NONYANA ya mosela wa methaladi e bitšwago godwit e tšea le lengwe la maeto a makatšago kudu a go huduga ao batho ba a tsebago. Leeto la nonyana ye la dikhilomithara tše 11 000 le ka tšea matšatši a ka godimo ga a seswai.

Ela Hloko: Banyakišiši ba dumela gore mehuta e mengwe ya dinonyana e diriša matlakgogedi a lefase go bona tsela, go le bjalo ka ge eka di na le khamphase bjokong bja tšona. Go na le kgonagalo ya gore nonyana ye ya godwit e diriša le letšatši go bona tsela mosegare gotee le dinaledi go bona tsela bošego. Go bonagala eka nonyana ya godwit e ka kgona le go lemoga madimo ao a ka e thušago ka go e kgorometša ka moya wa ona. Lega go le bjalo, ditaba ka botlalo tša mabapi le kamoo dinonyana tše di tšeago leeto la tšona le letelele di makatša ditsebi. Rathutaphedi Bob Gill o re: “Ke ithutile ka tšona ka nywaga e 20, gomme ke sa makala.”

O Nagana Eng? Na mokgwa wa go bona tsela wa nonyana ya mosela wa methaladi e bitšwago godwit o bile gona ka tlhagelelo? Goba na o hlamilwe?