Dihlatse tša Jehofa di hwetša dikgatišo le dibidio tšeo di theilwego Beibeleng ka mokgwa wa elektroniki go feta le ge ele neng pele. Lega go le bjalo bana babo rena le dikgaetšedi dikarolong tše dintši tša lefase ba palelwa ke go diriša inthanete ka ge e tura. Ba bangwe ba dula mafelong ao go ona network e sa swarego gabotse goba mo network e sego gona.

 Lega go le bjalo bana babo rena le dikgaetšedi ba kgona go taonelouta dikgatišo le dibidio lege go se na network! Seo se kgonega bjang?

 Se se kgonega ka gore go dirišwe JW Box, e lego lepokisana leo le fiwago diphuthego tšeo di nago le mathata a inthanete. Lepokisana le le na le router yeo e rekilwego le software yeo e hlamilwego ke ba Lefapha la Dikhomphutha la Bethele. E bile le tsentšwe dikgatišo le dibidio tše di lego gona go jw.org. Lepokisi le tee le ka bitša mo e ka bago R1 227,50.

 Bana babo rena le dikgaetšedi ge bale holong ya mmušo ba kgona go diriša Wi-Fi go taonelouta dikgatišo le dibidio tšeo di lego ka gare ga JW Box. Bontši bja difouno tšeo di nago le Wi-Fi di ka kgona go taonelouta dilo tšeo di lego ka gare ga JW Box. Bjale ge e ba phuthego e na le mathata a inthanete e ka kgona go tsentšha dikgatišo tše difsa ka gare ga JW Box bjang? Ofisi ya lekala e romela diphuthego tšeo di-USB nako le nako. E tee e bitša mo e ka bago R65,45. Ka gare ga tšona go na le dikgatišo le dibidio tše di mpsha tšeo di tšwago go jw.org tšeo di tlago go tsenywa ka gare ga JW Box.

 JW Box e thušitše bjang bana babo rena? Tate yo a bitšwago Nathan Adruandra yo a dulago Democratic Republic of Congo o re: “Ke lekile gantšinyana go taonelouta terama ya ‘Wena Jehofa, . . . ke Botile Wena’ le ya Gopola Mosadi wa Lota. Eupša ke ile ka palelwa gomme seo se ile sa dira gore ke nyame. Ga bjale ka baka la JW Box ke kgona go taonelouta dibidio ka founu ya ka, gomme seo se nthuša gore ke kgone go ruta bana baka gabotse.”

 Ngwanabo rena yo mongwe yo a thušago diphuthego go diriša di-JW Box kua Nigeria o re: “Bana babo rena ba bona JW Box e le mpho e bohlokwa e tšwago go Jehofa. Ba thabela go taonelouta dikgatišo le dibidio tšeo di lego go Teaching Toolbox gabonolo.”

 Di-JW Box tše fetago 1 700 di rometšwe bana babo rena bao ba lego dinageng tša Afrika, Oceania, le Amerika Borwa , e bile go rulaganywa le gore di romelwe diphuthegong tše dingwe tše dintši. Tšhelete ya go dira dilo tše ka moka e tšwa kae? E tšwa go meneelo ya lena yeo e ntšhwago bakeng sa modiro wa lefase ka moka, bontši bja meneelo yeo e dirwa go donate.isa4310.com. Ruri re leboga meneelo ya lena ya boithatelo.