Wɔ March 2020 mɔɔ World Health Organization ne hanle kɛ COVID-19 le ewulenzane la, menli dɔɔnwo anlie anli kɛ ewule ne badɛnla ɛkɛ ne too ɛvolɛ mɔɔ bo ko la wɔ ewiade amuala. Menli mgbe dɔɔnwo mɔɔ Gyihova Alasevolɛ boka nwo la ɛyia nwonane nu, nganeɛdelɛ nu nee ezukoa afoa nu ngyegyelɛ mɔɔ ewulenzane ne ɛva ɛra la bie. Kɛzi Gyihova Alasevolɛ ɛyɛ ngyehyɛleɛ ɛboa awie mɔ wɔ esiane mekɛ ɛhye anu ɛ?

 Gyihova Alasevolɛ Neazo Eku ne Ngitanwodivoma Kɔmatii ne ɛde Esiane Mekɛ Nu Moalɛ Kɔmatii (Disaster Relief Committees (DRC)) mɔɔ bo 950 la wɔ ewiade amuala ɔlua COVID-19 ne ati. Ɔdwu mekɛ ne bie a bɛfa moalɛ bɛmaa mediema mɔɔ bikye bɛ la yɛɛ ɔyɛ a Alasevolɛ ne mɔ nyia moalɛ fi arane ne ɛkɛ. Eza DRC ne mɔ fa moalɛ maa menli mɔɔ anwo zonle.

 Kɛ neazo la, suzu mɔɔ zile wɔ Paraguay la anwo. Adwelie kɛlata bie hanle kɛ ɔlua anwongyelelɛ mɔɔ ewulenzane ne ɛva ɛra la ati, “ɛhɔne ɛlɛku Paraguayma dɔɔnwo wɔ bɛ azua nu.” Noko ɛnee DRC ne mɔ mɔɔ wɔ Paraguay la ɛbɔ ɔ bo ɛlɛkyɛ aleɛ nee ninyɛne mɔɔ bɛfa bɛyɛ bɛ nwo bɔkɔbɔkɔ mɔɔ abusua mɔɔ nuhua menli le nna bahyia nwo wɔ dapɛne nwiɔ anu la. Ninyɛne mɔɔ bɛvale bɛmaanle abusua ko biala la bayɛ kɛyɛ $30 (U.S.).

 Kɛzi menli mɔɔ fa moalɛ ne maa la bɔ bɛ nee awie mɔ anwo bane fi COVID-19 ewule ne anwo ɛ? Bɛwula mask yɛɛ bɛmbikye menli gyɛne. Eza bɛnea kɛ menli mɔɔ bɛtɔ aleɛ ne bɛfi bɛ ɛkɛ ne la fa anwobanebɔlɛ nee bɔkɔbɔkɔyɛlɛ nwo ngyehyɛleɛ yɛ gyima. Ɛhye kile kɛ bɛnea kɛ menli mɔɔ fa ninyɛne ne ahɔ la bɔ bɛ nwo bane, bɛkyikyi bɛ kale ne mɔ anu yɛɛ bɛfa aleɛ ne bɛsie ɛleka mɔɔ le bɔkɔbɔkɔ la. Akee menli mɔɔ fa ninyɛne ne ahɔmaa mediema ne mɔ la ɛmbikye bɛ somasoma.

 Ɔkadwu January 2021 la, ɛnee Ngitanwodivoma Kɔmatii ne ɛlie ɛdo nu kɛ bɛva America dɔla mgbe 25 bɛboa COVID-19 moalɛ gyima ne. Bɛtɛle ngakyile ne mɔ nee DRC ne mɔ nea kɛ bɛbava ezukoa ɛhye bali gyima kpalɛ yɛɛ bɛbɔ mɔdenle kɛ bɛbanyia ninyɛne mɔɔ bɛ bolɛ ɛnyɛ se la. Kɛ neazo la, wɔ Chile, ɛnee menli mɔɔ ɛlɛyɛ moalɛ gyima ne la kulo kɛ bɛtɔ aluba kilo 750. Noko ɛnee aluba ne bolɛ ɛhɔ ɔ nyunlu fane nwiɔ wɔ siane kokye anu! Mekɛ mɔɔ bɛliele bɛdole nu kɛ bɛbadɔ aluba bolɛ ɛsesebɛ zɔhane la ye dɔnehwele nwiɔ anzi, ahenle mɔɔ tɔne aluba ne la hanle hilele bɛ kɛ awie mɔɔ dɔle aluba ne bie la ɛziane ye ɛdeɛ ne. Ɔti ɔdɔnenle aluba ne mɔɔ bɛzianenle ye la ɔmaanle yɛ mediema ne mɔ ɔliele bolɛ dɛba ne!

