Dihlatse tša Jehofa di dira modiro o bohlokwa wa go thuša batho dinageng tše fetago 200. Eupša ke dinaga tše e ka bago tše 35 feela moo bana babo rena ba hwetšago meneelo e lekanego yeo ba ka e dirišago go lefelela dilo tšeo ba di hlokago. Bana babo rena bao ba dulago dinageng tšeo di diilago ba kgona bjang go lefelela dilo tšeo ba di hlokago?

 Sehlopha se Bušago sa Dihlatse tša Jehofa se lebelela gore bana babo rena lefaseng ka moka ba hloka eng gore ba kgone go rapela Jehofa le go bolela ditaba tše dibotse. Tšhelete e dirišwa gabotse. Ge e ba lekala le hwetša tšhelete e ntši go feta yeo le e hlokago, tšhelete yeo e fiwa dinaga tšeo di hlaelelwago. Tokišetšo ye e swana le yeo Bakriste ba pele ba ilego ba e diriša “ka go lekalekanya” dilo gore ba kgone go thuša ba bangwe. (2 Bakorinthe 8:14) Bakriste ba ba ile ba abelana le Bakriste gotee le bona dilo tšeo ba bego ba na le tšona.

 Bana babo rena bao ba amogelago tšhelete go tšwa diofising tše dingwe tša makala ba ikwa bjang? Ka mohlala, batho ba bantši Tanzania ba phela ka tšhelete ya ka tlase ga R33 ka letšatši, ka gona tšhelete yeo makala a e rometšego e ile ya thuša go mpshafatša Holo ya Mmušo ya Phuthego ya Mafinga. Phuthego yeo e ile ya ngwala gore: “Ga e sa le tloga ge holo ya rena ya mmušo e mpshafatšwa, batho ba bantši ba thoma go tla dibokeng! Re rata go leboga mokgatlo wa Jehofa le bana babo rena lefaseng ka moka ka meneelo ya bona yeo e ilego ya re thuša gore re be le lefelo le le lebotse la borapedi.”

 Ba bangwe ba bana babo rena ba kua Sri Lanka ba ile ba hlaelelwa ke dijo ka baka la bolwetši bjo bja Corona. Ba bangwe ba bao ba ilego ba kgongwa ke boemo bjo ke Imara Fernando le morwa wa gagwe yo monyenyane e lego Enosh. Re leboga meneelo yeo e tšwago dinageng tše dingwe yeo e ilego ya kgona go ba thuša. Ba ile ga ngwala karata yeo e nago le mantšu a rego: “Re leboga bana babo rena bao ba ilego ba re bontšha lerato nakong ye e thata. Re thabela go ba karolo ya lapa le, e bile re tšwela pele re rapela Jehofa gore a thuše bana babo rena le dikgaetšedi ka moka mehleng ye ya bofelo.”

 Le ge bana babo rena ba dula mafelong a fapafapanego ba dula ba ikemišeditše go abelana le ba bangwe seo ba nago le sona. Ka mohlala, Enosh o itiretše lepokisana leo a lahlelago tšhelete ka gare ga lona gore a tle a kgone go ntšha moneelo wa go thuša malapa ao a hlokago. Guadalupe Álvarez le yena o bontšha mokgwa o swanago wa go rata go nea. O dula Mexico moo batho ba bantši ba sa hwetšego megolo e lekanego e bile ba bantši ba sa hwetšego megolo ya kgwedi le kgwedi, eupša o neela ka tšhelete yeo a ka e kgonago. O ile a ngwala gore: “Ke leboga lerato le botho tšeo Jehofa a mpontšhitšego tšona. Ke a tseba gore meneelo ya ka e tlo hlakantšhwa le ya bana babo rena ba bangwe gomme ya thuša bana babo rena bao ba hlokago thušo.”

 Diofisi tša makala di thabela go romela tšhelete mafelong ao bana babo rena ba hlokago. Anthony Carvalho yo a hlankelago Komiting ya Lekala la Brazil o re: “Re feditše mengwaga e mentši re thekgwa ka tša ditšhelete ke dinaga tše dingwe. Ka baka la thušo yeo ga bjale maemo a rena a kaonafetše, le rena re kgona go thuša ba bangwe. Ga bjale bana babo rena ba mo Brazil ba lebelela seo ba ka se dirago go thuša modiro wa go bolela ditaba tše dibotse lefaseng ka moka.”

 Dihlatse tša Jehofa di ka thuša bjang bana babo bona bao ba hlokago thušo? Ga se ba swanela go romela tšhelete ka go lebanya makaleng a dinageng tše dingwe, eupša ba ka ntšha meneelo go thekga modiro wa lefase ka bophara. Re ka tsenya meneelo ya rena mapokising a moneelo ao a lego diphuthegong tša gabo rena ao a ngwadilwego gore “Modiro wa Lefase ka Bophara” goba ra neela go donate.isa4310.com. Re leboga meneelo ya lena kudu.