Ko e Tau Fakamauaga kua Lilifu ki Mua he Atua mo e Tagata
Ko e Tau Fakamauaga kua Lilifu ki Mua he Atua mo e Tagata
“Kua eke e taonaga i Kana . . . Ne ui foki ki a Iesu mo e hana tau tutaki ke o age ke he taonaga.”—IOANE 2:1, 2.
1. Hagaao ke he heigoa e tala ki a Iesu i Kana?
KO IESU, haana matua fifine, mo e falu tutaki foki haana kua iloa e fiafia ka moua he fakamauaga lilifu he tau tagata he Atua. Taha e fakamauaga kehe lahi ha kua taute he Keriso e mana fakamua haana i ai, ti lafi atu ke he fiafia he magaaho ia. (Ioane 2:1-11) Liga kua fakalataha atu a koe mo e olioli e fakamauaga he tau Kerisiano ne manako ke fekafekau tokoua ki a Iehova ko e tau tagata fiafia kua mau. Po ke amanaki foki a koe ke he fakamauaga ni haau po ke lagomatai e kapitiga ke kautū e fakamauaga haana. Ko e heigoa mogoia ka lafi ke he kautūaga ia?
2. Ko e heigoa e tau vala tala ne toka i loto he Tohi Tapu hagaao ke he tau fakamauaga?
2 Kua moua he tau Kerisiano e tomatoma he Kupu omoomoi he Atua ke lahi e lagomatai he magaaho ka pulega e tagata taane mo e fifine ke mau. (2 Timoteo 3:16, 17) Mooli, kua nakai fakamatafeiga mai he Tohi Tapu e tau puhala he fakamauaga faka-Kerisiano. Pihia ha kua kehekehe e tau aga fakamotu mo e tau poaki he matafakatufono he matakavi mo e vahā. Ke fakatai ki ai, i Isaraela i tuai kua nakai fai fakatokaaga pauaki ma e fakamauaga. He aho fakamauaga, ne uta he taane ke he kaina ni haana po ke kaina he matua taane haana e hoana. (Kenese 24:67; Isaia 61:10; Mataio 1:24) Ne fakakite he lakaaga nei ke he tau tagata kua mau tuai a laua, ti nakai fai fakatokaaga pauaki ne fa mahani ke he vahā nei.
3. Ko e heigoa e magaaho ia i Kana ne fai mena ne lafi atu e Iesu?
3 Ne mailoga he tau Isaraela e lakaaga ia ke eke mo fakamauaga. He magaaho fakamui, liga fakalataha atu a laua ke he galue mauhoana, tuga ne totoku he Ioane 2:1. Loga e fakaliliuaga he Tohi Tapu ne tohi pehē e kupu ia: “Kua ha ha ai e fakamauaga i Kana.” Ka kua hako e kupu he vagahau fakamua ko e “taonaga” po ke “galue he fakamauaga.” * (Mataio 22:2-10; 25:10; Luka 14:8) Ne fakamahino mai he tala, kua ha ha i ai a Iesu mo e fai mena ne lafi atu e ia ke he taonaga he fakamauaga Iutaia. Ka ko e matapatu manatu, ko e puhala ne taute aki e fakamauaga he vahā ia kua kehe mai he puhala fa mahani mogonei.
