Genesi 14:1-24
14 Bjale Amorafele kgoši ya Shineara, Arioko kgoši ya Elasara, Kedorolaomere kgoši ya Elama le Tidala kgoši ya Goime,
2 ba ile ba yo lwa le dikgoši tše hlano, e lego Bera kgoši ya Sodoma, Birisha kgoši ya Gomora, Shinabe kgoši ya Adema, Shemebere kgoši ya Tseboima le kgoši ya Bela yeo gape e bitšwago Tsoare.
3 Dikgoši tše ka moka di ile tša ipopa ngatana e tee tša gwantela Moeding wa Sidima, ke gore Lewatleng la Letswai.*
4 Dikgoši tšeo tše hlano di be di hlanketše Kedorolaomere ka mengwaga e 12, eupša ka ngwaga wa bo-13 di ile tša mo hlanogela.
5 Ka ngwaga wa bo-14 Kedorolaomere o ile a tla a na le dikgoši tšela tše dingwe tšeo di bego di na le yena, ba fenya Barefai kua Ashitherothe-karanaima, Batsutsi kua Hama le Baemi kua Shabe-kiriathaima,
6 le Bahori thabeng ya gabo bona ya Seire, go ba go fihlela kua Eli-parane yeo e lego lešokeng.
7 Ke moka ba boa ba tla Ene-mishipata, e lego Kadeshe, gomme ba fenya naga ka moka ya Baamaleke gotee le Baamore bao ba bego ba dula Hatsatsone-thamara.
8 Ka yona nako yeo kgoši ya Sodoma ya gwanta e na le kgoši ya Gomora, kgoši ya Adema, kgoši ya Tseboima le kgoši ya Bela yeo gape e bitšwago Tsoare, tša yo lwa Moeding wa Sidima,
9 tša lwa le Kedorolaomere kgoši ya Elama, Tidala kgoši ya Goime, Amorafele kgoši ya Shineara le Arioko kgoši ya Elasara. Dikgoši tše tše nne di be di elwa le tše hlano.
10 Bjale Moedi wa Sidima o be o tletše ka melete yeo e nago le sekontiri, gomme e rile ge dikgoši tša Sodoma le Gomora di tšhaba tša wela ka go yona, ke moka bao ba bego ba šetše ba tšhabela dithabeng.
11 Ka gona dikgoši tše nne tšeo di fentšego tša tšea dithoto ka moka tša Sodoma le Gomora le dijo ka moka, ke moka tša tloga.
12 Di ile tša tšea le Lota yo a bego a dula Sodoma, yoo e bego e le morwa wa ngwanabo Aborama, tša tšea le dithoto tša gagwe ke moka tša fetela pele.
13 Ka morago ga moo motho yo mongwe yo a phonyokgilego o ile a tla a botša Aborama wa Moheberu seo se diragetšego. Ka nako yeo Aborama o be a dula kgauswi le mehlare e megolo ya Mamure wa Moamore e lego ngwanabo Eshikolo le Anere. Banna ba, ba be ba gwerane le Aborama.
14 Ka gona ge Aborama a ekwa gore morwa wa ngwanabo o tšerwe, o ile a kgoboketša banna ba gagwe bao ba bego ba tlwaeleditšwe ntwa, e lego bahlanka ba 318 (makgolotharo-lesomeseswai) bao ba belegetšwego lapeng la gagwe. Ke moka o ile a rakediša batho bao go fihla motseng wa Dani.
15 Bošego o ile a arola bahlanka ba gagwe ka dihlopha. Yena le bahlanka bao ba ya go lwa le manaba a bona gomme ba a fenya, o ile a a rakediša go fihla Hoba yeo e lego ka leboa la Damaseko.
16 O ile a buša dithoto ka moka, a buša le Lota morwa wa ngwanabo le dithoto tša gagwe gotee le basadi le batho ba bangwe.
17 Ka morago ga gore Aborama a boe go fenya Kedorolaomere le dikgoši tšeo di bego di na le yena, kgoši ya Sodoma e ile ya mo gahlanetša Moeding wa Shabe, e lego Moeding wa Kgoši.
18 Melekitsedeke kgoši ya Salema yo e bego e le moprista yo a hlankelago Modimo yo Godimodimo, o ile a ya go kopana le Aborama gomme a mo nea senkgwa le beine.
19 Ke moka a mo šegofatša a re:
“Anke Modimo yo Godimodimo,Yena yo a dirilego legodimo le lefase a go šegofatše.
20 Le gona a go retwe Modimo yo Godimodimo,Yena yo a thušitšego gore o fenye manaba a gago!”
Ke moka Aborama a mo nea karolo ya lesome ya selo se sengwe le se sengwe seo a bego a na le sona.
21 Ka morago ga moo kgoši ya Sodoma ya re go Aborama: “Nnee batho ba ka, eupša o itšeele dithoto.”
22 Eupša Aborama a re go kgoši ya Sodoma: “Ke ikana* pele ga Jehofa Modimo yo Godimodimo, yena yo a dirilego legodimo le lefase,
23 gore nka se tsoge ke tšere selo sa gago, e ka ba garane goba lerala la seeta, e le gore o se ke wa re: ‘Ke nna ke humišitšego Aborama.’
24 Nka se tšee selo ntle le seo masogana a a šetšego a se jele. Ge e le banna bao ba bego ba sepetše le nna, e lego Anere, Eshikolo le Mamure, bona ba tšee tšeo ba di abetšwego.”
Mengwalo ya tlase
^ E lego “Lewatleng le le Hwilego.”
^ Phetolelo ya lentšu ka lentšu e re, “ke emiša seatla sa ka.”
