Naga ya Australia ke e nngwe ya dinaga tšeo di nago le palo e oketšegago ya batšofadi. Batšofadi ba bangwe ba ya go dula mafelong ao go hlokomelwago batšofadi gore ba thušwe ka dihlare le dilo tšeo ba di nyakago.

Eupša nnete ke gore batho bao ba dulago mafelong ao go hlokomelwago batšofadi ga ba hloke thušo ya dilo tše feela. Ka dinako tše dingwe ba ka lewa ke bodutu le go ikwa ba se sa na mohola. Beke e nngwe le e nngwe, Dihlatse tša Jehofa di etela batho bao ba dulago mafelong ao go hlokomelwago batšofadi, toropong ya Portland yeo e lego Victoria, kua Australia. Morero wa tšona ke go kgothatša batšofadi le go ba bontšha gore nakong e tlago dilo di tlo loka.

Dihlatse tša Jehofa tša kgauswi le mafelo ao go hlokomelwago batšofadi, di etela batho bao ba dulago moo gomme tša boledišana le bona ka ditaba tša ka Beibeleng. Ka mohlala, di boledišana le bona ka dilo tšeo di diragaletšego Jesu. Jason o re: “Re balela batšofadi bao ditemana tše itšego ka Beibeleng gomme ra boledišana le bona ka tšona.” Ka ge batho ba bantši bao Dihlatse tša Jehofa di boledišanago le bona ba se ba phela gabotse mmeleng, di ba kgothatša ka go ba botša ka dilo tšeo Modimo a tshepišago go tlo di fediša, tše bjalo ka bolwetši le lehu.

Tony, yo e lego Hlatse ya Jehofa ya lefelong leo o re: “Re thomile re bolela le bona ka metsotso e 30, eupša ba ile ba re kgopela gore re oketše nako yeo. Gona bjale re boledišana le bona iri e tee gaešita le ge modudi yo mongwe wa moo a nyaka gore re boledišane le bona ka diiri tše pedi!” Ka ge batšofadi ba bangwe e le difofu, gomme ba bangwe ba palelwa ke go fologa mpete goba go itshwarela dilo, Dihlatse tša Jehofa di a ba thuša nakong ya ge di boledišana le bona, e bile di ba kgothaletša go tšea karolo dipoledišanong tšeo.

Selo se sengwe seo Dihlatse tša Jehofa di se dirago ge di etetše mafelong ao, ke go opela le batho ba moo dikopelo tše sego kae tša go tumiša Modimo. Le gona, ka morago ga gore go opelwe dikopelo tšeo gantši batšofadi ba kgopela gore go opelwe kopelo e nngwe. John, a e lego yo mongwe wa badudi ba moo, o itše: “Re rata mmino wa lena. O re thuša go rata Modimo le go mo hlompha.” Modudi yo mongwe wa sefofu wa lefelong leo e lego Judith, o tseba dikoša ka moka tšeo a di ratago ka hlogo!

Dihlatse tša Jehofa di tshwenyegile ka batšofadi ba bao ba sego ba phela gabotse mmeleng. Brian e lego yo mongwe wa Dihlatse tša Jehofa tšeo di rutago batšofadi ba lefelong leo, o re ge badudi ba sa ikwe gabotse, Dihlatse tša Jehofa di ba etela ka di kamoreng tša bona. O re: “Re bolela le bona gomme ra kwa gore ba tsogile bjang. Ka dinako tše dingwe re boela go bona ka letšatši leo le latelago go kwa gore ba šetše bjang.”

Batho ba bantši bao ba dulago mafelong ao go hlokomelwago batšofadi, ba thaba kudu ge Dihlatse tša Jehofa di ba etela. Peter yoo a bago gona dipoledišanong tšeo beke e nngwe le e nngwe, o re: “Ke fela pelo ya gore Dihlatse tša Jehofa di fihla neng.” Judith o fela a botša bahlokomedi ba gagwe gore: “Lehono ke Laboraro! Ke kgopela le nthušeng go itokiša gore ke kgone go ya thutong ya Beibele. Ga ke nyake go latelwa!”

Batšofadi ba rata seo ba ithutago sona e bile ba ikwa ba batametše kgauswi le Modimo go feta le ge e le neng pele. Ka morago ga gore Robert a be gona ge go be go boledišanwa ka e nngwe ya dithuto tša Jesu, o itše: “Ga sa nka ka kwešiša karolo ye ya Beibele, eupša go na bjale ke a e kwešiša.” David o ithutile gore go rapela go bohlokwa. O itše: “Thapelo e nthušitše gore ke be mogwera wa Modimo.”

Batho bao ba dulago mafelong ao go hlokomelwago batšofadi ba thabela go ithuta seo Beibele e se bolelago ka bokamoso. Lynette o boditše Dihlatse tša Jehofa gore: “Re leboga ge le tlile go re kgothatša ka Beibele.” Modudi yo mongwe o itše: “Le romilwe ke Modimo.”

Margaret o thaba kudu ge Dihlatse tša Jehofa di etela lefelo leo go hlokomelwago batšofadi. Gona bjale o dula a eya dibokeng tša Dihlatse tša Jehofa Holong ya Mmušo. Ruri o dira maiteko a magolo ka ge a se a phela gabotse mmeleng e bile a sa kgone go sepela gabotse! O ile a botša Dihlatse tša Jehofa gore: “Le re rutile dilo tše bohlokwa kudu bophelong.”

Bašomi ba mo le bona ba leboga diketelo tša Dihlatse tša Jehofa. Anna e lego Hlatse ya Jehofa ya lefelong leo, o re: “Bašomi ba kgothaletša batšofadi gore ba tle ba theetše ge Dihlatse tša Jehofa di ruta ka gobane ba bonagala ba thabile ka morago ga dipoledišano tšeo.” Brian, yo re boletšego ka yena ka mo godimo o re: “Bašomi ba mo ba na le botho e bile ba dirišana le rena gabotse. Ba leka ka mo ba ka kgonago go thuša batšofadi gore ba tle dipoledišanong tšeo re bago le tšona.”

Ditho tša malapa a batšofadi ba, di a thaba ge di bona gore batšofadi bao ba thabela dipoledišano. Morwedi wa motšofadi yo mongwe o ile a reta Dihlatse tša Jehofa ka gore: “Selo seo le se direlago mma ke se sebotse kudu.”