Kɛ Bɛfɛlɛ Nyamenle Ɛ? Nyamenle mumua ne se: “Medame a mele Gyihova a. Me duma ɛne.” (Ayezaya 42:8) Nyamenle duma ne finde fane kɛyɛ 7,000 wɔ Baebolo ne anu. Noko akee, Baebolo ngilebɛbo dɔɔnwo ɛye duma ɛhye na bɛva amodinli “Awulae” anzɛɛ “Ɛdɛnkɛma” bɛzie ɔ gyakɛ anu. Nyamenle kulo kɛ ɛyɛ ɔ gɔnwo ɔti ɔmaa wɔ anwosesebɛ kɛ ‘ɛbɔ ye duma ne.’​—Edwɛne 105:1.

Gyihova Amodinli Ngakyile. Baebolo ne fa amodinli le kɛ “Nyamenle,” “Tumivolɛ Bedevinli,” “Egya,” “Awulae” yɛɛ “Tumivolɛ” fɛlɛ Gyihova. Asɔneyɛlɛ dɔɔnwo anwo kɛlɛtokɛ wɔ Baebolo ne anu mɔɔ bɛva Gyihova  amodinli yɛɛ ye duma Gyihova ne bɛli gyima wɔ nu a.​—Daneɛle 9:4.

Kɛzi Nyamenle De La. Nyamenle le sunsum. (Dwɔn 4:24) Baebolo ne ka kɛ “awie biala ɛtɛnwunle Nyamenle ɛlɛ.” (Dwɔn 1:18) Baebolo ne maa yɛnwu kɛzi ɔte nganeɛ la. Menli nyɛleɛ kola maa ɔdi nyane anzɛɛ “ɔ nye die.”​—Mrɛlɛbulɛ 11:20; Edwɛne 78:40, 41.

Nyamenle Subane Ngɛnlɛma Ne Mɔ. Nyamenle ɛnnea menli nyunlu, ɔnva nwo maanle mɔɔ bɛvi nu nee bɛ tɛnlabelɛ. (Gyima ne 10:34, 35) Eza ɔle “anwunvɔnezelɛ nee ahunluyelɛyelalɛ Nyamenle, ɔkyɛ na yeava ɛya yɛɛ ɛlɔlɛ kpundii nee nɔhalɛlilɛ ɛyi ye tɛkɛɛ.” (Ɛzɛdɔso 34:6, 7) Noko, Nyamenle lɛ subane titili nna bie mɔɔ twe yɛ bikye ye a.

Tumi. Ɔle “Nyamenle Tumivolɛ Bedevinli,” yemɔti ɔlɛ tumi mɔɔ ɔkola ɔdi ye ɛwɔkɛ biala azo a.​—Gyɛnɛsese 17:1.

Nrɛlɛbɛ. Nyamenle nrɛlɛbɛ ne tɛla nrɛlɛbɛ biala. Ɔti Baebolo ne ka kɛ “ɔ ngomekye a ɔle nrɛlɛbɛvolɛ” a.​—Wulomuma 16:27.

Pɛlepɛlelilɛ. Nyamenle yɛ mɔɔ tenrɛ la dahuu. Ye nyɛleɛ kɔsɔɔti “di munli,” yɛɛ “ɔnli mɔguazo.”​—Ditilɔnomi 32:4.

Ɛlɔlɛ. Baebolo ne ka kɛ “Nyamenle le ɛlɔlɛ.” (1 Dwɔn 4:8) Tɛ kɛ Nyamenle da ɛlɔlɛ ali ala​—ɔle ɛlɔlɛ. Ye ɛlɔlɛ mɔɔ tɛla biala la ka debie biala mɔɔ ɔyɛ la, na ɔboa yɛ wɔ ndenle dɔɔnwo azo.

