Aluma Nyɛ A Nyamenle Lɛ A?

BƆ

Baebolo ne bua kɛ

Nyamenle lɛ duma kokye ala. Bɛhɛlɛ ye יהוה wɔ Hibulu nu na bɛta bɛkile ɔ bo “Gyihova” wɔ Nzema nu. * Nyamenle luale ye ngapezonli Ayezaya anwo zo hanle kɛ: ‘Medame a mele Gyihova a, me duma ɛne.’ (Ayezaya 42:8) Duma ɛhye finde fane kɛyɛ 7,000 wɔ tete Baebolo bɛsanloangɛlɛlera ne anu—bɛva duma ɛhye bɛli gyima fane dɔɔnwo bɛdɛla amodinli biala mɔɔ bɛfa bɛfɛlɛ Nyamenle anzɛɛ awie la. *

Asoo Gyihova lɛ aluma gyɛne?

Ɔwɔ nuhua kɛ Baebolo ne ka Nyamenle duma kokye ala anwo edwɛkɛ ɛdeɛ, noko ɔfa amodinli nee ngilehilenu dɔɔnwo ɔka ɔ nwo edwɛkɛ. Amodinli nee ngilehilenu mɔɔ doɔdoa zo la ko biala maa yɛnwu kɛzi Gyihova de anzɛɛ ye subane.

Amodinli	Ɛleka Mɔɔ Ɔfinde	Mɔɔ Ɔkile
Allah	(Ɔnlɛ bie)	“Allah” mɔɔ vi Arabic nu la ɛnle duma, emomu ɔle amodinli mɔɔ ɔ bo kile “Nyamenle.” Baebolo mɔɔ bɛhile ɔ bo wɔ Arabic nee aneɛ gyɛne nu la fa “Allah” gyinla ɛkɛ ne maa “Nyamenle.”
Nyamenle Bedevinli	Mɔlebɛbo 17:1	Ɔlɛ tumi kpole. Hibulu edwɛkɛkpɔkɛ ʼEl Shad·daiʹ, “Nyamenle Bedevinli,” finde fane nsuu wɔ Baebolo ne anu.
Alefa Nee Omiga	Yekile 1:8; 21:6; 22:13	“Alimoa nee amozi,” anzɛɛ “mɔlebɛbo nee awieleɛ,” kile kɛ Nyamenle Tumivolɛ Bedevinli biala ɛnli Gyihova anyunlu yɛɛ bie vi ɔ nzi noko ɛnrɛra. (Ayezaya 43:10) Alefa nee Omiga a le Giliki ngɛlɛlerakpɔkɛ ne mɔ mɔɔ limoa nee mɔɔ li awieleɛ a.
Tetenli	Daneɛle 7:9, 13, 22	Ɔnlɛ mɔlebɛbo; ɔwɔ ɛkɛ ne kolaa na bɛabɔ awie anzɛɛ debie biala.—Edwɛndolɛ 90:2.
Bɔvolɛ	Ayezaya 40:28	Ɔdaye a ɔbɔle debie biala a.
Selɛ	Mateyu 6:9	Ngoane maavolɛ.
Nyamenle	Mɔlebɛbo 1:1	Debie mɔɔ bɛsonle ye; Awie mɔɔ lɛ anwosesebɛ. Hibulu edwɛkɛkpɔkɛ ʼElo·himʹ, kile Gyihova tumi, enililɛ, anzɛɛ kpoleyɛlɛ.
Nyamenle Kɔsɔɔti Bɛ Nyamenle	Mɛla ne 10:17	Nyamenle tumivolɛ bedevinli ne le ngakyile fi “mmonle” mɔɔ bie mɔ sonle bɛ la anwo.—Ayezaya 2:8.
Kilehilevolɛ Kpole	Ayezaya 30:20, 21	Ɔfa ngilehilelɛ nee adehilelɛ kpalɛ ɔmaa.—Ayezaya 48:17, 18.
Bɔvolɛ Kpole	Edwɛndolɛ 149:2, New World Translation	Ɔbɔle ninyɛne kɔsɔɔti.—Yekile 4:11.
Anyelielɛ Nyamenle	1 Timote 1:11	Ɔlɛ anyelielɛ.—Edwɛndolɛ 104:31.
Asɔneyɛlɛ Tievolɛ	Edwɛndolɛ 65:2	Ɔtie yɛ nuhua ko biala asɔneyɛlɛ mɔɔ yɛfi diedi nu yɛyɛ la.
Medame A Le Medame	Adendulɛ 3:14	Ɔkola ɔyɛ ɔ nwo biala mɔɔ ɔkulo la amaa ye atiakunlukpɔkɛ ara nu. Eza bɛkile edwɛkɛ ɛhye abo kɛ “Mebayɛ Me Nwo Biala Mɔɔ Mekulo Kɛ Meyɛ La” anzɛɛ “Mebayɛ Me Nwo Mɔɔ Mekpondɛ Kɛ Meyɛ La.” (The Emphasised Bible, by J. B. Rotherham; New World Translation) Ngilehilenu ɛhye mɔ boa yɛ maa yɛnwu mɔɔ Gyihova duma ne kile la kɛ mɔɔ ɔwɔ ngyɛnu mɔɔ doa zo la anu la.—Adendulɛ 3:15.
Nungule	Adendulɛ 34:14	Ɔ nee awie biala ɛngyɛ ye ɛzonlenlɛ. Eza bɛhile edwɛkɛ ɛhye abo kɛ “ɔkulo kɛ bɛsonle ɔ ngomekye.”—God’s Word Bible; New World Translation.
Dahuu Belemgbunli	Yekile 15:3	Ye tumililɛ ne ɛnlɛ ye mɔlebɛbo anzɛɛ awieleɛ.
Awulae	Edwɛndolɛ 135:5	Menlenlɛ; Hibulu nu ʼA·dhohnʹ yɛɛ ʼAdho·nimʹ.
Anwuma Anwumanli Ne	Edwɛndolɛ 47:2; Daneɛle 7:18, 27	Ɔlɛ dibilɛ kpole kpalɛ.
Nwuanzanwuanza Ko Ne	Mrɛlɛbulɛ 9:10	Ɔle nwuanzanwuanza (ɔ nwo te) ɔtɛla awie biala.
Nwovolɛ	Ayezaya 64:8	Ɔlɛ tumi wɔ awie biala nee maanle maanle nwo zo, kɛ mɔɔ nwovolɛ lɛ tumi wɔ ndɛtɛlɛ nwo zo la.—Wulomuma 9:20, 21.
Kpɔnevolɛ	Ayezaya 41:14	Yelua Gyisɛse Kelaese ɛkpɔnelɛ afɔlebɔlɛ ne azo yedɔ alesama yevi ɛtane nee ewule tumi bo.—Dwɔn 3:16.
Bodane	Edwɛndolɛ 18:2, 46	Ɛvealeka kpundii nee ngoanedievolɛ.
Ngoanedievolɛ	Ayezaya 45:21	Ɔdie yɛ ɔfi esiane anzɛɛ ɛzɛkyelɛ nu.
Mboaneneavolɛ	Edwɛndolɛ 23:1	Ɔnea ye azonvolɛ.
Tumivolɛ Awulae	Edwɛndolɛ 69:6	Ɔlɛ tumi kpole; Hibulu nu ʼAdho·naiʹ.

