Ko e Heigoa e Papatiso?
Ko e tali he Tohi Tapu
Hagaao e papatiso ke he tagata ne fakatomo hifo ke he vai ti liu mafuta hake. a Kakano ia ati papatiso a Iesu he vailele. (Mataio 3:13, 16) Pihia foki, ole e tagata Aitiope ke papatiso he hoko ke he “taha vai.”—Gahua 8:36-40.
Kakano he papatiso
Fakatatai he Tohi Tapu e papatiso ke he tanumia. (Roma 6:4; Kolose 2:12) Ko e papatiso ke he vai kua fakamailoga e tagata ne mate ke he haana a tau mahani fakamua ti kamata e moui foou ko e Kerisiano ne tukulele ke he Atua. Ko e papatiso mo e tau lakaaga ke hokotia ki ai ko e fakatokaaga he Atua ma e tagata ke moua e loto manamanatu meā ne fakavē ke he tua haana ke he poa ha Iesu Keriso. (1 Peteru 3:21) Fakaako e Iesu kua lata e tau tutaki haana ke papatiso.—Mataio 28:19, 20.
Holoholo kehe kia he papatiso ke he vai e agahala?
Nakai. Fakaako he Tohi Tapu maeke a tautolu ke fakameā mai he agahala he puhala ni he toto ha Iesu ne fakamaligi. (Roma 5:8, 9; 1 Ioane 1:7) Ka e ke aoga mai he poa ha Iesu, kua lata e tagata ke fakagahuahua e tua ia Iesu, hiki e puhala moui haana ke moui fakatatau ke he tau fakaakoaga ha Iesu ti papatiso.—Gahua 2:38; 3:19.
Ko e heigoa e fuifui he matalē?
Ko e talahauaga fuifui e matalē kua nakai tohia i loto he Tohi Tapu. Hagaao e talahauaga ke he matagahua ne taute he falu lotu ke papatiso e tama mukemuke (he fuifui e matalē aki e vala vai) ti fakahigoa.
Fakaako kia he Tohi Tapu e papatiso he tama mukemuke?
Nakai. Ko e papatiso faka-Kerisiano kua lata mo lautolu kua lalahi ke maama mo e talitonu ke he “tala mitaki ke he tau mena he kautu he Atua.” (Gahua 8:12) Matutaki ai mo e logona e kupu he Atua ti talia ai, mo e fakatokihala—ko e tau gahua ne nakai maeke ke taute he tama mukemuke.—Gahua 2:22, 38, 41.
Lafi ki ai, fakakite he Tohi Tapu ko e onoonoaga he Atua ke he tau fanau ikiiki he tau Kerisiano kua tapu, po ke meā ke he fofoga haana ha ko e mahani fakamooli he tau matua. (1 Korinito 7:14) Ane mai fakagahua e papatiso he tama mukemuke, nakai moua he tau fanau ia e lilifu he taha tagata ne tuku age ki a lautolu. b
Tau tala nakai mooli ke he papatiso he Kerisiano
Tala nakai mooli: Ko e fuifui po ke liligi e vala vai ke he tagata kua hako ke hukui aki e tanumia ke he vai.
Tala mooli: Ko e tau papatisoaga ne talahau i loto he Tohi Tapu kua putoia e tanumia katoa. Ma e fakatai, magaaho ne papatiso he tutaki ko Filipo e tagata Aitiope, ne “o hifo ai a laua ke he vai,” ke papatiso. Fakamui, ne “o hake a laua he vai.”—Gahua 8:36-39. c
Tala nakai mooli: Hagaao e Tohi Tapu ke he tau tama mukemuke foki kua putoia ka papatiso e tau tagata oti he magafaoa. Ma e fakatai, hagaao ai ke he leoleo he fale puipui i Filipi: “Ti papatiso . . . a ia mo e hana magafaoa oti.”—Gahua 16:31-34.
Tala mooli: Ko e liliuaga he leoleo he fale puipui kua fakakite ko lautolu kua papatiso ne maama “e kupu he Iki [Iehova]” ti “fiafia” a lautolu ia. (Gahua 16:32, 34) Ko e tau mena tutupu mooli nei ne takitaki ke he manatu ko e tau tama mukemuke he magafaoa he leoleo he fale puipui kua nakai putoia ke he papatisoaga ha kua nakai maama e lautolu e kupu ha Iehova.
Tala nakai mooli: Fakaako e Iesu e papatiso he tau tama mukemuke he talahau kua fakalataha e tau tama ikiiki ke he Kautu.—Mataio 19:13-15; Mareko 10:13-16.
Tala mooli: Nakai talahau a Iesu ke he papatisoaga he talahau e ia e tau kupu ia. Ka e fakakite e ia ko lautolu ne lata mo e Kautu he Atua kua latatonu ke tuga e tama tote—mahani molū mo e mukamuka ke fakaako.—Mataio 18:4; Luka 18:16, 17.
a Ko e kupu Heleni ne fakaliliu “papatiso” kua moua mai he kakano “ke fakatomo hifo.” Kitekite ke he Theological Dictionary of the New Testament, Volume I, lau 529.
b Hagaao ke he The International Standard Bible Encyclopedia, “nakai moua ha talahauaga he N[ew] T[estament] ma e papatiso he tau tama mukemuke.” Talahau i ai foki ko e tauteaga ia kua fakatupu e “hepe mo e fakalaulahi e uho ke he papatisoaga,” ko e papatiso ke holoholo kehe e tau agahala.—Volume 1, lau 416-417.
c I lalo hifo he mataulu “Baptism (he Tohi Tapu),” ne pehē e New Catholic Encyclopedia: “Kua fakakite ai ko e papatiso he Lotu he fakamua atu ko e tanumia.”—Volume 2, lau 59.
Liga Manako Foki a Koe
TAU FAKAAKOAGA AOGA HE TOHI TAPU
Talia Oti Nakai he Atua e Tau Puhala Tapuaki?
Tokologa e tagata ne talitonu ke fifili ni e ia e lotu haana.
TAU FAKAAKOAGA TOHI TAPU
Kamata e Fakaakoaga Tohi Tapu ha Mautolu
Taute e fakaako Tohi Tapu ne nakai fai totogi mo e faiaoga.