Batho ba bantši ba re ba dumela go Modimo. Eupša ge o ka ba botšiša gore Modimo ke mang, ba tlo go nea dikarabo tše di sa swanego. Ba bangwe ba re Modimo o sehlogo le gore o dula a otla batho ge ba dira dibe. Ba bangwe ba re go sa šetšwe seo ba se dirago, Modimo o tla dula a ba rata le go ba lebalela dibe tša bona. Ba bangwe ba nagana gore Modimo o kgole kudu le rena le gore ga a na taba le rena. Ka baka la dikgopolo tše tšeo di sa swanego, batho ba bantši ba phethile ka gore ga go kgonege go tseba Modimo.

Na go tseba Modimo go bohlokwa? Ee go bohlokwa. Go tseba Modimo go ka go thuša gore o thabele bophelo. (Ditiro 17:26-28) Ge o dutše o batamela kgauswi le yena, o tla go rata kudu le go go thuša. (Jakobo 4:8) Go feta moo, go tseba Modimo go tla go thuša gore o tle o phele ka mo go sa felego nakong e tlago.—Johane 17:3.

O ka dira’ng gore o tsebe Modimo? Nagana ka mogwera wa gago yo o mo tsebago gabotse. Go tlile bjang gore le be bagwera? O ile a wa thoma ka go tseba leina la gagwe, gore ke motho wa mohuta mang, o rata eng le gore ga a rate eng, dilo tše a di dirilego goba tšeo a nyakago go di dira le dilo tše dingwe. Dilo tše ke tšona di dirilego gore wena le motho yoo le be bagwera—o ithutile yena gomme wa mo tseba.

Ka mo go swanago, re ka tseba Modimo ka go ithuta dilo tše di latelago:

• LEINA LA MODIMO KE MANG?

• MODIMO O BJANG?

• KE DILO DIFE TŠEO MODIMO A DI DIRILEGO?

• KE DILO DIFE TŠEO MODIMO A TLAGO GO DI DIRA?

• GO TSEBA MODIMO GO KA GO THUŠA BJANG?

Makasine wo o tlo go thuša go tseba dikarabo tše di tšwago ka Beibeleng tša dipotšišo tšeo. Dihlogo tša ka makasineng wo di ka se go thuše feela go tseba Modimo, eupša di tlo go thuša le go tseba dilo tšeo a tlago go go direla tšona ge o ka ba mogwera wa gagwe.