Ɛleka aluma wɔ Hibulu Ngɛlɛlera ne anu

Ɛleka bie mɔ wɔ Baebolo ne anu mɔɔ Nyamenle duma boka bɛ aluma ne anwo, noko ɛhye mɔ ɛnle Nyamenle aluma gyɛne.

Ɛleka Duma	Ɛleka Mɔɔ Ɔfinde	Mɔɔ Ɔkile
Gyihova-gyilɛ	Mɔlebɛbo 22:13, 14, New World Translation	‘Gyihova Bahile.’
Gyihova-nisi	Adendulɛ 17:15, New World Translation	“Gyihova Le Me Sɛkɛlɛneɛ Baka,” anzɛɛ “me Fɛlɛnra.” (Today’s New International Version) Gyihova le Nyamenle bie mɔɔ ye menli bahola ara ɔ nwo na bɛanyia banebɔlɛ nee moalɛ a.—Adendulɛ 17:13-16.
Gyihova-hyalɔm	Maanlebuvolɛma 6:23, 24, New World Translation	‘Gyihova Le Anzodwolɛ.’
Gyihova-hyama	Yizikeɛle 48:35, ɔbodwɛkɛ, American Standard Version	‘Gyihova Wɔ Ɛkɛ.’

Deɛmɔti ɔwɔ kɛ ɛnwu Nyamenle duma na ɛfa ɛdi gyima la

Nyamenle kulo kɛ menli nwu ye duma Gyihova ne. Yɛkola yɛnwu ye zɔ ɔluakɛ yemaa bɛhɛlɛ ye apenle apenle dɔɔnwo wɔ Baebolo ne anu.—Malakae 1:11.
Nyamenle ara Gyisɛse hanle ye fane dɔɔnwo kɛ Nyamenle duma ne anwo hyia. Kɛ neazo la, ɔyɛle Gyihova asɔne kɛ: “Wɔ duma nwo ɛde.”—Mateyu 6:9; Dwɔn 17:6.
Menli mɔɔ ɛnwu Nyamenle duma na bɛfa bɛdi gyima la nee Gyihova ɛnyia agɔnwolɛvalɛ. (Edwɛndolɛ 9:10; Malakae 3:16) Agɔnwolɛvalɛ zɛhae boa maa bɛnyia Nyamenle ɛwɔkɛ ɛhye azo nvasoɛ: “Kɛmɔ ɔbeta me ɛhulolɛ nu la ati, mebalie ye; mebawowa ye, ɔboalekɛ ɔze me duma.”—Edwɛndolɛ 91:14.
Baebolo ne ka kɛ: “Anwuma o, azɛlɛ ye azo o, ninyɛne mɔɔ menli fɛlɛ bɛ nyamenle la dɔɔnwo wɔ ɛkɛ, kɛ mɔɔ “nyamenle” nee “awulae mɔ” dɔɔnwo wɔ ɛkɛ la.” (1 Kɔlentema 8:5, 6) Noko ɔfa nɔhalɛ Nyamenle kokye ne duma Gyihova ne ɔfɛlɛ ye.—Edwɛndolɛ 83:18, New World Translation.

^ Hibulu nwomama bie mɔ anye die Nyamenle duma ne mɔɔ bɛhile ɔ bo “Yahweh” la anwo.

^ Nyamenle duma ne mɔɔ bɛpɛ ye sinli kɛ “Gyaa” la, finde fane kɛyɛ 50 wɔ Baebolo ne anu mɔɔ edwɛkɛ “Hallelujah,” anzɛɛ “Alleluia,” mɔɔ kile kɛ “Bɛye Gyaa Ayɛlɛ” la boka nwo la.—Yekile 19:1; American Standard Version; King James Version.