THUTO 16

Ke Dilo Dife Tšeo Jesu a Ilego a di Dira ge a be a le mo Lefaseng?

BAPALA

Batho ba bantši ba nagana gore Jesu e be e no ba leseana leo le bego le le ka gare ga legopo, moporofeta yo bohlale, goba monna yoo a kilego a hwela batho. Eupša thutong ye, re tlo kwa ka mo go oketšegilego gore bophelo bja Jesu bja mo lefaseng bo be bo le bjang. E bile re tlo ithuta tše dingwe tša dilo tše bohlokwa kudu tšeo a ilego a di dira, le kamoo di ka go thušago ka gona.

1. Mošomo wa Jesu o mogolo e be e le ofe?

Mošomo o mogolo wa Jesu e be e le “go bolela ditaba tše dibotse tša Mmušo wa Modimo.” (Bala Luka 4:43.) O be a bolela ditaba tše dibotse tša gore Modimo o tlo hloma mmušo woo o tlago go fediša mathata a batho ka moka. a Jesu o ile a šoma ka thata gore a botše batho molaetša wo wa Modimo ka mengwaga e meraro le seripa.—Mateo 9:35.

2. Ke ka baka la eng Jesu a be a dira mehlolo?

Beibele e re botša ka ‘mediro e mentši e matla le ka dika le dipontšho tšeo Modimo a di dirilego a diriša Jesu.’ (Ditiro 2:22) Modimo o ile a fa Jesu matla a gore a laole ledimo, a fepe batho ba bantši, a fodiše batho bao ba babjago le go tsoša bahu. (Mateo 8:23-27; 14:15-21; 14:15-21; Mareka 6:56; Luka 7:11-17) Mehlolo yeo Jesu a ilego a e dira e be e bontšha gabotse gore o be a romilwe ke Modimo. Le gona e be e bontšha gore Jehofa o na le matla a gore a fediše mathata a rena ka moka.

3. Re ithuta eng tseleng yeo Jesu a bego a phela ka yona?

Jesu o be a ekwa Jehofa dilong ka moka. (Bala Johane 8:29.) O ile a dira dilo ka moka tšeo Tatagwe a bego a mo kgopetše gore a di dire. O dirile seo bophelo bja gagwe ka moka le ge batho ba bantši ba be ba leka go mo thibela. O ile a bontšha gore go a kgonega gore re dire dilo tšeo Modimo a di nyakago le ge go le boima. Ka go dira bjalo, o re tlogeletše ‘mohlala gore re latele dikgato tša gagwe kgauswi.’—1 Petro 2:21.

ITHUTE KA MO GO TSENELETŠEGO

Ekwa kamoo Jesu a ilego a ruta batho ditaba tše dibotse ka gona gomme o kwe le mehlolo yeo a e dirilego.

4. Jesu o ile a botša batho ditaba tše dibotse

Jesu o be a sepela maeto a matelele ditseleng tšeo di nago le marole a tšama a ruta batho ba bantši kudu ditaba tše dibotse. Balang Luka 8:1, gomme le boledišaneng ka dipotšišo tše di latelago:

Na Jesu o be a bolela ditaba tše dibotse feela go batho bao ba bego ba etla go mo theetša?
Jesu o be a dira’ng gore a kgone go hwetša batho bao a ka ba botšago ditaba tše dibotse?

Modimo o ile a bolela e sa le pele gore Mesia o be a tlo botša batho ditaba tše dibotse. Balang Jesaya 61:1, 2, gomme le boledišaneng ka dipotšišo tše di latelago:

Jesu o ile a phethagatša bjang boporofeta bjo?
Na o nagana gore lehono batho ba hloka go kwa ditaba tše tše dibotse?

5. Jesu o ile a ruta batho dithuto tše bohlokwa

Jesu o be a ruta batho ditaba tše dibotse tša Mmušo wa Modimo e bile a ba ruta le dithuto tše bohlokwa tšeo ba ka di dirišago maphelong a bona. Ekwa tše dingwe tša dithuto tša gagwe tša thabeng tšeo di tumilego kudu. Balang Mateo 6:14, 34 le 7:12, gomme le boledišaneng ka dipotšišo tše di latelago:

Ke dikeletšo dife tše bohlokwa tšeo Jesu a re fago tšona mo ditemaneng tše?
Na o nagana gore dikeletšo tše le rena di ka re thuša lehono?

6. Jesu o ile a dira mehlolo

Jehofa o ile a fa Jesu matla a gore a dire mehlolo e mentši. E le gore le kwe ka o mongwe wa mehlolo yeo, balang Mareka 5:25-34 goba le bapaleng BIDIO ye. Ke moka le boledišaneng ka dipotšišo tše di latelago:

BIDIO: Mosadi yo a Babjago o a Fodišwa (5:10)

Mosadi yo a babjago mo bidiong ye, o be a na le tumelo ya go re’ng?
Ke’ng seo o se ratago ka mohlolo wo?

Balang Johane 5:36, gomme le boledišaneng ka potšišo e latelago:

Mehlolo yeo Jesu a ilego a e dira e be e “hlatsela” eng, goba e bontšha eng ka yena?

Na o be o tseba?

Dilo tše dintši tšeo re di tsebago ka Jesu di tšwa ka Diebangeding tše nne tša Beibele, e lego Mateo, Mareka, Luka, le Johane. Bangwadi ba Diebangedi tše ba hlalosa bophelo bja Jesu ka ditsela tša go fapafapana. Dipuku tše di re thuša go bona ka leihlo la kgopolo gore Jesu o be a phela bjang ge a be a le mo lefaseng.

MATEO

ke yena a thomilego go ngwala Ebangedi ya gagwe. E bolela kudu ka dithuto tša Jesu, kudukudu dilo tšeo Jesu a di rutilego ka Mmušo wa Modimo.
MAREKA

yena o ngwadile Ebangedi e nyenyane. E bolela ka dilo tše dintši tšeo di kgahlišago.
LUKA

o bolela kamoo Jesu a bego a tšea thapelo e le bohlokwa ka gona le tsela yeo a bego a swara basadi ka yona.
JOHANE

o re botša ka dilo tše dintši tšeo Jesu a di boletšego ge a be a na le bagwera ba gagwe ba bagolo le batho ba bangwe. Se se re thuša go bona gore Jesu ke motho wa mohuta mang.