4. Ko e fakamauaga fēfē ne fifili he falu Kerisiano, ti ko e ha?
4 He tau motu loga he vahā nei, ko e tau Kerisiano ne manako ke mau kua lata ke mailoga e tau poaki he matafakatufono. He taute pihia e lautolu, to mau a lautolu ke he puhala ne talia he matafakatufono. Ti kua taute ai e fakatokaaga tote mo e mukamuka ne takitaki he ikifakafili, pule he maaga, po ke fekafekau he lotu ne fakaatā he Motu. Ne fifili falu ke mau he puhala ia, ti liga gahoa ni e magafaoa po ke tau kapitiga Kerisiano ka ui ke fakalataha mai ke fakamooli e fakamauaga po ke fiafia auloa e magaaho aoga nei. (Ieremia 33:11; Ioane 3:29) Pihia foki, ko e falu Kerisiano kua liga fifili ke fakatote e taonaga po ke fakafiafiaaga ka lahi e pulega mo e tau totogi. Ka e, liga pulega a laua ke kai ni mo e falu kapitiga tata. Ti ko e heigoa ni e tau manako fakatagata ha tautolu hagaao ke he mena nei, kua lata ia tautolu ke mailoga kua liga kehe e tau onoonoaga he falu Kerisiano kua motua ke he ha tautolu.—Roma 14:3, 4.
5. Ko e ha ne manako e tokologa he tau Kerisiano ke fai lauga e fakamauaga ha lautolu, mo e ko e heigoa ne fakakite he lauga?
5 Kua loga lahi e hoa Kerisiano ne fifili ke fai lauga ne fakavē ke he Tohi Tapu he fakamauaga ha lautolu. * Ne iloa e lautolu ko Iehova ne fakatū e fakamauaga ti foaki he Kupu haana e tomatomaaga pulotu ke he puhala ka kautū ai e fakamauaga mo e tamai e fiafia. (Kenese 2:22-24; Mareko 10:6-9; Efeso 5:22-33) Kua loga e hoa ne manako ke fakalataha e tau kapitiga mo e tau magafaoa Kerisiano ha lautolu ke he magaaho fiafia nei. Pete ia, kua lata ke fēfē e onoonoaga ha tautolu ke he tau poaki he matafakatufono mo e tau puhala kehekehe ne loga, ti pihia foki ke he tau gahua ne fa mahani ke he matakavi? To fakatutala e vala tala nei ke he tau tutuaga he tau faahimotu kehekehe. Ti liga matakehe lahi falu ke he mena ne iloa e koe po ke mena fa taute he matakavi haau. Mohā ia, to mailoga e koe e falu matapatu fakaakoaga po ke falu puhala fa mahani kua aoga ke he tau fekafekau he Atua.
Ko e Fakamauaga Lilifu e Fakamauaga Matafakatufono
6, 7. Ko e ha kua lata ia tautolu ke mailoga e tau puhala matafakatufono ka amanaki ke mau, mo e fakakite fēfē e tautolu e mena nei?
6 Pete kua fakatū e Iehova e fakamauaga, kua moua foki he tau fakatufono he tagata e pule ke he tau mena taute he tau tagata ne amanaki ke mau. Kua latatonu e mena nei. He pehē a Iesu: “Ati uta a kia Kaisara e tau mena a Kaisara; ka e uta ke he Atua e tau mena he Atua.” (Mareko 12:17) Tatai foki, ne fakatonu he aposetolo ko Paulo: “Kia omaoma e tau tagata oti kana ke he tau tui ne mua; ha kua nakai fai pule kua nakai mai he Atua; ka ko lautolu ha ha i ai e pule ainei, kua kotofa he Atua a lautolu.”—Roma 13:1; Tito 3:1.
7 He tau motu loga ko Kaisara, po ke tau pule he motu, ka fifili ko hai kua lata ke mau. Ti, he magaaho ka fifili e tau Kerisiano tokoua ne fakaatā faka-Tohi Tapu ke mau, kua fakaeneene a laua ke omaoma e tau fakatufono he matakavi. Lata mogoia ke moua e tohi fakaatā, fakaaoga e hukui ne kotofa he Motu, mo e liga tohia e fakamauaga katoa. He magaaho ne poaki e Kaisara Aokuso ke fai “tohiaga,” ne talia ai e Maria mo Iosefa, ti o atu ki Petelehema “kia tohia.”—Luka 2:1-5.
