle bolɛ mɔɔ menyia yɛɛ me mediema mrenya nee mraalɛ mɔɔ me nee bɛ yia nu la. Me nye la kɛ mebayɛ kilehilevolɛ bieko wɔ Paladaese azɛlɛ ne mɔɔ bɛbɔ nwolɛ ɛwɔkɛ la azo. (Yekile 21:3, 4) Me nye la titile kɛ mebanwu kɛ bɛdwazo me alɔvolɛ mɔɔ bɛwu la bɛra ngoane nu na meanyia adenle meahilehile bɛ Baebolo ne anu nɔhalɛ ne. (Gyima ne 24:15) Nea kɛzi me nye la kɛ mebaha kɛzi Gyihova manle me ahyɛlɛdeɛ mɔɔ sonle bolɛ wɔ me mgbanyinli nu meahile bɛ la! ▪