NWANE a adwenledwenle ɛtɛtole ye na ɔtɛtele nganeɛ kɛ ɔwɔ kɛ ɔkpondɛ awie moalɛ a? Yɛbanlea adwenledwenle ne anwo na bie a yɛakpondɛ agɔnwolɛ mɔɔ bade ɔ bo na yeyia zɔhane ngyegyelɛ ne bie la. Anwunvɔnezelɛ nee anwubielɛ bamaa agɔnwolɛ zɔhane ayɛ mɔɔ fɛta kpalɛ.

Bie mɔ te nganeɛ zɔhane ala wɔ asɔneyɛlɛ nwo. Kɛ anrɛɛ bɛkɛhɔ Nyamenle mɔɔ bɛte nganeɛ kɛ ɔle bedevinli na ɔ nwo yɛ ɛzulolɛ ɛkɛ la, bɛ nye die nwo kɛ bɛbahɔ anwodelɛnli bie ɛkɛ. Bɛsuzu kɛ kɛmɔ anwodelɛma ne ɛva sɔnea nee ngyegyelɛ mɔɔ to alesama anu la ati, bɛbaze bɛ anwunvɔne. Kɛ neazo la, menli mɔɔ bɛminli debie mɔɔ hyia bɛ kpalɛ la kulo kɛ bɛkɔ “Anwodelɛnli” Anthony mɔɔ vi Padua—mɔɔ nea ninyɛne mɔɔ kɛminli azo la ɛkɛ. Saa bɛlɛyɛ asɔne bɛamaa nane mɔɔ ɛnde kpɔkɛ la a, bie a bɛkɔ “Anwodelɛnli” Francis mɔɔ vi Assisi la ɛkɛ anzɛɛ saa bɛ anyelazo ɛwie a bɛkɔ “Anwodelɛnli” Jude Thaddeus ɛkɛ.

Noko, kɛ ɔkɛyɛ na yɛanwu kɛ ɔfɛta kɛ yɛsɛlɛ anwodelɛma kɛmɔ Ngɛlɛlera ne kile la ɛ? Kɛmɔ yɛ asɔneyɛlɛ ne le edwɛkɛ mɔɔ yɛka yɛkile Nyamenle la ati, yɛkulo kɛ yɛnwu kɛ: Asoo ɔtie yɛ asɔneyɛlɛ? Na asoo ɔnle kɛ yɛbiza noko kɛ: Kɛzi Nyamenle te nganeɛ wɔ anwodelɛma mɔɔ bɛsɛlɛ bɛ la anwo ɛ?

Anwodelɛma mɔɔ bɛsɛlɛ bɛ la gyi Katɔlek Asɔne ne ngilehilelɛ mɔɔ kile kɛ anwodelɛma di awie mɔ edwɛkɛ maa bɛ la azo. Adwenle titile mɔɔ gyi zo a le kɛ “awie mɔɔ Nyamenle die ye to nu kɛ ɔkola ɔkpa awie ati kyɛlɛ la bazɛlɛ anwunvɔnezelɛ amaa ye wɔ mekɛ mɔɔ ɔkɛhyia la,” kɛmɔ New Catholic Encyclopedia kile la. Ɛhye ati, awie mɔɔ bazɛlɛ anwodelɛma la lɛ anyelazo kɛ ɔbalua menli ɛhye mɔ mɔɔ Nyamenle ɛyila bɛ la anwo zo yeanyia ɛlolɛ titile bie.

