Ahéʼéskéhígíí éí hooghan łaʼ nááhástʼą́ągo ánááyiiłʼįįh. Nimá dóó nizhéʼé éí ayóóʼííníʼní dóó nił nilı̨́įgo ahoolʼá. Ákondi kʼad éí nichʼooní nahasdzáán bikáaʼgi aláahdi nił nilı̨́įgo baa nitsíníkees. Díí shı̨́ı̨́ nikʼéí łáʼ bá ndanitłʼa doo. Nikʼéí hazhóʼó bił kʼé ahidíʼníigi dóó nichʼooní iiná bił háíníłtʼiʼgi Diyin Bizaad binahjįʼ naʼnitinígíí yee nihíká análwoʼ doo.

DIYIN BIZAAD KÓNÍ: “Nizhéʼé índa nimá nił nilı̨́įgo íínísin.” (Ephesians 6:2) Díkwíí shı̨́ı̨́ ninááhai ndi, nimá dóó nizhéʼé éí tʼáá áłahjįʼ nił nilı̨́įgo íínísin doo. Éí bąą nichʼooní díí bá baa ákonínízin bí ałdóʼ ayeʼ doodaiiʼ ayáázh nilı̨́, atsiʼ doodaiiʼ achʼéʼé nilı̨́. Bimá dóó bizhéʼé yíká adoolwołgi ałdóʼ yaa nitsíkees doo. Áko éí biniinaa tʼáadoo bikʼee haada nítʼéhé, háálá “ayóóʼóʼóʼníinii éí doo oołchʼı̨́įd da.”​—1 Corinthians 13:4; Galatians 5:26.

DÍÍ BIKʼEH ÁDÍÍNÍÍŁ:

• “Nikʼéí éí tʼáá áłahjįʼ kónítʼé dashiłníi łeh” doodaiiʼ “éʼéshʼı̨́įgi nimá tʼáá áko doo bił yáʼátʼéeh da łeh” tʼáadoo diníní

• Nichʼooní tʼáadoo leʼé bídę́ęʼgo yinéłʼínígíí hazhóʼó bá baa ákonínízin

DIYIN BIZAAD KÓNÍ: “Éí bąą diné jílíinii hazhéʼé índa hamá bitsʼą́ą́ʼ dashdidoogáałgo hweʼasdzą́ą́ tʼéiyá bił jiináa doo, áko nizhdiltʼé yę́ę atsʼíís tʼááłáʼí jileeh.” (Genesis 2:24) Asíníyehgo, nimá dóó nizhéʼé tʼahdii yeeʼ naaʼáhwiilyą́ nízin łeh, dóó kótʼéego yeeʼ níi łeh.

Ákondi nichʼooní bił ahísółkéegi bee nihíhólnííh. Amá dóó azhéʼé anáhiʼniilchéeh doo nízinígi bee ahaʼdidoohtʼááł, áádóó ayóóʼóʼóʼní bee bił ííshjání ádoohłííł. Hazhóʼó bee bichʼįʼ hadoohdzih, tʼáá naʼníleʼdii éí dooda. (Proverbs 15:1) Aʼohgo ahaa nitsáhákeesgo, aa aʼááh hwiindzingo, dóó haʼahóní bee hazhóʼó nikʼéí bił kʼé daʼahidíʼníigo íidoolííł. Áádóó ałdóʼ ‘ałchįʼ hadaʼíínółníigo ayóóʼádaʼahíínóhʼní.’​—Ephesians 4:2.

DÍÍ BIKʼEH ÁDÍÍNÍÍŁ:

• Ahísółkéegi nikʼéí kótʼéego yeeʼ daanínígíí bąąh níniʼgo, hazhóʼó nihá hooʼaʼ góneʼ nichʼooní bił baa nídíítʼįįł

• Nihikʼéí bił kʼé íínóhsin doogi bee ahaʼdidoohtʼááł