RE PHELA lefaseng leo le nago le madumedi a mantši a fapa-fapanego. Nyakišišo e nngwe ya morago-bjale e utollotše gore go na le madumedi a 19 a magolo le a e ka bago a 10 000 a manyenyane lefaseng ka bophara. Phapano ye e dira gore batho ba bolawe ke go kgetha madumedi. Ka gona, na go na le taba gore o kgetha bodumedi bofe?

Batho ba bangwe ba bolela gore madumedi a fapa-fapanego a swana le ditsela tše dintši tša go namela thaba. Go bona, ga go na taba gore ba kgetha tsela efe, ka ge ditsela ka moka di lebile lefelong le tee. Ba bea mabaka ka gore go na le Modimo o tee yo e lego Ramatla-ohle, ka gona madumedi ka moka a swanetše go ba a lebiša go yena.

Jesu Kriste, yo mongwe wa barutiši ba hlomphegago kudu ba bodumedi historing ya batho, o re’ng ka taba ye? O boditše barutiwa ba gagwe gore: “Tsênang ka kxôrô e pitlaxanexo.” Ka baka la’ng? “Xobane kxôrô e išaxo tahlexong ké pêtlêkê, le tsela ye e yaxo xôna e phatlaletše; ’me ba ba tsênaxo ka yôna ké ba bantši. Xobane kxôrô e išaxo bophelong e pitlaxane; le tsela ye e yaxo xôna ké e thsêsê; ’me ba ba e bônaxo xa ba nene.”—Mateo 7:13, 14, Beibele ya Sepedi.

Na ruri Jesu o be a e-ra gore madumedi a mangwe a iša “tahlexong”? Goba na o be a ruta gore ke ba sa dumelego feela ba lego tseleng e petleke, mola bao ba dumelago go Modimo—go sa šetšwe gore ba bodumeding bofe—ba le tseleng e tshesane e išago bophelong?

Gatee-tee ka morago ga go bolela gore go na le ditsela tše pedi, Jesu o itše: “Itoteng baporofeteng ba maaka, ba ba tlago go lena ba apere dikobo tša dinku, eupša ka teng e le diphiri tše di gagolago.” (Mateo 7:15, PK) Ka morago o ile a bolela gore: “Mmušong wa maxodimo xo ka se kê xwa tsêna bao bohle, ba e rexo xe ba ra Nna, ba re: Morêna! Morêna! Xo tlo tsêna ba ba  diraxo thatô ya Tate wa maxodimong.” (Mateo 7:21, Beibele ya Sepedi) Ge e ba motho a bitšwa moporofeta goba a bolela gore Jesu ke “Morêna” wa gagwe, ke mo go kwagalago go bolela gore motho yoo ke wa bodumedi, e sego yo a hlokago tumelo. Ka gona, go molaleng gore Jesu o be a lemoša gore ga se madumedi ka moka a lokilego goba gore ga se ra swanela go bota barutiši ba bodumedi ka moka.

Ka ge ditsela ka moka di sa lebiše go Modimo, o ka hwetša bjang tsela e išago bophelong gare ga ditsela tše tše dikete? Ela hloko papišo ye: Akanya o timetše ka gare ga toropo e kgolo. O dira phetho ya go kgopela thušo. Motho yo mongwe ka kgodišego o go botša gore o ye bohlabela. Yo mongwe o go botša gore o ye bodikela. Lega go le bjalo, yo mongwe o go kgothaletša gore o tšee tsela e nngwe le e nngwe yeo o kwago o nyaka go e tšea. Mafelelong, yo o sepelago le yena o ntšha mmapa wo o ka botwago gomme o go bontšha tsela e nepagetšego. Ke moka o go nea mmapa woo e le gore o ka fela o o lebelela ge o le tseleng. Na o be o ka se ikwe o kgodišegile gore o tla fihla moo o yago?

Ka tsela e swanago, ge go tliwa go kgetheng tsela e lokilego ya bodumedi, re swanetše go ba le mmapa o ka botwago wa moya. Na mmapa o bjalo o gona? Ee, o gona. Mmapa woo ke Beibele, yeo e bolelago gore: “Lengwalo ka moka le buduletšwe ke Modimo, gomme le loketše go ruta, le go kgodiša, le go lokiša, le go godišetša go lokeng.”—2 Timotheo 3:16, PK.

O ka ba o e-na le Beibele ya segageno yeo o ka e dirišago e le mmapa wa tsela ya moya. Bagatiši ba makasine wo, Dihlatse tša Jehofa, ba tšweletša phetolelo e ka botwago ya Beibele yeo e tsebjago e le New World Translation of the Holy Scriptures. Lega go le bjalo, ge e ba o se yo mongwe wa Dihlatse tša Jehofa, o ka bona go le kaone go diriša phetolelo e nngwe ge o tsitsinkela taba ya mabapi le go bona bodumedi bjo bo lokilego le bjo bo sa lokago. Ka baka leo, lelokelelo le la dihlogo le tsopola diphetolelong tše mmalwa tša Beibele tšeo di hlompšhago kudu ke madumedi a mangwe.

Ge o dutše o bala dihlogo tše di latelago, bapetša seo o se tsebago le seo Beibele e se bolelago. Dula o gopola mantšu a Jesu a mabapi le kamoo re ka kgethologanyago bodumedi bjo bo lokilego le bjo bo sa lokago. O itše: “Sehlare se se botse . . . ké sôna se enywaxo dienywa tše di botse. ’Me sehlare se se sa tsebalexexo se enywa dienywa tše mpe. Sehlare se botse xa se kxône xo enywa dienywa tše mpe; le sehlare se se sa tsebalexexo xa se kxône xo enywa dienywa tše botse.” (Mateo 7:17, 18, Beibele ya Sepedi) Ela hloko tše tharo feela tša dienywa tše botse tšeo Beibele e rego di tla bonagatša “sehlare se se botse.”