ESHUURA 35

Nimbaasa Kuba nta Munywani wa Ruhanga?

Jeremy bwanyima y’okutunga oburemeezi, akeetegyereza obukuru bw’okugira omukago murungi na Ruhanga. “Obu naabaire nyine emyaka 12, tata akaruga omuka yaagyenda,” nikwo arikushoboorora. “Ekiro kimwe nkaza omu kitanda naashaba, ndikweshengyereza Yehova kugarura tata omuka.”

Omu kushoberwa oku, Jeremy akatandika kushoma Baibuli ye. Ku yaareebire Zaaburi 10:14, ekamuhiga munonga. Omushororongo ogwo nigugamba ahari Yehova guti: “Omuntu enshoberwa ayeta omu mikono yaawe, ahakuba niiwe oshangwa oba omuhwezi w’efuuzi.” Jeremy naagira ati: “Okaba nooshusha ngu Ruhanga ariyo naagamba naanye arikumanyisa ngu niwe muhwezi wangye, kandi Tata. Tihariho omuzaire orikubaasa kukira Yehova.”

YAABA ori omu mbeera nk’eya Jeremy nari ngaaha, Baibuli neeyoreka ngu Yehova naayenda ngu obe munywani we. Nangwa Baibuli neegira eti: “Mwirire haihi Ruhanga, nawe abone kubairira haihi.” (Yakobo 4:8) Teekateeka aha makuru g’ebigambo ebyo: N’obu oraabe otarikubaasa kureeba Yehova Ruhanga, kandi ti w’orwingano rwawe, kwonka naakweta kuba munywani we!

Kwonka okugira omukago na Ruhanga nikikwetengyesa okutamu amaani. Nk’eky’okureeberaho, waaba oine ekimera ky’omu nju nooba noomanya ngu tikirikubaasa kukura kitaine buhwezi. Ekimera ekyo kubaasa kukura gye, oine kukyitirira butoosha, kandi okakita omu mwanya ogu kirikubaasa kukuriramu gye. Nikyo kimwe n’okuba munywani wa Ruhanga. Noobaasa kukora ki kureetera obunywani obu kukura?

Obukuru bw’Okweyegyesa

Obunywani nibwetengyesa okuhurizana kurabira omu kugamba n’okuhurikiza. Nikyo kimwe n’okuba munywani wa Ruhanga. Okushoma Baibuli n’okugyega nigwo muringo ogu turikuhuriramu eki Ruhanga arikugamba.—Zaaburi 1:2, 3.

N’amazima, noobaasa kuba otarikukunda okweyegyesa. Eminyeeto abaingi n’obwo baareeba tiivi, baazaana emizaano, nari baaza omuri banywani baabo omu mwanya gw’okweyegyesa. Kwonka ku oraabe nooyenda kugira omukago murungi na Ruhanga, oine kweyegyesa. Oine kumuhurikiza orikwega Ekigambo kye.

Kwonka otatiina. Okwega Baibuli tigushemereire kuba omugugu. Noobaasa kwega kukunda kweyegyesa, n’obu oraabe nooyereeba nk’otari mwegi murungi. Ekintu ky’okubanza eki oine kukora, n’okutaho obwire bw’okweyegyesa Baibuli. “Nyine engyenderwaho,” nikwo omwishiki orikwetwa Lais arikugira. “Buri kasheeshe nimbanza kushoma eshuura emwe ya Baibuli.” Maria, ow’emyaka 15, aine entebeekanisa y’omutaano. Naagira ati: “Ninshoma Baibuli kakye buri kiro ndikuza kubyama.”

Kubaasa kutandika kweyegyesa Baibuli, reeba  akabokusi aha rupapura 292. Reero ahansi, handiikaho obwire obu orikubaasa kumara edakiika 30 nari n’okurengamu orikwega Ekigambo kya Ruhanga.

․․․․․

Okutaho entebeekanisa n’entandikiro. Waatandika kushoma, noobaasa kureeba amazima ngu okushoma Baibuli butoosha ti kyorobi. Noobaasa kwikirizana na Jezreel ow’emyaka 11, owaagambiise amazima ati: “Ebicweka bimwe ebya Baibuli nibyetengyesa okutaho omutima kubaasa kubyetegyereza, kandi tibirikushemeza munonga.” Ku oraabe nikwo orikwehurira, otahanika. Reeba okushoma Baibuli nk’obwire bw’okugamba na Yehova Ruhanga munywani waawe n’okumuhurikiza. Waagumizamu, okwega Baibuli nikwija kushemeza kandi kurugyemu ebirungi!