8. Kua mauokafua fēfē e fakamauaga, ti ko e heigoa ne taute he Tau Fakamoli a Iehova ke fakakite kua maama e lautolu?
8 He magaaho ka mau e tau Kerisiano tokoua ke he puhala matafakatufono mo e kua talia, ko e fakalatahaaga ia kua mauokafua ki mua he Atua. Ti, nakai mau lagaloga e Tau Fakamoli a Iehova, po ke fakafoou tumau e tau omonuo, tuga ka fakamanatu e fakamauaga ha laua ka 25 po ke 50 e tau he mau. (Mataio 5:37) (Ne fakaheu he falu lotu e fakatokaaga he fakamauaga ne talia he matafakatufono, he pehē kua nakai tonu e fakamauaga ia ato taute he akoako po ke faifeau e fakaholoaga pauaki po ke fakapuloa e ia e hoa ko e taane mo e hoana.) He tau motu loga, ne foaki age he fakatufono e pule ke he fekafekau he Tau Fakamoli a Iehova ke taute e tau fakamauaga. Kaeke ke pihia, kua liga manako a ia ke taute fakalataha ai mo e lauga he fakamauaga ke he Fale he Kautu. Ko e fale he tapuaki mooli a ia he matakavi ti kua lata ke lauga i ai hagaao ke he fakaholoaga nei, ne fakatū e Iehova ko e Atua.
9. (a) Hagaao ke he fakamauaga he fakatufono, ko e heigoa he hoa Kerisiano ka liga fifili ke taute? (e) Liga putoia fēfē e tau motua ke he tau pulega he fakamauaga?
9 He falu motu, ne poaki he fakatufono ke mau e hoa he ofisa fakatufono, tuga e fale tolo he taone, po ke i mua he hukui ne kotofa he motu. Ne fa fifili e tau Kerisiano ke taute e lauga he fakamauaga ke he Fale he Kautu ka oti e lakaaga matafakatufono ia he aho ia ni po ke aho hake. (Kua nakai manako a lautolu ke loga e aho ka mole he vahāloto he fakatokaaga he motu mo e lauga faka-Tohiaga Tapu, ha kua mau a lautolu ki mua he Atua, tau tagata, mo e fakapotopotoaga Kerisiano foki.) Kaeke ke manako e hoa ne fakamau he fakatufono ke fai lauga he taha Fale he Kautu, kua lata ia laua ke moua e fakaatāaga he tau motua he Komiti Fekafekau he Fakapotopotoaga. Ti ka iloa e tuaga mitaki he hoa, to fafati he tau leveki nei ke nakai fakatauhele he magaaho he fakamauaga e tau feleveiaaga fa mahani mo e tau fakaholoaga ne fitā he setulu he Fale he Kautu. (1 Korinito 14:33, 40) To onoono foki a lautolu ke he tau fakatokaaga ne liga ole he hoa ke taute i loto, mo e fifili kua lata nakai ke fakailoa hagaao ke he fakaaoga he Fale he Kautu.
10. Kaeke kua lata ke taute e fakamauaga he fakatufono, to lauia fēfē mogoia e lauga he fakamauaga?
10 Ko e motua ne taute e lauga he fakamauaga to lali ke fakamafana, atihake fakaagaaga, mo e fakalilifu e lauga haana. Kaeke kua fakamau mua he motu e hoa, to talahau fakamahino mogoia he motua kua fitā a laua he mau he fakatatau ke he matafakatufono ha Kaisara. Kaeke kua nakai talahau e tau omonuo he fakamauaga he motu, liga manako a laua ke talahau ai ka lauga. * Kaeke putoia e tau omonuo he fakamauaga ia he motu ka e manako e hoa ne mau foou ke liu talahau ki mua a Iehova mo e fakapotopotoaga, to talahau ai ke he puhala kua fakahoko tuai, he fakakite kua fitā a laua he “fakalataha.”—Mataio 19:6; 22:21.