 Noko, mekɛ mɔɔ mediema ne mɔ hɔle kɛ bɛkava aluba ne la, ɔ menle ne yɛle kɛ ɔkakyi bolɛ ne na ɔbɔle bɛ somolɛ kɛ bɛlɛkyɛ aleɛ ne kɛ mɔɔ ahyehyɛdeɛ bie mɔ yɛ ye la. Bɛngyɛ ye pɛpɛɛpɛ. Mɔɔ mediema ne mɔ ko yɛle asɔne wɔ ɔ ti anu wiele la, ɔhanle ɔhilele aluba menle ne kɛ bɛlimoa bɛnlea bɛnwu menli mɔɔ asafo ne mɔ anu mɔɔ amgba bɛhyia moalɛ la. Mediema ne mɔ eza hilehilele nu kɛ kɛmɔ asolo ɛleka mɔɔ abusua ko biala vi la ati bɛnea ninyɛne mɔɔ baboa bɛ kpalɛ la na bɛava bɛamaa bɛ. Awieleɛ bɔkɔɔ ne, bɛmaanle ɔnwunle kɛ bɛndua Gyihova Alasevolɛ mɔɔ bɛlɛyɛ moalɛ gyima ne la kakɛ yɛɛ bɛnyia ezukoa ne bɛfi ndoboa ɛyelɛ nu. Ɔ nye liele mɔɔ bɛhanle la anwo. Aluba menle ne dele bolɛ ne azo yɛɛ eza mekɛ mɔɔ mediema ne mɔ dɔle aluba bieko la ɔhyɛle bɛ kilo 400.

 Kunlavolɛ raalɛ kpanyinli bie mɔɔ bɛfɛlɛ ye Lusu mɔɔ wɔ Liberia la nee ye mbusuafoɔ nnu a de a. Kenle ko bie mɔɔ bɛyɛle alehyenlɛ ne anu tɛkese ne bɛwiele na bɛlɛdi bɛ nwonlomɔ aleɛ la, Lusu anlɔnra mɔɔ ɛnyia ɛvolɛ nsuu la nwunle kɛ aleɛ ɛwie sua nu ɛkɛ. Ɔbizale kɛ, “Nzɔne a yɛbali a?” Lusu maanle ye anwosesebɛ kɛ yelimoa yeyɛ nwolɛ asɔne na ɔlɛ anwodozo kɛ Gyihova bamaa bɛanyia bie. Kenle ko zɔhane ewiazo, asafo nu mgbanyima bie mɔ vɛlɛle Lusu kɛ ɔralie aleɛ mɔɔ bɛlɛkyɛ la bie. Ɔhanle kɛ: “Me anlɔnra ne se kɛkala yenwu kɛ Gyihova bua asɔneyɛlɛ ɔluakɛ Gyihova buale me ɛdeɛ ne.”

 Raalɛ bie de bikye Alasevolɛ abusua bie wɔ Democratic Republic of Congo. Mekɛ mɔɔ ɔnwunle kɛ bɛ gɔnwo mɔ Alasevolɛ ɛva aleɛ ɛrɛlɛ bɛ la ɔhanle kɛ, “Saa ewulenzane ne pɛ nu a, yɛbayɛ Gyihova Alasevolɛ ɔluakɛ bɛnlea bɛ mediema mrenyia nee mraalɛ wɔ anwongyelelɛ mekɛ ɛhye anu.” Ɔ hu bizale ye kɛ, “Awule kodoku ko ati ɛbayɛ Gyihova Dasevolɛ ɔ?” Ɔbuale kɛ, “Kyɛkyɛ, noko awule ne maa ɔda ali kɛ bɛlɛ nɔhalɛ ɛlɔlɛ.”

 Gyihova Alasevolɛ ɛhola ɛboa yɛ mediema mrenyia nee mraalɛ wɔ ewulenzane mekɛ ɛhye anu ndɛndɛ ɔluakɛ ɛfi wɔ ɛhulolɛ nu ɛye ndoboa. Yɛda wɔ ase kɛ ɛdua ndenle mɔɔ bɛha nwolɛ edwɛkɛ wɔ donate.isa4310.com azo ɛye ndoboa la.