Asoo Baebolo ne kilehile debie zɛhae? Bie mɔ ka kɛ ɛzoanvolɛ Pɔɔlo hɛlɛle debie mɔɔ bɛkola bɛgyinla zo bɛsɛlɛ anwodelɛma la wɔ ye edwɛkɛ ne anu. Kɛ neazo la, ɔhɛlɛle Keleseɛnema mɔɔ wɔ Wulomu la kɛ: “Mediema, mesɛlɛ bɛ, ɔlua yɛ Awulae Gyisɛse Kelaese ati, ɔ nee ɛhulolɛ ne mɔɔ le Sunsum Nwuanzanwuanza ahyɛlɛdeɛ ne la ati, bɛboa me wɔ me gyima ye ɛyɛlɛ nu na bɛzɛlɛ Nyamenle bɛmaa me.” (Wulomuma 15:30) Asoo ɛnee Pɔɔlo ɛlɛka ahile ɔ gɔnwo mɔ Keleseɛnema kɛ bɛzɛlɛ ɛlolɛ titile bie wɔ Nyamenle ɛkɛ bɛmaa ye? Kyɛkyɛ. Saa debie zɔhane a, anrɛɛ bɛbaha bɛahile Pɔɔlo, mɔɔ le Kelaese ɛzoanvolɛ la kɛ ɔzɛlɛ ɔmaa bɛ. Ɛnee Pɔɔlo ɛlɛkile kɛ yɛkola yɛka yɛkile yɛ gɔnwo mɔ Keleseɛnema kɛ bɛzɛlɛ Nyamenle bɛmaa yɛ. Noko kɛ yɛsɛlɛ awie mɔɔ yɛdie  yɛdi kɛ ɔwɔ anwuma la kɛ ɔva nzɛlɛlɛ ɔdo Nyamenle anyunlu la le edwɛkɛ ngakyile kolaa. Kɛmɔti ɛ?

Gyisɛse hanle ye wɔ ɛzoanvolɛ Dwɔn Edwɛkpa ne anu kɛ: “Mame a mele adenle ne, nɔhalɛ ne, nee ngoane ne a; awie biala ɛnrɛhola Selɛ ne ɛkɛ ne kɔ kyesɛ ɔdua me nwo zo.” (Dwɔn 14:6) Eza ɔhanle kɛ: “Selɛ ne bava debie biala mɔɔ bɛkɛbiza ye wɔ me duma nu la amaa bɛ.” (Dwɔn 15:16, The New Jerusalem Bible) Gyisɛse anga kɛ yɛva yɛ asɔneyɛlɛ ne yɛmaa ye na ɔbaha nwolɛ edwɛkɛ yɛahile Nyamenle yeamaa yɛ. Emomu, saa bɛbadie yɛ asɔneyɛlɛ ne a ɔwɔ kɛ yɛdua Gyisɛse anwo zo yɛfa yɛto Nyamenle anyunlu na tɛ awie gyɛne biala.

Mekɛ mɔɔ Gyisɛse ɛdoavolɛma hanle hilele ye kɛ ɔhile bɛ kɛzi bɛyɛ asɔne la, Gyisɛse buale kɛ: “Saa bɛyɛ nzɛlɛlɛ a bɛha ɛhye, ‘Egya, Wɔ duma ne anwo ɛde.’” (Luku 11:2) Yemɔti, mekɛ biala “saa” yɛyɛ asɔne a, ɔwɔ kɛ yɛdua Gyisɛse anwo zo yɛka yɛkile Nyamenle, na tɛ awie gyɛne biala. Kɛmɔ Gyisɛse ngilehilelɛ ɛhye anu la ɛkɛ wienyi la ati, asoo yɛnrɛhola yɛnrɛha kɛ ɔwɔ kɛ yɛdua Gyisɛse Kelaese anwo zo yɛsɛlɛ Nyamenle na tɛ awie gyɛne anzɛɛ “anwodelɛma”?

Asɔneyɛlɛ le yɛ ɛzonlenlɛ ne foa mɔɔ hyia, na saa yɛanzonle Nyamenle na yɛsonle awie gyɛne a ɔda ali kɛ ɔtia Baebolo ngilehilelɛ. (Dwɔn 4:23, 24; Yekile 19:9, 10) Ɛhye ati a Nyamenle ala a ɔwɔ kɛ yɛfa yɛ asɔneyɛlɛ yɛto ɔ nyunlu la.

