Ruhanga Naatwegyesa Ebirikumukwataho Kurabira Omuri Baanabi Be
Ira, Ruhanga akaha baanabi be obutumwa bukuru kubumanyisa abantu. Mbwenu shi obutumwa obu nibutworeka oku turikubaasa kutunga emigisha ya Ruhanga? Eego buzima. Ka tureebe eki turikubaasa kwegyera aha baanabi aba abeesigwa.
ABRAHAMU
Ruhanga tarikushoroora kandi naaba naayenda kuha abantu boona emigisha.
Ruhanga akaraganisa nabi Abrahamu ngu “omuriiwe enganda zoona ez’omu nsi nimwo ziriheerwa omugisha.”—Okutandika 12:3.
Nitwega ki? Ruhanga naatukunda munonga kandi naayenda kuha amaka goona emigisha, abashaija, abakazi, n’abaana abarikumworobera.
MUSA
Ruhanga aine embabazi kandi naaha emigisha abarikuteeraho kumumanya.
Ow’obushoboorozi Bwona akaha Musa amaani g’okukora eby’okutangaaza. Kwonka, Musa akashaba ati: “Onyorekye enaama zaawe, nkumanye, mbone kuguma ningirirwa embabazi omu maisho gaawe.” (Okuruga 33:13) Okushaba kwa Musa kukashemeza Ruhanga reero yaamwongyera obwengye n’okwetegyereza emihanda ye n’emitwarize ye. Nk’eky’okureeberaho, Musa akeega ngu Omuhangi aine ‘okusaasira n’embabazi.’—Okuruga 34:6, 7.
Nitwega ki? Ruhanga naayenda kuha twena emigisha, abashaija, abakazi, n’abaana twateeraho kumumanya gye. Naayoreka omu Byahandiikirwe Ebirikwera oku twine kumuramya, kandi ngu aine ekihika ky’okutusiima n’okutuha emigisha ye.
YESU
Yesu omu muringo gw’embabazi akakiza abantu endwara zoona
Nitubaasa kutunga emigisha ya Ruhanga ey’obutwire twayega ebirikukwata ahari Yesu, ebi yaakozire n’ebi yaayegyeise.
Ekigambo kya Ruhanga kirimu bingi ebirikukwata ahari Yesu n’ebi yaayegyeise. Ruhanga akaha Yesu amaani g’okukora eby’okutangaaza, nk’okukiza abafiire amaisho, abateta, n’abamugire. Nangwa akazoora n’abafu. N’ahabw’ekyo Yesu akooreka emigisha ei Ruhanga araahe abantu boona omu biro by’omumaisho. Akashoboorora oku buri omwe ahariitwe arikubaasa kutunga emigisha egyo ati: “Aga nigo magara agatahwaho, okumanya iwe Ruhanga omwe ow’amazima, n’ogwo ou waatumire Yesu Kristo.”—Yohaana 17:3.
Yesu akaba ari omunyambabazi, aine esaasi, kandi arikutwaza gye. Abashaija n’abakazi, abaana n’abakuru, bakaba nibaija ahu ari ahabw’ebigambo bye ebi: ‘Muunyegyereho, ahabw’okuba nintwaza gye, kandi ndi omucureezi omu mutima; naimwe nimwija kutunga okuhuumura omu mitima yaanyu.’ (Matayo 11:29) Yesu okutashushana n’abandi ab’omu bwire bwe abaabaire nibatwariza kubi abakazi, we akaba naatwariza gye abakazi, omu muringo gw’embabazi n’ekitiinisa.
Nitwega ki? Yesu akooreka ngu naakunda munonga abantu, kandi akatuteeraho eky’okureeberaho aha ku twine kutwarizana.
YESU TIWE RUHANGA
Ebyahandiikirwe Ebirikwera nibyegyesa ngu “ahariitwe, hariho Ruhanga omwe” kandi ngu Yesu Kristo akaba ari entumwa ya Ruhanga omucureezi. (1 Abakorinso 8:6) Yesu akagamba gye butunu ngu Ruhanga naamukira, kandi ngu Ruhanga akamwohereza omu nsi.—Yohaana 11:41, 42; 14:28. *
^ kacw. 17 Kubaasa kwega ebirikukiraho ebirikukwata ahari Yesu Kristo, reeba ekicweka kya 8 n’ekya 9 eky’akatabo Real Faith—Your Key to a Happy Life akari aha www.isa4310.com.