Nyamenle Fa Menli Agɔnwolɛ. Nyamenle le yɛ anwuma Selɛ mɔɔ lɛ ɛlɔlɛ. (Mateyu 6:9) Saa yɛnyia ye nu diedi a yɛbayɛ ɔ gɔnwo. (Edwɛne 25:14) Nɔhalɛ nu, Nyamenle kulo kɛ ɛbikye ye wɔ asɔneyɛlɛ nu na ‘ɛfuandi wɔ adwenleadwenle muala ɛgua ɔ nwo zo ɔluakɛ ɔdwenle ɛ nwo.’​—1 Pita 5:7; Gyemise 4:8.

Gyisɛse Ɛnle Nyamenle. Gyisɛse le ngakyile, ɔ ngomekye a Nyamenle mumua ne bɔle ye tee a. Yemɔti a Baebolo ne fɛlɛ ye Nyamenle Ara la. (Dwɔn 1:14) Mɔɔ Gyihova bɔle Gyisɛse wiele la, ɔluale ye belamunli ralɛ ne anwo zo kɛ “gyimayɛvo mɔɔ ɛbe” la ɔvale ɔbɔle debie biala yɛɛ awie biala.​—Mrɛlɛbulɛ 8:30, 31; Kɔlɔsaema 1:15, 16.

 Gyisɛse Kelaese anga ye ɛlɛ kɛ ɔle Nyamenle. Emomu, ɔhanle kɛ: ‘Megyi Nyamenle agyakɛ anu, yɛɛ Ɔdaye a ɔzoanle me a.’ (Dwɔn 7:29) Mɔɔ Gyisɛse nee ye ɛdoavolɛ ne mɔ ko ɛlɛtendɛ la, ɔvɛlɛle Gyihova kɛ, “me Ze nee bɛ Ze, me Nyamenle nee bɛ Nyamenle.” (Dwɔn 20:17) Mekɛ mɔɔ Gyisɛse wule la, Nyamenle dwazole ye hɔle anwuma na ɔmaanle ye tumi kpole wɔ Ɔ sa fema zo.​—Mateyu 28:18; Gyima ne 2:32, 33.

Gyisɛse Kelaese Bahola Aboa Wɔ Yeamaa Wɔabikye Nyamenle

Gyisɛse rale azɛlɛ ye azo rahilehilele yɛ ɔ Ze anwo debie. Gyihova hanle Gyisɛse anwo edwɛkɛ kɛ: “Ɛhye a le me Ra mɔɔ mekulo ye la. Bɛdie ye.” (Maake 9:7) Gyisɛse ze Nyamenle kpalɛ tɛla awie biala. Ɔhanle kɛ: “Awie biala ɛnze Selɛ ne sonla holɛ kɛ Ralɛ ne nee awie biala mɔɔ Ralɛ ne kulo kɛ ɔda ye ali ɔkile ye la.”​—Luku 10:22.

Gyisɛse da Nyamenle subane ne mɔ ali pɛpɛɛpɛ. Gyisɛse lale ɔ Ze subane ne mɔ ali kpalɛ yemɔti ɔholale ɔhanle kɛ: “Mɔɔ ɛnwu me la ɛnwu Selɛ ne noko.” (Dwɔn 14:9) Gyisɛse hwenle menli rale Nyamenle anwo ɔvale ɔzukoale ɔ Ze ɛlɔlɛ ne. Ɔhanle kɛ: “Mame a mele adenle ne nee nɔhalɛ ne nee ngoane ne a. Awie biala ɛmba Selɛ ne ɛkɛ kyesɛ ɔdua me nwo zo.” (Dwɔn 14:6) Eza ɔhanle kɛ: ‘Nɔhalɛ azonvolɛ bazonle Selɛ ne wɔ sunsum nu nee nɔhalɛ nu, ɔluakɛ Selɛ ne ɛlɛkpondɛ bɛdabɛ mɔɔ bɛle kɛ ɛhye mɔ la yeamaa bɛazonle ye.’ (Dwɔn 4:23) Dwenle nwo nea! Gyihova ɛlɛkpondɛ menli mɔɔ le kɛ ɛdawɔ mɔɔ bɛkulo kɛ bɛnwu nɔhalɛ ne mɔɔ fale ɔ nwo la.