Ko e 60 minuti fakamua he moui he tama mukemuke i fafo he manava he matua fifine ko e magaaho uho lahi he hikiaga. Ko e ha? Ha ko e pipiaga he tau matua fifine mo e tau tama mukemuke fanau foou ha lautolu he magaaho aoga lahi nei kua fakamafiti e holo ki mua he tupuaga mo e feakiaga he tau fanau ha lautolu. *

Ko e heigoa ati fakalagalaga e matua fifine ke hofihofi e levekiaga ke he tama mukemuke fanau foou haana? Fakamaama he Porofesa ko Jeannette Crenshaw he The Journal of Perinatal Education ka lahi e hormone oxytocin “ne fakaohooho e tau logonaaga fakamatua fifine he oti e fanau ha ko e aamo, onoono, mo e fagai aki he matua fifine e huhu e tama mukemuke fanau foou haana.” Ko e taha hormone ne fakatoka mai he magaaho nei kua “lagomatai e matua fifine ke fakafetui mo e tama mukemuke haana” ti fakamalolō e matutakiaga mo e tama mukemuke haana. Ko e ha ne aoga lahi e mena ia?

Ko e pipiaga tata he matua fifine mo e tama mukemuke ne tamata he ha tautolu a Tufuga fakaalofa, ko Iehova ko e Atua. * Ne fakaheke e Patuiki ko Tavita ke he Atua he “fakafanau . . . mai he manava” ti moua e ia e mafanatia he totō he matua fifine haana. Liogi e ia: “Ne tuku atu au kia koe tali haku a fanau mai, ko koe ni ko e haku Atua tali he nofo au ke he manava he haku a matua fifine.”​—Salamo 22:9, 10.

MANAMANATU: Ka tufugatia he Atua e puhala ofoofogia ia ke maeke mooli he matua fifine ke hofihofi e fakaalofa ke he tama mukemuke haana ti matutaki ke lata mo e tau manako he tama mukemuke, to nakai kia manamanatu pauaki foki e Atua ke he tau manako ha tautolu takitokotaha, ko e “fanau he Atua”?​—Gahua 17:29.

Ko Iesu Keriso ne iloa mitaki e Tufuga, ne fakaako: “Nakai kia fakafua ua e manu ikiiki ke he asari? Nakai to foki taha ia laua ke he kelekele ka noa mo e Matua ha mutolu. Ka kua oti kana he totou ha mutolu a tau lauulu. Ko e mena ia, ua matakutaku ai a mutolu; mena mua a mutolu ke he tau manu ikiiki loga.”​—Mataio 10:29-31.

Nakai tokologa a tautolu ne onoono fakamakutu ke he tau manu lele ikiiki takitaha, pihia foki ka taha ia lautolu ne to ke he kelekele. Ka kua mailoga he ha tautolu a Matua he lagi e tau manu lele takitaha ia!  Ti ko e tau manu lele​—pete he loga e manu lele​—kua nakai fakaai ki a ia ke mua hake ke he ha tagata. Kua maaliali mogoia e fakaakoaga: Lata a koe ke “ua matakutaku” kua nakai mailoga he Atua a koe. Ka e fiafia mooli a ia ki a koe!

Fakamafana he Tohi Tapu a tautolu

• “Ha ha he tau mena oti ni e tau fofoga a Iehova; kua kitekite ni a ia ke he tau tagata mahani kelea katoa mo e tau tagata mahani mitaki.”​—TAU FAKATAI 15:3.

• “Ko e tau fofoga a Iehova kua hagao ia kia lautolu ne tututonu, mo e hana tau teliga foki ke he kalaga ha lautolu.”​—SALAMO 34:15.

• “To fiafia au mo e olioli ke he hāu a fakaalofa mai; ha ko koe kua kitekite mai ke he haku a mamahi; kua fioia e koe au ka kua matematekelea au.”​—SALAMO 31:7.

Fai kehe nakai ke he tau momoui ha tautolu ka iloa e tautolu kua fiafia mooli e Atua ke he tau tuaga ha tautolu mo e onoono fakaalofa ki a tautolu? Fai kehe mooli, tuga a Hannah, * mai i England ne fakamaama:

“Lagaloga ne logona hifo e au kua nakai fakaalofa a Iehova ki a au ti nakai tali ai e tau liogi haaku. Manatu au ha kua nakai lahi e tua haaku. Logona hifo e au kua fakahala po ke fakaheu au ha kua nakai aoga au. Logona hifo e au kua nakai leveki mai e Atua.”

Ka kua nakai liu a Hannah ke fakauaua ke he onoonoaga mo e fakaalofa ha Iehova. Ko e heigoa ne hiki e logonaaga haana? “Ko e hiki fakahaga,” he fakamaama e ia. “Manatu e au e taha lauga Tohi Tapu he loga e tau tau kua mole ke he poa lukutoto ha Iesu ne lauia lahi au ti lagomatai au ke logona e mafanatia he fakaalofa ha Iehova. Ti ka tali e tau liogi haaku, fa tagi au he mailoga kua fakaalofa mooli a Iehova ki a au. He fakaako e Tohi Tapu mo e fina atu foki he tau feleveiaaga Kerisiano, ne fakaako fakalahi ki a au hagaao ki a Iehova, haana aga, mo e logonaaga haana hagaao ki a tautolu. Kitia maaliali e au mogonei e lalagoaga mo e fakaalofa ha Iehova ki a tautolu oti mo e makai mooli haana ke leveki a tautolu takitokotaha.”

Kua atihake e talahauaga ha Hannah. Ka e iloa mooli fēfē e koe na maama mo e manatu he Atua e tau logonaaga haau? To kumikumi e vala tala ka mui mai ke he hūhū nei.