1. Duzu ati a ɔwɔ kɛ anwumalɛne kavolɛ neɛnlea ninyɛne bie mɔ kolaa na yeadu ɛ?

BƐDABƐ mɔɔ bɛka anwumalɛne la lɛ adehilelɛ kɛlata mɔɔ ninyɛne 30 wɔ zo mɔɔ bɛdumua bɛneɛnlea kolaa na bɛadu a. Saa anwumalɛne kavolɛ ne andɔ ɔ rɛle aze aneɛnlea ninyɛne ɛhye mɔ kpalɛ na ɔtu a, esiane bahola azi. Asoo ɛze anwumalɛne kavolɛ mɔɔ ɔwɔ kɛ ɔneɛnlea adehilelɛ kɛlata ne anu mekɛ biala la? Yemɔ a le anwumalɛne kavolɛ mɔɔ lɛ anwubielɛ kpalɛ la! Ɔnyɛ se kɛ anwumalɛne kavolɛ mɔɔ ɛyɛ gyima ne ɛhyɛ la babu ɔ nye agua neɛnleanu ɛhye mɔɔ ɔwɔ kɛ ɔyɛ kolaa na yeadu ɔ bo la azo.

2. Neɛnleanu boni a ɔwɔ kɛ Keleseɛnema yɛ a?

² Kɛmɔ anwumalɛne kavolɛ kpalɛ biala yɛ la, ɔwɔ kɛ yɛdayɛ noko yɛneɛnlea ninyɛne bie amaa yɛ diedi ne anu amia, bɔbɔ wɔ ngyegyelɛ mekɛ nu. Saa yɛzɔnenle la ɔtɛkyɛle anzɛɛ yɛva ɛvolɛ dɔɔnwo yɛzonle Nyamenle bɔbɔ a, ɔwɔ kɛ ɔvi mekɛ mɔɔ kɔ mekɛ la yɛneɛnlea yɛ diedi ne nee yɛ nwo mɔɔ yɛdu yɛmaa Gyihova Nyamenle la anu. Saa yɛanyɛ ye zɔ a, ɛbɛlabɔlɛ nu ngyegyelɛ bie bahola azɛkye yɛ sunsum nu gyinlabelɛ. Baebolo ne bɔ yɛ kɔkɔ kɛ: “Bɛmaa mɔɔ dwenle kɛ ɔgyi boɛ la ɛnlea boɛ na yeandɔ aze.”—1 Kɔl. 10:12.

3. Duzu a ɛnee ɔhyia kɛ Keleseɛnema mɔɔ bɛwɔ Galeehyea la yɛ a?

³ Ɛnee ɔwɔ kɛ Keleseɛnema mɔ bɛwɔ Galeehyea la nea bɛ diedi ne boɛ na bɛmaa bɛ nye sɔ bɛ sunsum nu fanwodi ne. Ɛnee Gyisɛse ɛlua ye afɔlebɔlɛ ne azo ɛbuke nwolɛ adenle kɛnlɛma ɛmaa bɛdabɛ mɔɔ bɛdie ye bɛdi la amaa bɛanwu Nyamenle na bɛahola bɛayɛ Nyamenle amra! (Gal. 4:9) Saa Galeehyeama ne nee Nyamenle bahɔ zo ayɛ agɔnwolɛ a, ɛnee ɔwɔ kɛ bɛtwe bɛ nwo bɛfi Dwuuma mɔɔ kilehile  kɛ ɔwɔ kɛ bɛdi Mosisi Mɛla ne azo la anwo. Ɛnee Nyamenle ɛnva Mɛla ne ɛnli gyima bieko, yɛɛ Mɛla ne ɛnkyekye menli mɔɔ bɛnle Dwuuma mɔɔ bɛwɔ asafo ne anu la! Ɛnee ɔwɔ kɛ Dwuuma nee menli mɔɔ ɛnle Dwuuma mɔɔ bɛwɔ asafo ne anu la nyi wɔ sunsum nu. Na bɛte ɔ bo kɛ Nyamenle ɛngyinla Mosisi Mɛla ne azo ɛmbu awie tenlenenli bieko.

4, 5. Folɛ boni a Pɔɔlo dule Galeehyeama a, na kɛmɔti a nwolɛ hyia yɛdayɛ noko ɛ?

