Ronaldo, wa kua Brazil, o ile a hlagelwa ke kotsi ya koloi yeo e bolailego ditho tše hlano tša lapa la gabo, go akaretša mmagwe le tatagwe. O re: “Ke dutše sepetlele dikgwedi tše pedi pele nka botšwa gore ba hlokofetše kotsing yeo.

“Mathomong, ke be ke sa kgolwe gore ba hlokofetše. Go tla bjang gore ba hwe ka moka? Ge ke be ke lemoga gore ke therešo, ke ile ka šulafalelwa. Ke be ke thoma go kwa bohloko ka tsela yeo. Matšatšing a latelago, ke be ke bona go sa kgonege gore ke phele ntle le bona. Ke feditše dikgwedi tše dintši ke lla letšatši le letšatši! Ke be ke ipona molato ka ge ke dumeletše motho yo mongwe a otlela koloi. Ge nkabe go be go otlela nna, mohlomongwe nkabe ba sa phela.

“Go fetile nywaga e lesometshela, gomme bophelo bja ka bo boetše sekeng. Eupša lehu la bona le tlogetše sekgoba pelong ya ka.”

Ga se phošo go lla. Beibele e re go na le “nako ya go lla.” (Mmoledi 3:1, 4) Ronaldo o re: “Ge ke be ke nyaka go lla, ke be ke lla. Go be go sa nthuše ka selo go thibela megokgo, e bile ka morago ke be ke ikwa ke imologile.” Ke therešo gore ga re lle ka ditsela tša go swana. Ka gona ge e ba o llela ka teng, seo ga se bolele gore o gatelela maikwelo a gago goba o swanetše go gapeletša megokgo.

Phema go ipea lekatana. (Diema 18:1) Ronaldo o re: “Ke ile ka leka go phema mokgwa wa go ba kgole le batho ba bangwe. Batho ba be ba nketela, gomme ke be ke ba amogela. Le gona ke ile ka tšhollela mosadi wa ka le bagwera ba kgauswi sa mafahleng.”

Dula o theošitše maswafo ge yo mongwe a go hlaba ka mantšu. Se se ka akaretša mantšu a rego: “Go kaone ge ba ikhwetše.” Ronaldo o gopola gore, “Mantšu a mangwe ao a bego a reretšwe go nkgothatša, a be a ntlhaba.” Go e na le go šetša mantšu a kgopišago, latela keletšo e bohlale ya Beibele e rego: “O se šetše mantšu ka moka ao batho ba a bolelago.”—Mmoledi 7:21.

Ithute therešo ka boemo bja bahu. Ronaldo o re: “Go Mmoledi 9:5, Beibele e bontšha gore bahu ga ba kwe bohloko, gomme seo se ntlišetša khutšo ya ka gare. Le gona Beibele e ruta gore go tla ba le tsogo le gore bahu ba tla phela gape. Ka gona ke nagana ka baratiwa ba ka bao ba hwilego bjalo ka ge eka ba tšere leeto.”—Ditiro 24:15.

Na o be o tseba? Beibele e holofetša nako yeo Modimo a tlago go “metša lehu ka mo go sa felego.” *—Jesaya 25:8.