Kua mukamuka ke talahau ko Satani ne totou e tautolu i loto he Tohi Tapu ko e fakataiaga noa ni he tau mahani kelea oti. Ka e pihia mooli nakai e fakaakoaga he Tohi Tapu? Ka pihia, ko e ha ne fakamaama he Tohi Tapu kua tutala a Satani mo Iesu Keriso mo e Atua Mua Ue Atu? Manamanatu ke he ua e fakatutalaaga pihia.

Magaaho ne kamata a Iesu ke he haana a fekafekauaga, ne lali e Tiapolo ke fakaohooho a ia ke he tolu e kamatamata. Fakamua, eketaha a Satani ke fakaohooho a Iesu ke fakaaoga e malolō haana ne age he Atua ke he puhala lotokai ke fakamakona aki e hoge haana. Ti paleko e Tiapolo ki a Iesu ke fakahagahaga kelea teao e haana a moui mo e ke matalahi a ia ni. Fakahiku, ne foaki age e Satani ki a Iesu e pule katoa ke he tau kautu oti he lalolagi ka lagataha ni e hufeilo fakatote ki a ia. Ne fakaheu oti e Iesu e tau lagatau iloilo tolu ia, he lagatolu e fatiaki mai he Tohi Tapu.​—Mataio 4:1-11; Luka 4:1-13.

Ko hai ha Iesu ne tutala ki ai? Ke he agaaga kelea i loto ia ia ni? I loto he Tohi Tapu, ko Iesu “kua kamatamata a ia ke he tau mena oti kana tuga a tautolu, ka e nakai fai hala a ia.” (Heperu 4:15) Pehē foki e Tohi Tapu: “Ko ia nakai fakai ke hala, ti nakai iloa foki ha fakavai mai he fofoga hana.” (1 Peteru 2:22) Ne tumau a Iesu ke mitaki katoatoa, mo e pipiki mau ke he mahani fakamooli. Nakai fakaatā e ia ha mahani kelea ke tupu hake ia ia. Maaliali ai, nakai tutala a Iesu ke he ha mahani kelea i loto ia ia; kua tutala a ia ke he mena moui mooli.

Ko e fakatutala taha ia ne fakakite mai foki ko e mena moui mooli a Satani.

• Manatu na foaki age he Tiapolo ki a Iesu e pule ke he lalolagi katoa ka hufeilo a Iesu ki a ia. (Mataio 4:8, 9) Liga nakai aoga e foakiaga nei ka nakai mooli a Satani. Lafi ki ai, nakai hūhū toko a Iesu ke he pule ofoofogia ia ha Satani.

• He mole e fakaheu e Iesu e tau kamatamata, ko e Tiapolo kua “fano kehe a ia ia ia, ato hoko ke he taha aho.” (Luka 4:13) Ti ko Satani he tuaga nei kua tuga kia e aga kelea, po ke fī kua fakamakamaka mo e totoko?

• Mailoga “kua o mai e tau agelu mo e fekafekau mai” ki a Iesu. (Mataio 4:11) Ko e tau mena momoui fakaagaaga mooli kia e tau agelu ia, ne fakamalolō mo e lagomatai a Iesu? Ē. Ko e ha mogoia, kua manatu a tautolu ko Satani ko e taha mena foki ka e nakai ko e mena moui fakaagaaga?

Ko e tuaga ke uaaki kua putoia e tala ke he tagata matakutaku Atua ko Iopu. Ko e fakamauaga ia ne ua e fakatutalaaga he Tiapolo mo e Atua. He tau tuaga ua ia, ne nava e Atua ke he mahani fakamooli ha Iopu. Ne pehē a Satani kua fekafekau a Iopu ke he Atua ha ko e lotokai, ti tuahā kua lali e Atua ke mahani fakamooli age a Iopu ki a ia. Tuga kua pehē e Tiapolo kua iloa mitaki e ia a Iopu ke he iloaaga he Atua a Iopu. Ne fakaatā e Iehova a Satani ke utakehe e tau koloa ha Iopu, haana a fanau, mo e malolō tino foki haana. * Fai magaaho, ne maaliali ai kua hako a Iehova hagaao ki a Iopu, ti iloa moolioli ai ko Satani ko e pikopiko. Fakamonuina he Atua a Iopu he mahani fakamooli.​​—Iopu 1:6-12; 2:1-7.