⁴ Ɛzoanvolɛ Pɔɔlo dule Keleseɛnema mɔɔ bɛwɔ Galeehyea la folɛ kɛ bɛmmamaa bɛ rɛle fi Baebolo nu nɔhalɛ ne mɔɔ bɛzukoa la ɛlɛ. Ɔnle kɛ yɛsia yɛkɔ ninyɛne mɔɔ yɛgyakyi bɛ yɛ nzi la anwo. Kɛlata ne mɔɔ bɛhɛlɛle bɛmanle Galeehyeama la baboa yɛ kɔsɔɔti yeamaa yɛali nɔhalɛ dahuu.

⁵ Nwolɛ hyia kpalɛ kɛ yɛ kɔsɔɔti yɛkakye mekɛ mɔɔ yɛzile kpɔkɛ kɛ yɛbazonle Gyihova la. Suzu kpuyia nwiɔ ɛhye anwo: Asoo ɛkakye ninyɛne mɔɔ ɛyɛle na wɔafɛta wɔamaa ɛzɔnenlɛ la? Ɛkakye kɛ ɔyɛle mɔɔ ɛnwunle Nyamenle nee kɛzi ɛdele nganeɛ wɔ mekɛ mɔɔ ɔnwunle wɔ la ɔ?

6. Ninyɛne mɔɔ bɛgyinla zo bɛyɛ neɛnleanu la boni a yɛbazuzu nwo a?

⁶ Ninyɛne ngɔnla bie wɔ ɛkɛ mɔɔ yɛyɛle wɔ mekɛ mɔɔ yɛnwunle nɔhalɛ ne la. Bɛhile ninyɛne ɛhye mɔ wɔ ɛlɛka ne mɔɔ se  “Ninyɛne Mɔɔ Maa Awie Fɛta Ɛzɔnenlɛ Na Ɔkɔ Zo Ɔnyi La” anu. Yɛbahola yɛagyinla ninyɛne ɛhye mɔ azo yɛanleɛnlea yɛ nwo nu amaa yɛ diedi ayɛ se na yɛanzia yɛangɔ ewiade ne anu. Kɛmɔ anwumalɛne kavolɛ neɛnlea ninyɛne bie mɔ kolaa na yeadu ɔ bo la, zɔhane ala a ɔwɔ kɛ yɛdayɛ noko yɛneɛnlea yɛ nwo nu dahuu a.

7. Ndonwo boni a ɔwɔ kɛ yɛdi ɔ nzi a, na duzu ati ɔ?

⁷ Ninyɛne mɔɔ anwumalɛne kavolɛ neɛnlea kolaa na yeadu ɔ bo la maa ɔnwu mɔɔ ɔwɔ kɛ ɔyɛ la. Yɛdayɛ noko yɛbahola yɛanleɛnlea ninyɛne mɔɔ yɛyɛ anzɛɛ yɛ nwo nu ɔvi yɛ ɛzɔnenlɛ ne anzi. Pɔɔlo hɛlɛle Temɔte kɛ: “Sɔ nɔhalɛ ne mɔɔ ɛdele ɛvile me ɛkɛ ne la anu boɛ, fa yɛ ndonwo di zo, na tɛnla diedi nee ɛhulolɛ ne mɔɔ Kelaese Gyisɛse ati ɔle yɛ ɛdeɛ la anu.” (2 Tem. 1:13) “Nɔhalɛ ne” wɔ Nyamenle Edwɛkɛ ne anu. (1 Tem. 6:3) Kɛmɔ debie nvoninli kola maa yɛnwu kɛzi deɛ ne de la, zɔhane ala a ‘nɔhalɛ ne anwo ndonwo ne’ maa yɛnwu ninyɛne mɔɔ Gyihova kpondɛ avi yɛ ɛkɛ la kɔsɔɔti a. Akee yɛbazuzu ninyɛne mɔɔ yɛyɛle kolaa na bɛazɔne yɛ la anwo yɛanlea saa yɛlɛdi nɔhalɛ ne anwo ndonwo ne anzi pɛpɛɛpɛ a.