11. He falu matakavi, fēfē e puhala ne mau e hoa, ti ko e heigoa e lauiaaga ke he lauga he fakamauaga?
11 He falu motu, liga nakai fakaatā he fakatufono e hoa ke fakamau he ha fakatokaaga, nakai ki mua foki he hukui he fakatufono. Ka kua mau ni e hoa he magaaho ka fakakite e tohiaga he fakamauaga ne saini e laua ke he tagata he fakatufono. Ka oti ti tohia e setifikete he fakamauaga. Ati fakailoa ai e hoa ko e taane mo e hoana, ko e aho anei he fakamauaga ha laua. Tuga he kitia i luga, to liga manako e hoa ne mau ke muitua e tohiaga ia ke taute fakamafiti e lauga ne fakavē ke he Tohi Tapu he Fale he Kautu. Ko e matakainaga motua fakaagaaga ne fifili ke lauga to fakamaama ki a lautolu oti i ai kua mau tuai a laua kakano he tohiaga ne kua taute. Ko e ha omonuo kua taute hagaao ke he mena ne tohi he paratafa 10 mo e matahui tala. Ko lautolu ne fakalataha ke he Fale he Kautu to fiafia auloa mo e hoa, ti aoga mai he fakatonuaga ne foaki he Kupu he Atua.—Lologo a Solomona 3:11.
Tau Fakamauaga Fakamotu mo e Fakatufono
12. Ko e heigoa e fakamauaga fakamotu, ti ko e heigoa e fakatonuaga ka taute he mole e fakamauaga pihia?
12 He falu motu, kua taute he tau hoa e mena ne fakahigoa ko e fakamauaga fakamotu (po ke he magafaoa). Ti nakai hagaao e mena nei ke he tau tagata ne nonofo tokoua, po ke hagaao ke he tuaga maupouli, ne liga fai fakaatāaga he falu matakavi ka e nakai fakamau he fakatufono. * Kua tala a tautolu ke he fakamauaga ne taute fakatatau ke he puhala fakamotu ne mailoga he tau tagata he magafaoa po ke matakavi. Ti liga putoia ke he mena nei e totogi katoa mo e taliaaga he totogi e kitofaitaane, puhala nei ne mailoga he fakatufono mo e he Tohi Tapu e fakamauaga he hoa. Kua kitia he fakatufono e fakamauaga fakamotu pihia ke tonu, matafakatufono, mo e mauokafua. Ka mole ia, kua fa mahani ke tohia e fakamauaga fakamotu ia kua taute, ti ko e taute pihia ne moua ai he hoa e setifikete he fakatufono. Kua puipui he tohiaaga e hoa po ke hoana kaeke ke takape a ia pihia foki mo e ha tama ka fanau a mui. Ti fakamalolō he fakapotopotoaga e hoa ne taute e fakamauaga fakamotu pihia ke tohia fakamafiti e fakamauaga. Fuluola ai, tuga kua tohi pauaki foki i lalo he Fakatufono faka-Mose e tau fakamauaga mo e tau fanauaga.—Mataio 1:1-16.
13. He mole e fakamauaga fakamotu, ko e heigoa kua latatonu he lauga he fakamauaga?
13 Ko e hoa ne fakalataha he matafakatufono tuga e fakaholoaga fakamotu kua eke mo taane mo e hoana he magaaho ne taute e fakamauaga ia. Tuga ne kitia i luga, ko e tau Kerisiano ne taute e fakamauaga matafakatufono pihia kua liga manako ke fai lauga fakamauaga fakalataha mo e tau omonuo he Fale he Kautu. Kaeke kua taute ai, to fakailoa he tagata lauga kua fitā e hoa he mau he fakatatai ke he tau fakatufono ha Kaisara. To taha ni e lauga pihia. Kua taha e fakamauaga, tuga anei ko e fakamauaga fakamotu (magafaoa) ne matafakatufono, mo e taha e lauga faka-Tohi Tapu. He taute ua e tau matagahua nei he taha e mogo, liga he aho taha ia ni, ka lafi ke he lilifu he fakamauaga faka-Kerisiano he matakavi.
