Babadi ba Rena ba a Botšiša

Ke ka Baka La’ng Dihlatse tša Jehofa di sa ye Ntweng?

Kae le kae moo Dihlatse tša Jehofa di dulago gona, di tsebja go tloga kgale ka go se tšee karolo ntweng e šoro magareng ga ditšhaba goba magareng ga batho ba lwantšhanago setšhabeng se tee. Nywageng e 50 e fetilego, Australian Encyclopædia e boletše gore: “Dihlatse tša Jehofa di kgomarela boema-gare ka go tia nakong ya ntwa.”

Lebaka le legolo leo ka lona Dihlatse tša Jehofa di sa tšeego karolo ntweng, ke gore go dira bjalo go tla senya matswalo a tšona a Bokriste. Matswalo a tšona a tlwaeditšwe ka ditaelo le mohlala wa Morena Jesu Kriste. O laetše balatedi ba gagwe gore ba rate baagišani ba bona. Le gona, o laetše gore: “Tšwelang pele le rata manaba a lena, le dira botse go bao ba le hloilego.” (Luka 6:27; Mateo 22:39) Ge yo mongwe wa barutiwa ba gagwe a leka go mo šireletša ka tšhoša, Jesu o ile a mmotša gore: “Bušetša tšhoša ya gago lefelong la yona, gobane bohle bao ba tšeago tšhoša ba tla bolawa ka tšhoša.” (Mateo 26:52) Ka gona, ka seo a se boletšego le ka mohlala wa gagwe, o bontšhitše gabotse gore balatedi ba gagwe ga se ba swanela go diriša dibetša tša ntwa e šoro.

Lebaka le lengwe leo ka lona Dihlatse tša Jehofa di sa yego ntweng ke ka gobane ke ditho tša sehlopha sa lefase ka bophara sa badumedi. Ntwa e tla dira gore barwarre ba lwe gomme seo se be se tla ba kgahlanong le taelo ya Jesu ya gore ‘ba ratane.’—Johane 13:35.

Melao ya motheo yeo e lego ka mo godimo yeo e laolago lerato ga se feela selo seo Dihlatse tša Jehofa di se bolelago. Ka mohlala, ela hloko boemo bjoo di ilego tša bo tšea nakong ya Ntwa ya II ya Lefase ka 1939-1945. Kua United States, Dihlatse tša Jehofa tše fetago 4 300 di ile tša išwa dikgolegong tša mmušo ka baka la go gana go tšea karolo ntweng. Kua Brithania, Dihlatse tše fetago 1 500, tšeo di akaretšago basadi ba fetago 300, di ile tša golegwa ka baka la go gana go ya ntweng. Kua Jeremane ya Manazi, Dihlatse tše fetago 270 di ile tša bolawa ke Mmušo ka baka la go gana ga tšona go tšea karolo ntweng. Ka tlase ga mmušo wa Manazi, Dihlatse tše fetago 10 000 di ile tša golegwa, e ka ba e le dikgolegong goba dikampeng tša tshwenyo. Dihlatse tša kua Japane le tšona di ile tša tlaišwa o šoro. Batho le ge e le bafe bao ba lahlegetšwego ke baratiwa ba bona Ntweng ya II ya Lefase—goba ntweng le ge e le efe yeo e ilego ya latela—ba ka kgonthišega gore ga go le o tee wa Dihlatse tša Jehofa yo a ikarabelago ka mahu ao.

Pono yeo Dihlatse tša Jehofa di nago le yona ka ntwa e hlaloswa gabotse ke mantšu a mafelelo a Wolfgang Kusserow. Ka 1942, Manazi a ile a bolaya Mojeremane yo wa nywaga e 20 ka go mo kgaola hlogo ka gobane a ganne go ya ntweng. (Jesaya 2:4) O ile a botša kgoro ya tsheko ya mašole gore: “Ke godišitšwe ke le yo mongwe wa Dihlatse tša Jehofa go ya ka lentšu la Modimo leo le lego ka Mangwalong a Makgethwa. Molao o mogolo kudu le o mokgethwa kudu woo a o neilego batho ke o rego: ‘O swanetše go rata Modimo wa gago go feta selo le ge e le sefe gomme o rate moagišani wa gago bjalo ka ge o ithata.’ Taelo e nngwe e balega ka gore: ‘O se kê wa bolaya.’ Na Mmopi wa rena o ngwaletše dihlare ditaelo tše ka moka?”—Mareka 12:29-31; Ekisodo 20:13.

Dihlatse tša Jehofa di dumela gore ke Jehofa feela, Modimo yo matla-ohle, yo a tlago go tliša khutšo ya ka mo go sa felego mo lefaseng. Di lebelela go yena gore a phethagatše kholofetšo ya gagwe ya gore o tla ‘fediša dintwa go fihla mafelelong a lefase.’—Psalme 46:9.