8, 9. (a) Duzu ati a ɔwɔ kɛ yɛkɔ zɔ yɛnyi wɔ ndelebɛbo nee diedi nu ɛ? (b) Maa neazo fa kile nvasoɛ mɔɔ wɔ sunsum nu ɛnyinlɛ zo nee deɛmɔti ɔwɔ kɛ yɛyɛ ye dahuu la anu.

⁸ Mɔɔ lumua la a le ndelebɛbo mɔɔ yɛnyiale la. Akee yɛnyiale diedi. Noko ɔwɔ kɛ yɛkɔ zo yɛnyi wɔ ninyɛne nwiɔ ɛhye mɔ anu. (2 Tɛs. 1:3) Nzenzaleɛ ba debie mɔɔ ɛlɛnyi la anu ngyikyi ngyikyi. Saa debie “ɛlɛnyi” a ɔyɛ kpole, ɔtɛlɛ. Ɛhye ati, saa bɛsɔne yɛ a ɔwɔ kɛ yɛkɔ zo yɛnyi wɔ sunsum nu, ɔnle kɛ yɛtɛnla yɛ bo zo ne ala.

⁹ Yɛbahola yɛava ɛhye yɛado kɛzi baka nyi la anwo. Baka bahola anyi ayɛ kpole kpalɛ, titile saa ye ndinli ne yɛ se a. Kɛ neazo la, Lɛbanɔn sida mbaka bie mɔ kola yɛ tendenle kɛ ɛbolɔnsam mɔɔ ɔde zo 12 la. Ɔkola ɔyɛ kpole kpalɛ mɔɔ kyesɛ nyɛma mɔɔ ye tendenle le mita 12 la na ahola abɛnra ye ayia. (Sɔl. 5:15) Baka  nyi ndɛndɛ wɔ ye mɔlebɛbo. Mekɛ mɔɔ ye ndinli ne mɔ ɛlɛyɛ mgbole na bɛlɛkɔ azɛlɛ bo kpalɛ la ɛnee ye avinli ne ɛlɛtɛlɛ na ɔlɛwa. Ɔbadwu mekɛ ne bie la, saa baka ne ɛlɛnyi a akee bɛnnwu ye kpalɛ. Zɔhane ala a Keleseɛnema ɛnyinlɛ ne noko de a. Bie a yɛbayɛ nzenzaleɛ dɔɔnwo wɔ mekɛ mɔɔ yɛkɛbɔ Baebolo ne ezukoalɛ bo la. Akee bɛbazɔne yɛ. Menli mɔɔ wɔ asafo ne anu la banwu anyuhɔlɛ mɔɔ yɛlɛnyia la. Yɛbahola yɛayɛ adekpakyelɛ anzɛɛ yɛbanyia gyimalilɛ dɔɔnwo wɔ asafo ne anu. Noko ɔbadwu mekɛ ne bie la, ɔbayɛ se kɛ awie mɔ banwu anyuhɔlɛ mɔɔ yɛlɛnyia la. Noko akee, ɔwɔ kɛ yɛkɔ zo yɛnyi wɔ diedi nee ndelebɛbo nu yɛyɛ “kɛ menli mɔɔ bɛ adwenle ɛdi na bɛ nee Kelaese ɛzɛ atipɛne la.” (Ɛfɛ. 4:13) Ɛhye kile kɛ, Keleseɛnenli mɔɔ ɛnyi sunsum nu la le kɛ bakama ekyi mɔɔ ɛnyi ɛyɛ baka kpole la.

10. Duzu ati a ɔhyia kɛ Keleseɛnema mɔɔ bɛnyi sunsum nu la bɔbɔ kɔ zo nyi ɛ?

¹⁰ Noko ɔnle kɛ yɛ ɛnyinlɛ ne abo pɛ. Ɔwɔ kɛ yɛ ndelebɛbo yɛ kpole na yɛ diedi sosɔ ndinli kpalɛ wɔ Nyamenle Edwɛkɛ ne anu. (Mrɛ. 12:3) Mediema dɔɔnwo mɔɔ wɔ asafo ne anu la ɛyɛ ye zɔ. Kɛ neazo la, adiema nrenya ko mɔɔ ɛzonle kɛ asafo nu kpanyinli ɛvolɛ mɔɔ ɔbo 30 la yɛle ye nzonlɛ kɛ ɔtɛnyi sunsum nu. Ɔka kɛ: “Anyenzɔlɛ mɔɔ melɛ memaa Baebolo ne la kɔ zo yɛ kpole. Mefa Baebolo ne anu ngyinlazo nee nuhua mɛla medi ninyɛne dɔɔnwo anwo gyima dahuu. Anyenzɔlɛ mɔɔ melɛ memaa ɛzonlenlɛ gyima ne la kɔ zo yɛ kpole.”

