Re Nyaka Gore Tlaišego e Fele!

Khieu o thomile go tlaišega ge tatagwe a be a bolawa ka baka la ge a sa ka a thibela dikgomo tša gagwe go ja mabele mašemong a kgauswi. Ka morago, go ile gwa bolawa mmagwe le dikgaetšedi tša gagwe tše pedi—e be e le bahlaselwa ba lekgotla la Cambodia la Khmer Rouge. Ke moka Khieu o ile a gobatšwa ke pomo. O feditše matšatši a 16 lešokeng a letetše thušo. O ile a swanelwa ke go kgaolwa leoto. Khieu o re: “Ke be ke duma go hwa.”

O KA no ba o lemogile gore tlaišego ga e kgetholle. Dikotsi tša tlhago, bolwetši le bogole, bosenyi bjo bošoro le dikotsi tše dingwe di ka wela mang goba mang, kae goba kae le neng goba neng. Mekgatlo ya go thuša bao ba tlaišegago e šomile ka thata go thibela tlaišego ya batho goba go fo ba imolla tlaišegong. Eupša maiteko a yona a feletše kae?

Ela hloko mohlala o tee—ntwa kgahlanong le tlala. Go ya ka kuranta ya Toronto Star, dikotsi tša tlhago di šiile batho ba bantši ba se na magae le dijo. Lega go le bjalo, kuranta ye e bega gore “maiteko a mekgatlo yeo e lekago go fokotša tlala a fokodišwa ke bošoro bjo bo oketšegago.”

Baetapele ba dipolitiki, ba tša leago, ba tša kalafo le bona ba lekile seo ba ka se kgonago go fediša tlaišego, eupša ditlamorago tša gona di be di nyamiša. Mananeo a go hlabolla maemo a boiphedišo ga se a fediša bodiidi. Meento, dihlaretagi le mekgwa e hlabologilego ya go bua ga di kgone go fediša malwetši ka moka. Maphodisa le makgotla a go kgothaletša khutšo ga a na seo a ka se dirago ge e se go fo bogela bosenyi bjo bošoro bo tšwela pele goba gaešita le go oketšega.

Ke ka baka la’ng go na le tlaišego e ntši gakaakaa? Na Modimo o na le taba ka dilo tšeo batho ba di kgotleletšego? Batho ba dimilione ba hweditše dikarabo tše di homotšago tša dipotšišo tšeo ka Beibeleng, go etša ge re tla bona.