Sean Gladwell/Moment via Getty Images
BƐHƆ ZO BƐZINZA!
Kakɛ Mɔɔ Arane Ne Mɔ Ɛbɔ Ye Wɔ Konle Nwo La Ɛbo Dɔla 2 Trillion—Duzu A Baebolo Ne Ka A?
Wɔ 2022, arane ne mɔ bɔle kakɛ U.S. dɔla 2.24 trillion wɔ konle nwo dɛlale mekɛ biala ɔlua Russia nee Ukraine konle ne ati. Stockholm International Peace Research Institute (SIPRI) bɔle amaneɛ wɔ April 2023 kɛ, wɔ 2022 anu:
Kakɛ mɔɔ Europe arane ne mɔ bɔle ye wɔ konle nwo la “hɔle ɔ nyunlu ɛya ko ngyɛnu 13. Ɔvi 1991 too mɔɔ ba la, ɛvolɛ ɛhye a bɛbɔ kakɛ wɔ konle nwo kpalɛ a.”
“Kakɛ mɔɔ Russia…bɔle la hɔle ɔ nyunlu kɛyɛ ɛya ko ngyɛnu 9.2 na ɛhye ɛmaa yerayɛ maanle tɔ zo nsa wɔ ewiade ye anu mɔɔ bɔ kakɛ wɔ konle nwo a.”
United States tɛde maanle mɔɔ bɔ kakɛ wɔ konle nwo kpalɛ a, “ɔluakɛ kakɛ mɔɔ bɛbɔ ye wɔ konle nwo la le mɔɔ bɛbɔ ye wɔ ewiade amuala la anu ɛya ko ngyɛnu 39.”
Dr. Nan Tian mɔɔ hɛlɛle SIPRI amaneɛbɔlɛ ne bie la ka kɛ, “Kakɛ kpole mɔɔ bɛbɔ ye wɔ konle nwo wɔ ewiade amuala la le sɛkɛlɛneɛ mɔɔ kile kɛ yɛnlɛ banebɔlɛ wɔ ewiade a.”
Baebolo ne hanle dole ɛkɛ ne kɛ konle bahɔ zo wɔ arane mɔɔ bɛlɛ tumi la avinli yɛɛ ɔmaa yɛnwu debie kokye mɔɔ bamaa anzodwolɛ ara la.
Bɛhanle kɛ arane ne mɔ badwazo atia bɛ nwo
Baebolo ne ka kɛ yɛde “awieleɛ mekɛ” nu.—Daneɛle 8:19.
Daneɛle buluku ne hanle dole ɛkɛ ne kɛ wɔ awieleɛ mekɛ ne anu, arane ne mɔ bapele tumililɛ nwo. Arane ɛhye mɔ bahɔ zo ‘azuhuzuhu bɛ nwo’ anzɛɛ apele tumililɛ nwo. Ɛhye bamaa bazɛkye “ninyɛne mgbalɛ” anzɛɛ ezukoa dɔɔnwo.—Daneɛle 11:40, 42, 43.
Amaa wɔanwu Baebolo ngapezo ɛhye mɔɔ yɛ anyelielɛ la anwo edwɛkɛ dɔɔnwo la, nea Ngapezo Mɔɔ Ɛra Nu—Daneɛle Tile 11 vidio ne.
Mɔɔ bava nɔhalɛ anzodwolɛ ara la
Baebolo ne ka kɛ Nyamenle baye arane ne mɔ avi ɛkɛ. ‘Ɔbava belemgbunlililɛ bie yeazie ɛkɛ mɔɔ bɛnrɛzɛkye ye ɛlɛ a. Na bɛnrɛva belemgbunlililɛ ɛhye bɛnrɛmaa menli gyɛne biala. Ɔbabubu arelemgbunlililɛ ɛhye mɔ amuala na yeabɔ bɛ bo zo, na ɔ ngomekye a ɔbagyinla ɛkɛ ne dahuu a.’—Daneɛle 2:44.
Ɔnrɛhyɛ Gyihova a Nyamenle bayɛ debie mɔɔ alesama angola anyɛ la—ɔbamaa yeanyia nɔhalɛ anzodwolɛ dahuu. Kɛzi? Ye anwuma Belemgbunlililɛ ne bazɛkye konle ninyɛne kɔsɔɔti na yeamaa basabasayɛlɛ kɔsɔɔti ara awieleɛ.—Edwɛne 46:8, 9.
Amaa wɔanwu mɔɔ Nyamenle Belemgbunlililɛ ne bayɛ anwo edwɛkɛ dɔɔnwo la, kenga edwɛkɛ “Under God’s Kingdom ‘Peace Will Abound.’”
a Nyamenle duma a le Gyihova.—Edwɛne 83:18.
Bie A Eza Ɛ Nye Balie
BAEBOLO KPUYA MƆƆ BƐBUA
Kɛ Ɔkɛyɛ Na Anzodwolɛ Ara Azɛlɛ Ye Azo Ɛ?
Sukoa kɛzi Nyamenle ɛbɔ ɛwɔkɛ kɛ ɔbalua ye Belemgbunlililɛ ne azo yeava anzodwolɛ yeara azɛlɛ ye azo la anwo debie.
EDWƐKƐTILE NGAKYILE
Ninyɛne Bayɛ Kpalɛ Kenle Bie
Duzu ati a ɛwɔkɛ mɔɔ wɔ Baebolo ne anu la le ngakyile fi kenle bie nwo edwɛkɛ mɔɔ menli ka la anwo ɛ?
BAEBOLO NGILEHILELƐ MƆƆ ANWO HYIA KPALƐ LA
Nyamenle Belemgbunlililɛ Ne Bɔle Ye Tumililɛ Bo Wɔ 1914
Kɛyɛ ɛvolɛ 2,600 mɔɔ ɛze ɛhɔ la, Nyamenle maanle belemgbunli bie mɔɔ lɛ tumi kpole la hanle ɛlalɛ na mɔɔ ɔnwunle ye la ɛlɛba nu ɛnɛ.