14. Ko e heigoa ka taute he Kerisiano kaeke kua fakaatā ua e fakamauaga fakamotu mo e he fakatufono?
14 He falu motu ne talia he fakatufono e fakamauaga fakamotu, kua fai tauteaga foki ma e fakamauaga he fakatufono. Ko e fakamauaga he fakatufono kua fa taute i mua he hukui he fakatufono, ti liga talahau tokoua e laua e tau omonuo mo e saini e laupepa tohia. Kua fiafia falu hoa Kerisiano ke he fakamauaga he fakatufono nei nakai ke he fakamauaga fakamotu. Kua nakai fai matafakatufono ke taute ua e fakamauaga nei; kua tonu ua e tau fakaholoaga ia. Ko e tau mena ne tohi he paratafa 9 mo e 10 hagaao ke he lauga mo e tau omonuo he fakamauaga kua hagaao foki ke he mena nei. Ko e mena ne aoga kua fakamau tuai e hoa ke he puhala lilifu ki mua he Atua mo e tagata.—Luka 20:25; 1 Peteru 2:13, 14.
Fakatumau e Lilifu he Fakamauaga
15, 16. Putoia fēfē e fakalilifu ke he fakamauaga?
15 He magaaho ne lekua e fakamauaga he Patuiki Peresia, ne foaki he iki fakatonutonu ko Memukana e tomatomaaga aoga ke fakagahuahua—‘ke fakalilifu e tau fifine oti ke he tau taane ha lautolu.’ (Eseta 1:20) He tau fakamauaga Kerisiano, kua nakai lata e tomatoma ia ke poaki he ha patuiki; kua manako e tau hoana ke fakalilifu e tau taane ha lautolu. Pihia foki, ko e tau taane Kerisiano kua fakalilifu e tau hoa ha lautolu mo e nava a lautolu. (Tau Fakatai 31:11, 30; 1 Peteru 3:7) Ke fakakite e fakalilifu he fakamauaga ha tautolu, kua nakai lata ke toka ke loga e tau he mole to taute laia. Kua lata ke fakakite he magaaho tonu ia ni, kamata mai he aho fakamauaga.
16 Ko e tagata taane mo e fifine—ko e taane mo e hoana—kua nakai ni ko laua ne lata ke fakakite e lilifu he aho mau. Kaeke ke taute he motua Kerisiano e lauga he fakamauaga, kua lata foki e lauga ia ke fakamailoga he lilifu. Kua lata ke lauga pauaki atu ke he hoa. He fakalilifu ki a laua, to nakai talahau he tagata lauga e tau tala vaiga po ke tau tala tuai. Nakai lata ia ia ke talahau foki e tau mena fakatagata ka fakamā e hoa mo e tau tagata fanogonogo. Ka e lata ia ia ke lali ke fakamafana mo e atihake, he fakatokoluga e Punaaga he fakamauaga mo e Haana a tomatomaaga mitaki lahi. E, to maeke he lauga lilifu he motua ke lagomatai e fakamauaga ke fakalilifu a Iehova ko e Atua.
17. Ko e ha kua ha ha ai e puhala matafakatufono ke he tau fakamauaga faka-Kerisiano?
17 Liga kua mailoga e koe i loto he vala tala nei e tau manatu loga hagaao ke he tau puhala matafakatufono ke he fakamauaga. Ko e falu puhala kua liga nakai lautonu mo e matakavi haau. Pete ia, kua lata ia tautolu oti ke mataala kua aoga ke fakakite e fakalilifu ke he tau fakaholoaga he fakamauaga he Tau Fakamoli a Iehova ke he tau fakatufono he matakavi, ha ko e tau poakiaga ha Kaisara. (Luka 20:25) Ne fakamalolō mai a Paulo ki a tautolu: “Hanai, kia ta atu ke he tau tagata oti kana ha lautolu a tau mena; ko e poa kia lautolu kua lata ki ai e poa; ko e telu kia lautolu kua lata ki ai e telu; . . . ko e lilifu kia lautolu kua lata ki ai e lilifu.” (Roma 13:7) E, kua latatonu he Kerisiano, tali mai he aho he fakamauaga, ke fakalilifu e fakaholoaga ne fakatoka he Atua ma e vahā nei.