Okushaba ni Kukuru

Omu kushaba nooba noogambira Ruhanga. Okushaba ka n’ekiconco ky’omuhendo! Noobaasa kushaba Yehova Ruhanga ahu waayendera ekiro n’eihangwe. Butoosha naayesigwa. Okukira munonga, naayenda kuhurira eki orikugamba. Niyo nshonga ahabw’enki Baibuli neetwehanangiriza eti: “Omuri byona mumanyise Ruhanga ebi murikwetenga omu kushaba n’okweshengyereza, kandi musiime.”—Abafilipi 4:6.

Nk’oku ekyahandiikirwe ekyo kirikworeka, hariho ebintu bingi ebi orikubaasa kugambira Yehova. Ebi nibibaasa kutwariramu oburemeezi n’okwerarikirira. Nibibaasa n’okutwariramu ebintu ebi orikusiimira Ruhanga. Mbwenu shi buzima, torikweshanga orikusiima banywani baawe ahabw’ebintu birungi ebi barikukukorera? Na Yehova oshemeire kumusiima, akukoreire bingi kukira abanywani boona abu oragizireho.—Zaaburi 106:1.

Ahaifo, handiikaho ebintu ebi orikusiimira Yehova.

․․․․․

Hatariho kubangaanisa obumwe n’obumwe nooba oine obwoba n’okwerarikirira. Zaaburi 55:22 neegira eti: ‘Yegyekyera [Yehova] omutwaro gwawe, nawe naija kuguma naakukwatirira, tarikwija kwikiriza ohikiriire kutengyetsibwa.’

Ahaifo, handiikaho ebirikukwerarikiriza ebi orikwenda kuta omu kushaba.

․․․․․

Ebikuhikireho

Hariho ekindi kintu ekirikukwata aha bunywani bwawe na Ruhanga eki otaine kwehuzya. Omuhandiiki wa Zaaburi akahandiika ati: “Nimuroze, mureebe [Yehova] ku ari murungi.” (Zaaburi 34:8) Obu Daudi yaahimba Zaaburi eya 34, akaba arugire kuhikwaho ebirikutiinisa. Akaba ahungire Omugabe Saulo omwinazi, kandi buzima eki kikaba nikitiinisa. Kwonka akahungira omu bazigu be Abafilistia. Ku yaareebire ngu amagara ge gari omu kabi, omu muringo gw’obwengye akeegwisa eiraro kandi ekyo kikamukiza.—1 Samueli 21:10-15.

Daudi okucungurwa kwe tarakwebariire. Kureka, akakubarira Yehova. Omu zaaburi eyaagambwaho aha ruguru, akahandiika ati: “Nkasherura [Yehova], yaangarukamu, yankiza ebyabaire nibintiinisa byona.” (Zaaburi 34:4) N’ahabw’ekyo, ebyahikire ahari Daudi bikamureetera kuhiga abandi ngu “nimuroze, mureebe [Yehova] ku ari murungi.” *

Noobaasa kwijuka ekyakuhikireho ekyayorekire ngu Yehova naakufaho? Kyaba nikwo kiri, kihandiikye ahaifo. Obuhabuzi: Tikirikwetengyesa ngu ekyakuhikireho kibe kiri eky’amaani munonga. Teeraho kuteekateeka aha migisha ei orikutunga buri izooba, n’egyo ei orikubaasa kukwata eijaga.

․․․․․

Obundi abazaire baawe nibo baakwegyeise Baibuli. Ku kiraabe nikwo kiri, ogwo n’omugisha. Kwonka, oine kwegirira omukago ogwawe na Ruhanga. Ku oraabe otakakikozire, noobaasa kukoresa ebiri omu ishomo eri kutandika. Yehova naija kukuha omugisha ahabw’okuteeraho kwawe. Baibuli neegira ngu ‘mugumizemu nimushaba, nimwija kuheebwa, mugumizemu nimusherura, nimwija kuzoora.’—Matayo 7:7.

SHOMA EBIRIKUKIRAHO AHA NSHONGA EGI OMU KATABO 1, ESHUURA 38 NA 39

OMU SHUURA ERIKUKURATAHO

Noogumirwa kugambira abandi ahari Ruhanga? Yega oku orikubaasa kujuririra enyikiriza zaawe.

[Obugambo obw’Ahansi]

EKYAHANDIIKIRWE KIKURU

“Baine [okushemererwa abarikufayo aha kyetengo kyabo eky’eby’omwoyo.]”—Matayo 5:3.