11. Duzu ati a ɔbalie mekɛ na yɛanwu Gyihova kpalɛ ɛ?

¹¹ Yɛ ɛnyinlɛ ne eza kile kɛ yɛbabikye Gyihova kɛ yɛ Gɔnwo nee yɛ Ze. Ɔkpondɛ kɛ yɛte nganeɛ kɛ yɛ nwo hyia ye. Ɔkpondɛ kɛ yɛnwu kɛ ɔkulo yɛ edwɛkɛ yɛɛ yɛlɛ banebɔlɛ kɛmɔ kakula mɔɔ nee ye awovolɛ lua te nganeɛ anzɛɛ yɛ nee yɛ gɔnwo mɔɔ di nɔhalɛ la lua a yɛte nganeɛ la. Kɛmɔ ɛkola ɛnwu ye la, agɔnwolɛvalɛ kpalɛ mɔɔ yɛ nee Gyihova bɛanyia la ɛnle kenle ko debie. Ɔdie mekɛ amaa yɛanwu ye na yɛahulo ye. Yemɔti, saa yɛbanwu kɛzi Gyihova de la kpalɛ a, kyesɛ yɛnyia mekɛ yɛkenga ye Edwɛkɛ ne alehyenlɛ biala. Na yɛkenga Ɛzinzalɛ Arane nee Awake! biala mɔɔ ɔbara la, yɛɛ Baebolo nwo mbuluku gyɛne.

12. Duzu a ɔhyia kɛ yɛyɛ na Gyihova anwu yɛ a?

¹² Nyamenle agɔnwo mɔ dua asɔneyɛlɛ nee agɔnwolɛ kpalɛ ɛdulɛ zo nyi sunsum  nu. (Bɛgenga Malakae 3:16.) Gyihova buke “ɔ nzo ɔtie bɛ nzɛlɛlɛ.” (1 Pita 3:12) Gyihova le kɛ wovolɛ mɔɔ lɛ ɛlɔlɛ la, yemɔti ɔtie yɛ nzɛlɛlɛ. Ɛhye ati, ɔwɔ kɛ yɛyɛ “nzɛlɛlɛ dahuu.” (Wulo. 12:12) Saa yɛbahola yɛayɛ Keleseɛnema mɔɔ yɛnyi wɔ sunsum nu la a, kyesɛ Nyamenle boa yɛ. Yɛdayɛ mumua ne yɛnrɛhola yɛnrɛli ngyegyelɛ mɔɔ yɛkɔ nu la anwo gyima. Saa yɛgyakyi asɔneyɛlɛ a, yɛnrɛnyia anwosesebɛ ne mɔɔ Nyamenle fi ye ɛhulolɛ nu ɔfa ɔmaa ye azonvolɛ la. Asoo wɔ nzɛlɛlɛ di munli, anzɛɛ ɛnwu kɛ ɔwɔ kɛ ɛbɔ mɔdenle wɔ nu?—Gyɛ. 16:19.