Wɔ Gyisɛse Boka Zo Edwɛkɛhanlɛ ne anu, ɔhanle kakula bie mɔɔ zɛlɛle ye papa kɛ ɔmaa ye debie ɔli la anwo edwɛkɛ. Asoo selɛ bie bava bolɛ ahakyi paano amaa ɔ ra? Anzɛɛ ɔbiza ye fɛlɛ a ɔbamaa ye ɛwɔlɛ? (Mateyu 7:9, 10) Awovolɛ mɔɔ lɛ ɛlɔlɛ la ɛnrɛyɛ ɛhye!

Suzu neazo ko ne ala mɔɔ awovolɛ bie hanle la anwo nea. Fa ye kɛ ɛ ra ɛbiza wɔ debie mɔɔ ɔhyia nwolɛ la. Wɔva ye wɔyɛ ɛ gɔnwo kpalɛ, yɛɛ dahuu ɔba ɛ nwo. Noko akee, kɛmɔ ɔsulo kɛ ɛbava ɛya la ati, yeha yehile awie kɛ ɔha ɔhile wɔ. Kɛzi ɛbade nganeɛ ɛ? Na fa ye kɛ akee sonla ɛhye ala a ɔdua ɔ nwo zo ɔ nee wɔ tendɛ a yɛɛ debie biala kile kɛ ɔbahɔ zo yeayɛ zɔ ɛ? Ɛ nye balie nwolɛ ɔ? Kyɛkyɛ! Awovolɛ mɔɔ lɛ ɛlɔlɛ la kulo kɛ bɛ mra ba bɛ nwo na bɛbiza bɛ debie mɔɔ bɛhyia la.

Mekɛ mɔɔ Gyisɛse ɛlɛkilehile kakula ne mɔɔ ɛlɛsɛlɛ aleɛ ne anwo edwɛkɛ ne anu la, ɔhanle ɔhilele menli ne kɛ: “Na saa bɛmɛ mɔɔ bɛle ɛtanevolɛma la bɛze kɛ ɔwɔ kɛ bɛfa ninyɛne kpalɛ bɛmaa bɛ mra a, ɛnee fane nyɛ yɛɛ bɛ Ze mɔɔ wɔ anwuma la ɛnrɛva ninyɛne kpalɛ ɛnrɛmaa bɛdabɛ mɔɔ bɛbiza ye la ɛ?” (Mateyu 7:11) Ɔda ali kɛ awovolɛ lɛ ɛhulolɛ kpole kɛ bɛbava debie kpalɛ bɛamaa bɛ mra. Ɛhulolɛ mɔɔ yɛ anwuma Selɛ ne lɛ kɛ ɔbadie yɛ asɔneyɛlɛ na yeabua la le kpole tɛla zɔ.

Nyamenle kulo kɛ yɛfa yɛ asɔneyɛlɛ yɛto ɔ nyunlu saa yɛ sinlidɔlɛ bɔbɔ ɛyɛ adesoa ɛmaa yɛ a. Ɔmmaa awie mɔ ɛndie yɛ asɔneyɛlɛ. Baebolo ne ka kile yɛ kɛ: “Fa wɔ adesoa ne maa [Gyihova], na ɔbazɔ wɔ nu.” (Edwɛndolɛ 55:22) Kɛ anrɛɛ yɛbava yɛ nwo yɛado anwodelɛma anzɛɛ awie gyɛne anwo zo kɛ ɔbaha yɛ edwɛkɛ yeamaa yɛ la, ɔle kpalɛ kɛ yɛbanyia Gyihova Nyamenle anwo adwenle mɔɔ fɛta la.

Yɛ anwuma Selɛ ne dwenle yɛ nuhua ko biala anwo. Ɔkulo kɛ ɔboa yɛ wɔ yɛ ngyegyelɛ nwo na ɔlɛka yɛahile yɛ kɛ yɛbikye ye. (Gyemise 4:8) Nea kɛzi yɛ nye die kɛ yɛnyia adenle yɛbikye yɛ Nyamenle mɔɔ le yɛ Selɛ ‘Nzɛlɛlɛ Tievolɛ la’!—Edwɛndolɛ 65:2.