OKUHABURA

Waashoma empapura ina buri izooba, noija kuheza kushoma Baibuli yoona nk’omu mwaka gumwe.

EKI WAABA NOOKIMANYA . . ?

Obu oriyo nooshoma ekitabo eki kandi orikugyendera aha buhabuzi oburimu oburikwegamira aha Baibuli nikyoreka ngu Yehova naakufaho.—Yohaana 6:44.

EKI ORAAKORE!

Kubaasa kugasirwa omu kweyegyesa Baibuli, ninyija ․․․․․

Kubaasa kuguma ninshaba obutoosha, ninyija ․․․․․

Eki ndikwenda kubuuza abazaire bangye aha nshonga egi ni ․․․․․

NOOTEEKATEEKA KI?

● Noobaasa kureetera ota okweyegyesa Baibuli kuba okurikushemeza?

● Ahabw’enki Yehova naayenda kuhurira okushaba kw’abantu abatahikiriire?

● Noobaasa kuboneza ota omuringo ogu orikushabamu?

[Ebigambo ebitoorainwe aha rupapura 291]

Obu naabaire ndi muto, nkaba ningarukagaruka omu kushaba kwangye. Hati niinteeraho kushaba aha bikwatiraine n’ebintu birungi n’ebibi ebya buri izooba. Obu hatariho ebiro bibiri ebirikushushana, eki nikimpwera kutaguma ningamba ebigambo nibyo bimwe.”​—Eve

[Akabokusi/​Ekishushani]

 Shwijuma Baibuli Yaawe

1. Toorana ekicweka kya Baibuli eki orikwenda kushoma. Shaba obwengye kukyetegyereza.

2. Ekicweka ekyo kishome n’obwegyendesereza. Yetware waaba nooshoma. Waaba nooshoma, teera akashushani. Teeraho kwetegyereza ebi orikushoma nk’oku kirikubaasika: Teeraho kureeba ekyabaireho, kuhurira amaraka g’abarikugambwaho, kukaga omwoya, kuroza aha by’okurya, n’ebindi. Teeraho kweta omu mbeera z’omuntu ou orikushomaho!

3. Teekateeka aha bi waaheza kushoma. Yebuuze ebibuuzo nk’ebi:

● Ahabw’enki Yehova yaataire ekicweka eki omu Kigambo kye?

● Ni bantu ki abu nyine kutooreza, kandi ni baahi abari eky’okureeberaho ky’okurabura?

● Ni mashomo ki agu ndikubaasa kwega omu kushoma oku?

● Ebi naashoma nibinyegyesa ki ahari Yehova n’omuringo ogu arikukoramu ebintu?

4. Shaba Yehova omu bugufu. Mugambire ebi waayega omu kweyegyesa Baibuli, n’oku orikwenda kugyendera aha bi waayega. Butoosha siima Yehova ahabw’ekiconco eki akuhaire, Ekigambo kye Baibuli Erikwera!

[Ekishushani]

‘Ekigambo kyawe n’etabaaza erikumurikira ebigyere byangye n’omushana ogurikujwera omuhanda gwangye.’—Zaaburi 119:105.

[Akabokusi/​Ekishushani]

Yebeembeza Ebikuru

Toine bwire bw’okushaba? Toine bwire bw’okwega Baibuli? Obwire obwingi eki nikirugiirira aha bi orikwebembeza.

Teeraho kukora eki: Kwata ebaketi, otemu amabaare mahango. Bwanyima oyongyeremu omusheenyi, ogwijuze aha mutwe. Hati oine ebaketi eijwire amabaare n’omusheenyi.

Amabaare n’omusheenyi bishukye ahansi. Hati omu baketi baanzamu omusheenyi, bwanyima okuratseho amabaare. Amabaare gaayanga kuhikamu. Noomanya ahabw’enki? N’ahabw’okugira ngu omu baketi waabanzamu omusheenyi.

Enshonga n’eha? Baibuli neegira eti: ‘Mumanye ebirikukira [obukuru].’ (Abafilipi 1:10) Waata ebitari bikuru omu mwanya gw’okubanza, nk’okweshemeza, torikwija kutunga obwire burikumara obw’okukora ebintu ebikuru nibyo eby’omwoyo. Kwonka waakuratira obuhabuzi bwa Baibuli, noija kushanga oine obwire bw’okwebembeza eby’Obukama n’obwire bukye bw’eby’okweshemeza. Nikirugiirira aha ki oraabanze omu baketi!

[Ekishushani]

Nk’ekimera ky’omu nju, obunywani na Ruhanga nibwetengyesa kureebererwa kubaasa kukura