Sephiri 3

Dula o E-na le Moya wa go Leboga

KE ENG SEO BEIBELE E SE RUTAGO? “Le lebogeng mabapi le se sengwe le se sengwe.”—1 Bathesalonika 5:18.

GO NA LE TLHOHLO EFE? Re dikologilwe ke batho ba go ikgantšha le ba go se leboge, e lego dika tšeo di ka re fetelago. (2 Timotheo 3:1, 2) Go tlaleletša moo, re ka kwa re gapeletšega go oketša mediro e mengwe e mentši maphelong a rena ao a šetšego a e-na le mediro e mentši. Re ka imelwa ke mathata goba ra swarega kudu ka go phegelela dinyakwa tša rena, moo e lego gore ga re sa ba le nako ya go thabela seo re šetšego re e-na le sona goba go leboga seo ba bangwe ba re direlago sona.

O KA DIRA’NG? Iphe nako ya go naganišiša ka dilo tše dibotse tšeo o di thabelago gona bjale. Ke therešo gore o ka ikwa o imelwa ke mathata. Eupša ela hloko mohlala wa Kgoši Dafida. Ka dinako tše dingwe o be a ikwa a gateletšegile, pelo ya gagwe e hwile bogatšu ka baka la diteko. Lega go le bjalo, o ile a rapela Modimo a re: “Ke êlêlwa tšohle O kilexo wa di dira; ke xopola medirô ya ’atla tša xaxo.” (Psalme 143:3-5) Go sa šetšwe diteko tša gagwe, Dafida o ile a dula a e-na le moya wa go leboga gomme a dula a kgotsofetše.

Nagana ka seo ba bangwe ba ilego ba se dira bakeng sa go go thuša, gomme o bontšhe go leboga maiteko a bona. Jesu o beile mohlala o mobotse tabeng ye. Ka mohlala, ge mogwera wa gagwe Maria a be a mo tšhela hlogong le maotong ka makhura a theko e kgolo, ba bangwe ba ile ba botšiša gore: “Ke ka baka la’ng makhura a a monko o mobose a sentšwe?” * Baswaya-diphošo bao ba be ba nagana gore makhura ao a ka be a rekišitšwe gomme tšhelete ye e hwetšwago ya newa badiidi. Jesu o ile a ba fetola a re: “Mo tlogeleng. Ke ka baka la’ng le leka go mo tshwenya?” Ke moka o ile a tlaleletša ka gore: “O dirile se a ka se kgonago.” (Mareka 14:3-8; Johane 12:3) Go e na le go lebiša tlhokomelo go seo Maria a sa kago a se dira, Jesu o ile a leboga seo a se dirilego.

Ba bangwe ba leboga lapa, bagwera goba ditšhegofatšo tše dingwe tšeo ba nago le tšona feela ka morago ga ge ba sa hlwe ba e-na le tšona. O ka efoga dipoelo tšeo tše sa kgahlišego ka go nagana ka dilo tše dibotse tšeo o nago le tšona ga bjale! Ke ka baka la’ng o sa nagane goba go ngwala lelokelelo la dilo tšeo o di lebogago?

Ka ge “mpho e nngwe le e nngwe e botse” e e-tšwa go Modimo, re dira gabotse ge re mo leboga ka thapelo. (Jakobo 1:17) Go dira bjalo ka mehla go tla re thuša go boloka moya wa go leboga le go hlagolela kgotsofalo.—Bafilipi 4:6, 7.

[Mongwalo wa tlase]

[Seswantšho go letlakala 6]

Na o leboga seo ba bangwe ba go direlago sona?