18. Ko e heigoa e taha vala he fakamauaga kua lata ke mataala ki ai, mo e to moua e tautolu i fe e tau vala tala ke he matakupu nei?
18 Kua loga e tau mau Kerisiano ne oti ti taute e tau fakalatahaaga—ko e taonaga, galue, po ke fakafiafiaaga. Manatu na fifili e Iesu ke finatu ke he taonaga pihia. Kaeke kua fai fakalatahaaga pihia, maeke fēfē he fakatonuaga he Tohi Tapu ke lagomatai a tautolu ke mataala to tamai he mena nei e lilifu ke he Atua mo e higoa mitaki a laua ne mau foou mo e ke he fakapotopotoaga Kerisiano? To fakatutala e vala tala ka mui mai ke he matakupu ia? *
[Tau Matahui Tala]
^ para. 3 Kua liga fakaaoga e kupu taha ia ni ma e galue ne nakai matutaki ke he fakamauaga.—Eseta 9:22, Septuagint.
^ para. 5 Ko e lauga ma e fakamauaga ne 30 e minuti ne mataulu “Fakamauaga Lilifu ki Mua he Atua,” kua fakaaoga he Tau Fakamoli a Iehova. Ne talahau e tomatoma faka-Tohiaga Tapu ne moua he tohi Ko e Mena Galo he Fiafia he Magafaoa mo e falu tohi he Tau Fakamoli a Iehova. Ti lagomatai lahi e fakatutalaaga ma e hoa ne amanaki ke mau mo e ki a lautolu oti ne fakalataha atu ke he fakamauaga.
^ para. 10 Kaeke ke manako e fakatufono he matakavi ke fakaaoga e tau omonuo kehe, kia fakaaoga e tau omonuo nei ne fakalilifu e Atua. Ma e kitofaihoana: “Ko au ko [higoa he taane] to eke a koe ma [higoa he fifine] mo hoana mau haaku, ke fakaalofa mo e ofania he fakatatau ke he fakatufono he Atua i loto he tau Tohiaga Tapu ma e tau taane Kerisiano, he nonofo a taua ke he lalolagi he fakatatau ke he fakaholoaga he Atua ma e fakamauaga.” Ma e kitofaitaane: “Ko au ko [higoa he hoana] to eke a koe ma [higoa he taane] mo taane mau haaku, ke fakaalofa mo e ofania mo e fakalilifu hokulo, he fakatatau ke he fakatufono he Atua i loto he tau Tohiaga Tapu ma e tau hoana Kerisiano, he nonofo a taua ke he lalolagi he fakatatau ke he fakaholoaga he Atua ma e fakamauaga.”
^ para. 12 He The Watchtower ia Me 1, 1962, lau tohi 287, kua foaki e tau talahauaga hagaao ke he maupouli.
^ para. 18 Kikite foki e vala tala “Fakatolomaki e Fiafia mo e Lilifu he Aho Fakamauaga Haau,” he The Watchtower ia Oketopa 15, 2006, he lau tohi 28.
Manatu Nakai e Koe?
• Ko e ha kua lata ia tautolu ke mailoga e tau matafakatufono mo e puhala fakaagaaga he tau fakamauaga?
• Kaeke ke mau e tau Kerisiano tokoua he fakamauaga he fakatufono, ko e heigoa ka fifili e laua ke taute fakamafiti ka mole atu ai?
• Ko e ha ne taute e tau lauga he fakamauaga he Fale he Kautu?
[Tau Hūhū he Fakaakoaga]
[Fakatino he lau 8]
He fakamauaga ha Isaraela i tuai, ne uta he taane ke he kaina haana po ke kaina he matua taane haana e hoana
[Fakatino he lau 11]
He mole e fakamauaga fakamotu, to manako e tau Kerisiano ke fai lauga he Fale he Kautu