Mbɔlɔba lɛ debie kpalɛ gyinla zo die di kɛ Gyisɛse dɛnlanle aze. Encyclopædia Britannica ne mɔɔ bɛyɛle ye 2002 la hanle edwɛkɛ mɔɔ ɛvoya mɔɔ limoa nee mɔɔ tɔ zo nwiɔ anu tetedwɛkɛ kɛlɛvoma hanle ye wɔ Gyisɛse nee alimoa Kilisienema anwo la anwo kɛ: “Kɛlɛtokɛ ɛhye mɔ ko biala da ye ali kɛ wɔ tete ne menli mɔɔ ɛnee bɛdwazo bɛtia Kilisiene ɛzonlenlɛ bɔbɔ la anzu kpolera ɛlɛ kɛ Gyisɛse andɛnla aze, emomu, bɛzule ɛhye anwo kpolera mekɛ mɔɔ limoa la wɔ ɛvoya 18 ne awieleɛ, ɛvoya 19 ne anu, yɛɛ ɛvoya 20 ne mɔlebɛbo, noko ɛnee bɛnlɛ ngyinlazo kpalɛ biala.”

 Wɔ ɛvolɛ 2006 anu, Jesus and Archaeology buluku ne hanle kɛ: “Abɔlɔba biala mɔɔ di nɔhalɛ ɛnɛ la ɛnrɛzu kpolera kɛ Dwuunli bie mɔɔ bɛfɛlɛ ye Gyisɛse mɔɔ le Dwosefi ara la dɛnlanle aze; dɔɔnwo ne ala die to nu ndɛndɛ kɛ ɛnɛ yɛze ye nyɛleɛ nee ye ngilehilelɛ ne anwo ninyɛne dɔɔnwo.”

 Baebolo ne da ye ali kɛ Gyisɛse dɛnlanle aze amgba. Ɔmaa yɛnwu ɔ nlenyia mɔ nee ye abusua ne anu amra aluma. (Mateyu 1:1; 13:55) Ɔbobɔ tumivolɛma mɔɔ dɛnlanle aze wɔ Gyisɛse mekɛ zo la noko aluma. (Luku 3:1, 2) Edwɛkɛ ɛhye mɔ boa neɛnleanuma ɔmaa bɛnwu kɛzi Baebolo ne anu edwɛkɛ le nɔhalɛ la.