Ka Beibeleng ga go na moo go bolelwago ka go kgoga, a goba ditsela tše dingwe tša go diriša motšoko. Go e na le moo, Beibele e na le melao ya motheo yeo e bontšhago gore Modimo o hloile mekgwa ya go se hlweke le yeo e ka beago bophelo kotsing. Ke ka baka leo Modimo a lebelelago go kgoga e le sebe.

•   Hlompha bophelo. “Modimo . . . o nea batho ka moka bophelo le mohemo.” (Ditiro 17:24, 25) Ka ge bophelo e le mpho e tšwago go Modimo, ga se ra swanela go dira selo le ge e le sefe seo se ka beago bophelo bja rena kotsing, go swana le go kgoga. Go kgoga go kotsi kudu gomme go dira gore batho ba bantši ba hwe go sa hlokagale.

•   Rata moagišani. “O rate moagišani wa gago ka mokgwa wo o ithatago ka wona.” (Mateo 22:39) Go kgoga kgauswi le batho ba bangwe ke go se bontšhe lerato. Batho bao ba fetšago nako e ntši ba le kgauswi le bao ba kgogago, go bonolo gore ba tsenwe ke malwetši ao a tlišwago ke go kgogago.

•   Go ba yo mokgethwa go bohlokwa. “Le neele mebele ya lena e le sehlabelo se se phelago, se sekgethwa, se se amogelegago go Modimo.” (Baroma 12:1) “A re itlhwekišeng ditšhila tšohle tša nama le tša moya, re phethagatša bokgethwa ka go boifa Modimo.” (2 Bakorinthe 7:1) Modimo ga se a bopela motho gore a kgoge, le gona yo a kgogago ga se yo mokgethwa. Go ba yo mokgethwa go bolela go hlweka le go hloka bosodi. Batho bao ba kgogago motšoko ba šilafatša mebele ya bona e bile ba e gobatša ka boomo.

 Ga go na moo Beibele e bolelago ka patše goba dihlaretagi tša go swana le yona. Eupša e bolela ka melao ya motheo yeo e thibelago batho go diriša dihlaretagi tša mohuta wo, tšeo batho ba bangwe ba palelwago ke go phela ntle le tšona. E mengwe ya melao ya motheo yeo go bolelwago ka yona ka Beibeleng ke e latelago:

•   Re swanetše go laola menagano ya rena. “O rate Jehofa Modimo wa gago ka . . . monagano wa gago ka moka.” (Mateo 22:37, 38) “Dulang le hlaphogetšwe monaganong ka mo go feletšego.” (1 Petro 1:​13) Ge motho a diriša dihlaretagi ga go bonolo gore a laole monagano wa gagwe, le gona batho ba bantši ga ba kgone go phela ntle le dihlaretagi. Go e na le go nagana ka dilo tšeo di ka ba holago, ba dula ba naganne ka go hwetša dihlaretagi le kamoo ba ka di šomišago ka gona.​—Bafilipi 4:8.

•   Go kwa melao ya mebušo. ‘Le kwe mebušo le balaodi.’ (Tito 3:1) Dinageng tše dintši, molao o thibela gore batho ba diriše dihlaretagi tše itšego. Ge e ba re nyaka go kgahliša Modimo, re swanetše go kwa mebušo le balaodi.​—Baroma 13:1.