13. Duzu ati a ɔhyia kɛ yɛ nee yɛ mediema Keleseɛnema bɔ na yɛanyi sunsum nu ɛ?

¹³ Gyihova anye die “bɛdabɛ mɔɔ bɛnriandi bɛbatane ye la” kɔsɔɔti anwo; yemɔti, mekɛ mɔɔ yɛnwu Nyamenle bɔbɔ la, ɔwɔ kɛ yɛ nee menli mɔɔ bɛdabɛ noko bɛnwu ye la yia nu dahuu. (Nah. 1:7) Ngyegyelɛ dɔɔnwo wɔ ewiade ɛhye anu, yemɔti ɔle kpalɛ kɛ yɛ nee yɛ mediema mɔɔ bɛbaboa yɛ la tu dahuu. Nvasoɛ boni a bavi nu ara a? Ɛbanwu menli mɔɔ bɛbamaa ‘yɛahulo yɛ nwo ngoko ngoko, na yɛayɛ gyima kpalɛ la’ wɔ asafo ne anu. (Hib. 10:24, 25) Yɛnrɛhola yɛnrɛli Pɔɔlo folɛdulɛ ɛhye azo kyesɛ yɛ nee asafo ne bɔ. Ɔwɔ kɛ yɛ nee yɛ mediema Keleseɛnema bɔ dahuu amaa yɛahola yɛala ɛlɔlɛ ɛhye ali. Asafo ayia mɔɔ yɛbahɔ ye dahuu na yɛava yɛ nwo yɛawula nu la noko boka ninyɛne mɔɔ yɛgyinla zo yɛneɛnlea yɛ nwo nu la anwo.

14. Adenle boni azo a anlubɛnwo nee nzenzaleɛ le ninyɛne mɔɔ ɔwɔ kɛ yɛkɔ zo yɛyɛ ɛ?

¹⁴ Kolaa na yɛayɛ Keleseɛnema la, ɔwɔ kɛ yɛnu yɛ nwo na yɛkakyi yɛ subane, anzɛɛ yɛgyakyi ɛtaneyɛlɛ. Noko akee, anlubɛnwo le debie mɔɔ ɔwɔ kɛ yɛkɔ zo yɛyɛ. Kɛmɔ yɛnli munli la ati, ɛtane ɛbɛkɛbɛka yɛ kɛmɔ ɛwɔlɛ kpondɛ debie ahye ye a ɔbubu ɔ nwo la. (Wulo. 3:9, 10; 6:12-14) Ɔwɔ kɛ yɛmaa yɛ nye da ɛkɛ, mɔɔ yɛmbu yɛ nye yɛngua yɛ sinlidɔlɛ zo a. Mɔɔ ɔyɛ anyelielɛ la a le kɛ Gyihova lɛ yɛ nwo abotane wɔ mekɛ mɔɔ yɛlɛbɔ mɔdenle yɛaho yɛatia yɛ sinlidɔlɛ na yɛayɛ nzenzaleɛ la. (Fel. 2:12; 2 Pita 3:9) Saa yɛnea yɛ mekɛ nee ninyɛne mɔɔ yɛlɛ la azo kpalɛ a, ɔbamaa yɛahwe yɛ nwo yɛavi angomediyɛlɛ nwo. Adiema raalɛ ko hɛlɛle kɛ: “Bɛtetele me wɔ nɔhalɛ ne anu, noko akee, mekɛ mɔɔ menyinli la menyianle adwenle ngakyile wɔ Gyihova anwo. Mendele nganeɛ kɛ menrɛhola menrɛyɛ mɔɔ ɔsɔ ɔ nye ɔluakɛ ɔ nwo yɛ ɛzulolɛ kpalɛ.” Yeangola yeambikye ye ɛlɛ yemɔti adiema raalɛ ne “yɛle nvonleɛ dɔɔnwo.” Ɔka kɛ: “Tɛ kɛ ɛnee mengulo Gyihova ɔ, emomu, ɛnee menze ye kpalɛ. Noko akee, mekɛ mɔɔ mengɔle zo menyɛlɛ asɔne ɛsesebɛ la, mengakyile me subane. Menwunle kɛ Gyihova zɔle me sa kɛ kakula la, ɔboale me ɔmanle menlile me ngyegyelɛ ne mɔ anwo gyima na ɔhilele me mɔɔ ɔwɔ kɛ meyɛ la.”

15. Duzu a Gyisɛse nee ɔ Ze nwu ye a?

¹⁵ ‘Bɛhɔ zo bɛha edwɛkpa ne bɛhile menli kɔsɔɔti.’ Nyamenle anwumabɔvolɛ bie hanle edwɛkɛ ɛhye hilele Pita nee ɛzoanvolɛ ne mɔ wɔ mekɛ mɔɔ bɛyele bɛ bɛvile efiade wɔ nwanwane adenle zo la. (Gyi. 5:19-21) Daselɛlilɛ mɔɔ yɛbahɔ ye dapɛne biala la le adenle bieko mɔɔ yɛdua zo yɛneɛnlea yɛ nwo nu. Gyisɛse nee ɔ Ze nwu yɛ diedi nee kɛzi yɛyɛ ɛzonlenlɛ gyima ne la. (Yek. 2:19) Kɛmɔ asafo nu kpanyinli ne mɔɔ yɛlumua yɛha ɔ nwo edwɛkɛ la hanle la: “Yɛ gyima titile a le daselɛlilɛ gyima ne.”

