Ka di-27 tša January 2023, batho ba bantši ba tla be ba gopola Letšatši la Ditšhabatšhaba la go Bolawa ga Sehlogo ga Bajuda (International Holocaust Remembrance Day). Masetlapelo ao a diregilego mengwageng e fetago e 75 e fetilego a ka go dira gore o ipotšiše gore ke ka lebaka la eng Modimo a ile a dumelela gore Bajuda ba bolawe ga sehlogo.

•   Go hwetša seo Beibele e se bolelago ka se, bala sehlogo seo se rego, “Ke ka Baka La’ng Modimo a Ile a Dumelela Bajuda go Bolawa ga Sehlogo?”

 Setšhaba sa Bajuda se tlaišegile o šoro nakong yeo. Ba dimilione ba ile ba bolawa ka maikemišetšo le ka boomo. Batho ba bangwe le bona ba ile ba tlaišwa le go bolawa nakong yeo. Gare ga bona e be e le Dihlatse tša Jehofa, tšeo di bego di tlaišetšwa ditumelo tša tšona tšeo di theilwego Beibeleng.

•   Go kwa ka mo go oketšegilego, bala sehlogo seo se rego, “What Happened to Jehovah’s Witnesses During the Time of the Holocaust?”

 Batho ba bantši ba tšhoga gore tiragalo e bjalo e ka direga gape. Se se thabišago ke gore Beibele e holofetša gore nakong e tlago ditiragalo tše bjalo tše di nyamišago kudu di ka se sa direga.

•   “‘Ka gobane nna ke tseba gabotse menagano yeo ke e naganago ka lena,’ o re’alo Jehofa, ‘e lego menagano ya khutšo, e sego ya bošula, gore ke le nee bokamoso le kholofelo.’”—Jeremia 29:11. a

 Kholofelo ye e tlo phethega ge Jehofa Modimo a tla be a tšea mogato wa go fediša bošoro le go dirolla tshenyo yeo bo e bakilego. Go se go ye kae, o tla:

•   Fediša batho bao ba tlaišago ba bangwe.—Diema 2:22.

•   Fodiša bohle bao ba tlaišegilego.—Kutollo 21:4.

•   Tsoša bahu ba phela gape lefaseng.—Johane 5:28, 29.

 O ka tshepa kholofetšo e homotšago ya Beibele. E le gore o kwe lebaka, re go laletša gore o leke thuto ya rena ya mahala ya Beibele.