Beibele ga e swane le dipuku tše dingwe. E swere keletšo e tšwago go Mmopi wa rena. (2 Timotheo 3:16) Molaetša wa yona o ka re tutuetša e le ruri. Ge e le gabotse, Beibele e re: “Lentšu la Modimo le a phela e bile ke le matla.” (Baheberu 4:12) E na le matla a go kaonefatša maphelo a rena ka ditsela tše pedi, e lego go re nea tlhahlo ka mehla le go re thuša gore re tsebe Modimo le dikholofetšo tša gagwe.​—1 Timotheo 4:8; Jakobo 4:8.

Go kaonefatša bophelo bja gago gona bjale. Beibele e ka go thuša ditabeng tša motho ka noši. E nea dikeletšo tše holago mabapi le dilo tše di latelago.

•   Ditswalano le ba bangwe.—Baefeso 4:31, 32; 5:22, 25, 28, 33.

• Go phela gabotse maikwelong le mmeleng.—Psalme 37:8; Diema 17:22.

• Boitshwaro.—1 Bakorinthe 6:9, 10.

• Boemo bjo bobotse bja tša boiphedišo.—Diema 10:4; 28:19; Baefeso 4:28. *

Banyalani bao e sa lego ba bafsa ba kua Asia ba ile ba thabela kudu keletšo e holago ya ka Beibeleng. Go swana le banyalani ba bantši ba sa tšwago go nyalana, ba be ba thatafalelwa ke go tlwaelana go ya ka dimelo tša bona le go boledišana ka bolokologi. Ka gona, ba ile ba thoma go diriša seo ba se balago ka Beibeleng. Mafelelo e bile afe? Monna wa gona yo a bitšwago Vicent o re: “Seo ke se badilego ka Beibeleng se nthušitše gore ke lebeletšane le ditlhohlo lenyalong la rena ka tsela e lerato. Go phela ka keletšo ya Beibele go dirile gore bophelo bja rena e be bjo bo thabišago.” Mosadi wa gagwe yo a bitšwago Annalou o dumela ka gore: “Go bala ka mehlala ya ka Beibeleng go re thušitše. Ga bjale ke kwa ke thabile e bile ke kgotsofetše ka lenyalo la rena le ka dilo tšeo re nyakago go di fihlelela bophelong.”

Go tseba Modimo. Ka ntle le seo a se hlalositšego mabapi le lenyalo, Vicent gape o re: “Go bala Beibele go dirile gore ga bjale ke ikwe ke le kgauswi kudu le Jehofa go feta peleng.” Vicent o hlokometše taba e bohlokwa, ya gore Beibele e ka go thuša gore o tlwaelane le Modimo. Ge o dutše o e bala, ga se feela gore o tla holwa ke keletšo yeo e tšwago go Modimo, eupša o tla hwetša sebaka sa gore o mo tsebe bjalo ka mogwera. Le gona, o tla bona gore o utolla ditaba ka botlalo mabapi le bokamoso bjo bokaone, e lego nakong yeo ka yona o tlago go ipshina ka ‘bophelo bja kgonthe’ bja ka mo go sa felego. (1 Timotheo 6:19) Ga go na puku le ge e le efe yeo e ka holofetšago seo.

Ge o ka ipeela gore o bale Beibele o sa kgaotše, le wena o ka holwa kudu ke go kaonefatša bophelo bja gago gona bjale le go tseba Modimo gakaone. Lega go le bjalo, ge o dutše o bala Beibele, o tla ipotšiša dipotšišo tše dintši. Ge o dutše o ipotšiša, nagana ka mohlala o mobotse wa mohlankedi wa Moethiopia yo a phetšego mengwageng e 2000 e fetilego. O be a na le dipotšišo tše dintši mabapi le Beibele. Ge a be a botšišwa gore na o kwešiša seo a se balago, o ile a araba ka gore: “Ruri, nka kgona bjang go kwešiša ka ntle le gore motho yo mongwe a ntlhahle?” * Ntle le go dikadika, o ile a dumela go thušwa ke motho yo e bego e le morutiši yo a swanelegago wa Beibele e lego Filipi, yo e bego e le morutiwa wa mathomong wa Jesu. (Ditiro 8:30, 31, 34) Ka mo go swanago, ge e ba o ka rata go tseba ka mo go oketšegilego ka Beibele, re go laletša gore o romele kgopelo ya gago Inthaneteng go www.isa4310.com/nso goba o ngwalele atereseng ya kgauswi yeo e hwetšagalago ka makasineng wo. Gape o ka ikgokaganya le Dihlatse tša Jehofa tša kgauswi le mo o dulago gona goba o etele Holo ya Mmušo ya lefelong la geno. Ke ka baka la eng o sa bale Beibele lehono gomme wa e dumelela gore e go hlahle gore o phele bophelo bjo bokaone?