16. Duzu ati a ɔle kpalɛ kɛ yɛbadwenledwenle yɛ nwo zo mɔɔ yɛyila yɛmaa Gyihova la anwo ɛ?

¹⁶ Dwenledwenle ɛ nwo zo mɔɔ wɔyila la anwo. Agɔnwolɛvalɛ mɔɔ yɛ nee Gyihova lɛ la le yɛ agyadeɛ mɔɔ tɛla biala.  Ɔze bɛdabɛ mɔɔ bɛle ye ɛdeɛ la. (Bɛgenga Ayezaya 44:5.) Dua asɔneyɛlɛ zo neɛnlea agɔnwolɛvalɛ mɔɔ ɛ nee ye lɛ la anu. Kakye wɔ ɛzɔnenlɛ ne noko, mmamaa ɛ rɛle fi kenle zɔhane ɛlɛ. Ɛhye noko bahakye wɔ kɛ wɔ ɛzɔnenlɛ ne le wɔ kpɔkɛzilɛ mɔɔ anwo hyia kpole kpalɛ la anwo sɛkɛlɛneɛ.

17. Duzu ati a abotane nwo hyia na yɛahola yɛabeta Gyihova anwo ɛ?

¹⁷ Pɔɔlo dule Galeehyeama folɛ kɛ bɛzi abotane. (Gal. 6:9) Ɔwɔ kɛ Keleseɛnema mɔɔ bɛwɔ ɛkɛ ɛnɛ la noko yɛ zɔ. Yɛbayia ngyegyelɛ, noko Gyihova baboa yɛ. Kɔ zo sɛlɛ sunsum nwuanzanwuanza ne. Ɛ nwo badɔ wɔ, ɔbamaa wɔ ɛzunlɛ ahakyi anyelielɛ na wɔ nyanelilɛ ahakyi anzondwolɛ. (Mat. 7:7-11) Dwenle ɛhye anwo nea: Saa Gyihova nea nloma a, ɛnee nwu ye kɛ ɔbanlea ɛdawɔ noko ɔluakɛ ɛkulo ye yɛɛ wɔyila ɛ nwo zo wɔmaa ye. (Mat. 10:29-31) Saa ngyegyelɛ ne anu yɛ se bɔbɔ a, mmamaa ɛ sa nu to; si abotane. Ɔluakɛ Gyihova ɛnwu yɛ la ati, nea nyilalɛ dɔɔnwo mɔɔ yɛbanyia a!

18. Kɛkala ‘mɔɔ wɔnwu Nyamenle la’ duzu bieko a ɛkpondɛ kɛ ɛyɛ a?

¹⁸ Zɔhane ati, saa bɔ zo mɔɔ yɛzɔne anzɛɛ yɛzɔnenle la yehyɛ a, duzu bieko a ɛha a? Bɔ mɔdenle kɛ ɛbanwu Gyihova kpalɛ na nyi wɔ sunsum nu. Nea boɛ na wɔannyia adwenle kɛ ɛze Nyamenle kpalɛ yemɔti ɔwɔ kɛ ɛte ɛda anzɛɛ ɔngyia kɛ ɛkɔ ɛ nyunlu wɔ ɛ nee ye bɛ agɔnwolɛvalɛ ne anu bieko. Gyinla ninyɛne mɔɔ yɛzuzu nwo la azo neɛnlea ɛ nwo nu ɔvi mekɛ mɔɔ kɔ mekɛ la, amaa wɔabikye Gyihova, yɛ anwuma Selɛ, yɛ Gɔnwo, nee yɛ Nyamenle ne mɔɔ lɛ ɛlɔlɛ la.—Bɛgenga 2 Kɔlentema 13:5, 6.