He tau fakatutalaaga ia he Atua mo Satani, kua tutala kia a Iehova ke he aga kelea muitui i loto ia ia ni? Pehē e Tohi Tapu: “Ko e Atua kua hakohako hana puhala.” (2 Samuela 22:31) Pehē foki e Kupu he Atua: “Kua tapu, kua tapu, kua tapu e Iki, ko e Atua hana e malolo oti kana.” (Fakakiteaga 4:8) Ko e tapu kua kakano ko e tavana, fakatapuina, kehe mai he agahala. Ko Iehova kua mitaki katoatoa mo e nakai fai ila. Nakai toka ia ia ha aga kelea.

Ka kua pehē agaia falu, ai ko e tagata mooli a Iopu, ti ko e fakatutalaaga katoa ko e tala fakataitai. Ka e hako nakai e manatu ia? Fakakite mai he falu kupu he Tohi Tapu ko e tagata mooli a Iopu. Ma e fakatai, ia Iakopo 5:7-11, kua fakaaoga a Iopu ko e fakafifitakiaga ke omoomoi e tau Kerisiano ke fakauka he tau magaaho vihi lahi ti mafanatia foki e fakamanatuaga ne moua, na palepale e Iehova e fakauka pihia. To fakalagalaga nakai e fakafifitakiaga ia ka nakai ko e tagata mooli a Iopu mo e nakai mooli e tau totokoaga ha Satani? Lafi ki ai, ia Esekielu 14:14, 20, ne totoku fakalataha a Iopu mo Noa mo Tanielu ko e tau tagata mahani tututonu tokotolu. Tuga a Noa mo Tanielu, ko e tagata mooli a Iopu, ko e tagata ne lahi e tua. Kaeke ko e tagata mooli a Iopu, lata nakai a ia ne totoko ke mooli foki, ko e punaaga he ekefakakelea ki a Iopu?

Maaliali ai, ne fakakite he Tohi Tapu a Satani ko e mena moui mooli fakaagaaga. Ka e liga manamanatu a koe, ‘Hagahaga kelea nakai a ia ki a au mo e magafaoa haaku he vahā foou nei?’

Manamanatu la ke he matakau he tau tagata matahavala ne amanaki ni ti hohoko mai ke he maaga haau. Maaliali ai, ko e haohao mitaki he tau tagata mo e tau mahani mitaki he tau tuutakaina to galo fakahaga. Manamanatu la ke he taha tuaga pihia foki: Ko Satani mo e haana tau temoni​—ko e tau mena momoui fakaagaaga mooli kua totoko ke he Atua, tuga ni a Satani​—kua amanaki ni ti ha hā he lalolagi. Ko e heigoa ka tupu? Manamanatu ke he tau mena kua kitia e koe he tau tala tutupu he motu mo e lalolagi katoa.

• Kitia nakai e koe kua holo ki mua e tau mahani fakahanoa mo e favale, pete he lali e lalolagi katoa ke tautaofi ai?

• Kitia nakai e koe kua holo ki mua e tau mena fakafiafia ne putoia e tau mena fakataulatua, pete kua tokologa e tau matua ne tupetupe ki ai?

• Kitia nakai e koe e takatakaiaga kua moumou fakahanoa, pete ne tau laliaga mitaki ke puipui ai?

• Tuga kia kua fai mena kelea lahi kua lauia e tau tagata​—fai malolō ne omoomoi a lautolu ke matematekelea?

Fakamolemole mailoga ko hai ne fakatupu e tau lekua nei he talahau he Tohi Tapu: “Ti liti hifo ni e tarako lahi, ko e gata tuai haia, kua higoa ko e tiapolo, ko Satani foki ia, ko ia kua fakahehe e lalolagi oti; kua liti hifo a ia ke he lalolagi, kua liti hifo foki hana tau agelu fakalataha mo ia. . . . Oi fakaalofa kia mutolu kua nonofo ke he fonua mo e tahi, ha kua hifo kia mutolu e tiapolo kua ita lahi, ha kua iloa e ia kua tote hana vaha.” (Fakakiteaga 12:9, 12) He kitekite ke he tau fakamooliaga, tokologa e tagata ne iloa ko Satani ko e mena moui fakaagaaga hagahaga kelea, kua malolō lahi he omoomoi e lalolagi ne takai viko ia tautolu.

Liga manamanatu a koe to moua fēfē e puipuiaga. Ko e manatu aoga a ia. To fakakite mai he vala tala i mua falu lagomataiaga aoga.