Obu omwaka 2023 gurikutandika, twena twine amatsiko g’ebirungi n’ab’amaka gaitu. Ahabw’enki turikubaasa kugira amatsiko aga?

 Baibuli erimu amakuru marungi ngu oburemeezi oburiho hati ti bw’obutwire, kandi ngu buri haihi kwihwaho. Nangwa, ebiri omu Baibuli ‘bikahandiikwa kutwegyesa, ngu tubone kugira amatsiko ahabw’okuhuumurizibwa Ebyahandiikirwe ebyo.’—Abarooma 15:4.

•   Okwega ebirikukiraho aha bi Baibuli erikuraganisa, reeba ekicweka, “Amatsiko Genyini Aga Nyentsya Nungi.”

 Amatsiko ga Baibuli gari “nk’ekitsibo ky’amagara” nari enanga y’amagara gaitu. (Abaheburaayo 6:19) Amatsiko aga nigabaasa kutuhamya. Nigabaasa kutuhwera kwemera oburemeezi oburiho hati, kugira emiteekateekyere mirungi, n’okugira okushemererwa okw’obutwire. Nk’eky’okureeberaho:

•   Yetegyereze oku amatsiko ga Baibuli gaahweraire omushaija awaabaire aremiirweho omuze ogugumire eicwa. Reeba vidiyo Nkahitsya Obwire Naatamwa Emitwarize Yangye.

•   Reeba oku amatsiko ga Baibuli garikubaasa kutuhwera twafeerwa omukundwa. Reeba vidiyo Okuhuumuriza Abarikuganya.

 Abantu baingi nibaba baine amatsiko ngu nihaija kubaho ebirungi, kwonka nibaba batarikuhamya yaaba amatsiko gaabo nigaija kuhikiirira. Ebi Baibuli erikuraganisa n’eby’omutaano. Ahabw’enki? Ahabw’okugira ngu ebi Baibuli erikuraganisa nibiruga ahari Yehova Ruhanga a, ‘otarikubaasa kubeiha.’ (Tito 1:2) Yehova wenka niwe aine amaani g’okuhikiiriza ebi arikuraganisa, ahakuba naabaasa ‘kukora kyona eki arikukunda.’—Zaaburi 135:5, 6.

 Nitukuhiga n’omuhimbo kugasirwa omu amatsiko ga Baibuli agarikwesigwa. Noobaasa kwongyera kwesiga Baibuli, ‘orikushwijuma [gye] ebyahandiikirwe.’ (Ebyakozirwe 17:11) Yetungire amazima orikuteeraho kwejumba omu mushomo gwaitu gw’okwegyesa abantu Baibuli batashashwire. Tandika 2023 oine amatsiko g’ebirungi!