GANTŠI batho ba bitša Nicaragua gore ke naga ya matsha le dithabamollo. Naga ye e ikgantšha ka go ba le letsha le legolo kudu kua Amerika Bogare, e lego Letsha la Nicaragua. Batho ba naga yeo ba le bitša Cocibolca, yeo e rago gore “Lewatle le le Bose.” Letsha le le na le dihlakahlaka tše dintši gomme ke lona feela leo le nago le meetse ao a se nago letswai ao a nago le diphedi tša ka lewatleng tše bjalo ka dišaka, swordfish le hlapi yeo e bitšwago tarpon.

Le gona Nicaragua e na le tikologo yeo e ikarotšego kudu ya Amerika Bogare, yeo e bitšwago Lebopo la Mosquito. Ye ke tikologo ya bophara bja dikhilomithara tše 65, yeo karolo ya yona e kgolo e phatšago kgauswi le lebopo la ka bohlabela le go tshelela ka Honduras yeo e lego kgauswi. Mamiskito ke sehlopha se sengwe sa batho ba naga ya Nicaragua bao setlogo sa bona se thomilego pele Mayuropa a etla lekgolong la bo-16 la nywaga.

Mamiskito ke batho bao ba nago le ditswalano tša kgauswi kudu le metlwae ya moswananoši. Ka mohlala, leleme la Miskito ga le na mantšu a bjalo ka “Morena” goba “Mohumagatšana.” Dinagamagaeng, bana ba bitša batho ba bagolo gore ke “Malome” goba “Mmane,” go sa šetšwe gore  ba a tswalana goba go se bjalo. Motlwae wa kgale wa Mamiskito ke wa gore mosadi a dumediše bagwera ba gagwe ba kgauswi goba ba leloko ka go kgomana le bona ka marama. Ke moka mosadi yo a thomilego tumedišo o goga moya ka nko.