Fanau au he matakavi ne tokotoko mitaki i Bilbao i Sepania tokelau. Ko au ko e tama ke uaaki he tau fanau tokofā. Ko e magafaoa ha mautolu ko e tau Katolika malolō, ti fano au he tapu he tau aho oti. He 23 e tau haaku, ne eke au mo faiaoga​—ko e gahua ne fiafia lahi au ki ai ti taute e au ke he 40 e tau. Lafi ke he falu matakupu, kua matalahi au ke fakaako ke he lotu Katolika, he tau mogo afiafi kua eke au mo faiaoga lotu​—ke fakaako e tau fanau fifine ke lata mo e tau fakafetuiaga fakamua ha lautolu.

Mole 12 e tau he mau fiafia, ne takape au mo e tokofā e tama fifine ke leveki. Ne 33 laia e tau haaku he moui! Ne lali au ke moua e mafanatia mai he tua faka-Katolika haaku, ka e loga e hūhū ne fa liu manatu. Fa manatu au: ‘Ko e ha ne matutaki e tau tagata ke mamate ka fitā he fakahao e Keriso a tautolu? Ko e ha ne liogi a tautolu ke hoko mai e Kautu he Atua ka kua o atu e tau tagata mitaki ke he lagi?’ Ka e mua atu, manatu au: ‘Kaeke ke fakafili he Atua a tautolu ka mamate, ko e hā ne kua lata ia tautolu ke toka e lagi, fakakikiveka, po ke afi tote ma e fakafiliaga fakahiku?’

Ne tala age e au e tau hūhū ia ke he falu akoako ne feleveia mo au. Taha ia lautolu ne tali: “Ai iloa au. Hūhū ke he pisopo. Fai aoga kia? Na talitonu a koe ke he Atua, pihia nakai? Toka ni pihia!” Ka e fakatumau ni au ke kumi e tau tali. Mogo fakamui ne fano au ke he tau aoga he tau Jesuit, tau Penetekoso, mo e tau Gnostic. Ka e nakai fai ne mafanatia e tau tali ke he tau hūhū haaku.

Ko e mogo ne 60 tumā e tau tau haaku, taha e tama aoga ne fitu e tau ne uiina au ke fano he feleveiaaga he Tau Fakamoli a Iehova. Ne fiafia au ke he tau mena ne kitia mo e logona e au, ka ko e lavelave lahi he moui haaku, ti nakai liu au matutaki foki mo e Tau Fakamoli he mogoia. Ua e tau he mole, ko e hoa Fakamoli ko Juan mo Maite ne nokonoko e gutuhala haaku. Tolu e mahina ne hokulo e fakatutalaaga hūhū mo e tali ha mautolu ne fakahiku takitaki atu ke he fakaako Tohi Tapu.

Amanaki tumau au ke he tau magaaho fakaako takitaha! Ne kumikumi fakamatafeiga e au e tau mena oti, fakaaoga e  au tolu e lagaki kehekehe he Tohi Tapu ke iloa tonu kua fakaako he Tau Fakamoli a Iehova e kupu mooli. Nakai leva ti mailoga e au kua leva tuai e fakauaua fakalotu haaku. Tupetupe lahi au he fekehekeheaki lahi e tau mena fakamua ne taofi au ki ai mo e tau mena ne fakaako au mogonei mai he Tohi Tapu. Kua ofomate au, he tuga kua mahuohuo hake e tau taofiaga mauokafua malolō haaku.

Ti ko e taane ke uaaki haaku ne gagao lahi mahaki ti mate. He magaaho ia foki, ne litaea au mai he gahua haaku ti fai magaaho ne fano kehe au mai i Bilbao. Ne ō foki a Juan mo Maite. Momoko ai, ne oti e fakaako Tohi Tapu haaku. Ka e hokulo ke he loto haaku, ne iloa e au kua moua tuai e au e koloa uho. Nakai nimo ia au.

Kavi ke he 20 e tau he mole, mogo kua 82 e tau haaku, ne liliu mai a Juan mo Maite ki Bilboa ti o mai feleveia mo au. Ko e fiafia hā ia haaku he liu kitia a laua! Mailoga e au kua nakai nimo e Iehova au, ti matutaki e fakaako Tohi Tapu haaku. Ne fakauka lahi a Juan mo Maite ki a au, he lagaloga e fatiaki e au e tau hūhū agaia ni. Ne lata au ke logona tumau e tau fakakakanoaga faka-Tohi Tapu ke fakamamutu mai he tau logonaaga mauokafua he tau taofiaga fakamua haaku. Manako foki au ke iloa mitaki ke fakamaama e kupu mooli he Tohi Tapu ke he tau kapitiga mo e tau magafaoa haaku.

He aho ne papatiso ai au he 87 e tau he moui, ko e aho fiafia lahi mahaki he moui haaku. Ne taute e papatisoaga fakalataha mo e toloaga he Tau Fakamoli a Iehova. Ne taute fakahako pauaki mai he motua Kerisiano e lauga ne fakavē ke he Tohi Tapu ki a mautolu ka papatiso. Ne tagi au ha ko e lauga. Ne fanogonogo au ki ai tuga ni ko Iehova ne tutala fakahako mai ki a au. He mole e papatiso haaku, ne tokologa e Fakamoli ne o mai mo e nava ki a au​—pete he laulahi ia lautolu ne nakaila feleveia mo au fakamua!

Ne iloa tumau e au ko Iesu Keriso “ko e puhala.” (Ioane 14:6) Ka e fakamalolō he fakaako Tohi Tapu haaku au ke iloa a Iehova, ko ia ne takitaki ki ai e Iesu a tautolu. Maeke au mogonei ke liogi ke he Atua ko e haaku Matua fakahele mo e Kapitiga. He totou e au e tohi Fakatata Atu ki a Iehova * ko e hikiaga he moui haaku. Ne totou fakamua e au ti oti he taha ni e pō! Ne aamotia au ke iloa e fakaalofa hofihofi noa mooli ha Iehova.

He onoono ki tua mo e leva e kumi haaku ke he kupu mooli fakalotu, ne manamanatu au ke he tau kupu ha Iesu: “Kia ole atu a mutolu, ti foaki mai ai kia mutolu; kia kumikumi a mutolu, ti moua ai e mutolu; kia tukituki atu a mutolu, ti vevete mai ai kia mutolu.” (Mataio 7:7) Ha kua moua e au mogonei e tau tali ne manako lahi au, kua fiafia lahi au ke tala age ai ke he falu.

He 90 e tau he moui, ne logona hifo e au e tote fakaagaaga haaku. Ko e tau feleveiaaga oti ne fina atu au ke he Fale he Kautu ko e tau magaaho pauaki a ia​—ha ko e iloilo uho kua moua e au mo e fakalataha mo e tau matakainaga fakahele haaku. Ne manako lahi au ke liu faiaoga foki he lalolagi Parataiso ne mavehe mai. (Fakakiteaga 21:3, 4) Amaamanaki lahi au ke kitia e tau fakahele ne kua mamate ka liliu momoui ti maeke mogoia ke fakaako e kupu mooli he Tohi Tapu ki a lautolu. (Gahua 24:15) Manako lahi mahaki au ke fakamaama ki a lautolu e mena fakaalofa uho ne mai e Iehova he vahā motua haaku!