He vala tala fakamua, fakatutala a tautolu ke he fakamailoga ne foaki e Iesu. Fakakite he fakamailoga ia kua fakatū e Kautu he Atua i luga he lagi mo e ko Iesu Keriso e Patuiki.

Talahau he Tohi Tapu ko e magaaho ka pule a Iesu ke he Kautu, ne tolo hifo e ia a Satani mo e tau temoni mai he lagi. Ti ko e lalolagi ni kua lauia he tau gahua ha lautolu, ko e taha kakano a ia ne kelea lahi mahaki e tau tuaga tali mai he tau 1914.​—Fakakiteaga 12:7, 9.

Pete e tau tuaga kua kelea lahi he lalolagi, ko Iesu ko e Patuiki he Kautu he Atua kua taute e tau mena ke lagomatai e tau tagata he lalolagi katoa. Fakaaue ke he gahua fakaako Tohi Tapu he lalolagi katoa ne talahau tuai e Iesu, tokologa kua fakaako mo e fakagahua e tau matapatu fakaakoaga he Tohi Tapu he tau momoui ha lautolu he tau aho takitaha. (Isaia 2:2-4) Totou miliona kua fakaako ke moua e onoonoaga lagotatai ke he gahua tupe, ke fakaholo ki mua e moui magafaoa ha lautolu, mo e ke fakaaoga fakamitaki e tau koloa fakatino ka e nakai fakatupa ke moua ai. Ko e tau tagata nei kua fakaako ke aoga e tau momoui mo e eke mo tau tagata kua manako e Atua ke nonofo i lalo hifo he Kautu haana.

Kua fitā a Iesu he pule he lagi, ka e pule agaia e tau fakatufono he tagata he lalolagi. Pete ia, poaki e Atua ki a Iesu: “Kia pule a koe ki mua ha lautolu kua fai fi kia koe.” (Salamo 110:2) Nakai leva, to moumou katoatoa e Iesu e tau tagata oti ne totoko mo e tamai e fakatotokaaga ki a lautolu kua makai ke omaoma ke he Atua.

He magaaho ia, to fai mena e Kautu he Atua ka taute ke

• Moumou e lotu fakavai. Ko e tau lotu ne fakaako e tau mena pikopiko hagaao ke he Atua mo e fakamamahi e moui he tau tagata, to utakehe. Fakatatai he Tohi Tapu e lotu fakavai ko e fifine fakataka. To ofo e tokologa ka moumou ai.​—Fakakiteaga 17:15, 16.

• Fakaotioti e pule he tagata. To taute he Kautu he Atua e taha mena ke fakaotioti e tau pule oti he tagata.​—Fakakiteaga 19:15, 17, 18.

• Utakehe e tau tagata kelea. Ka e kua a lautolu kua hagaaki ke taute e tau mena kelea mo e nakai talia ke omaoma ke he Atua? “To vevehe kehe mai he motu a lautolu ne mahani kelea.”​—Tau Fakatai 2:22.

• Fakaoti katoatoa a Satani mo e tau temoni. To nakai maeke a Satani mo e tau temoni ke “fakahehe . . . e tau motu.”​—Fakakiteaga 20:3.

Ko e heigoa e kakano he tau mena oti nei ma lautolu kua talia e Kautu he Atua?

He pule ko e Patuiki he lagi, to lahi atu e mena ka fakakatoatoa e Iesu ke he ha pule he tagata. To lagomatai he 144,000 kua fifili mai he tau tagata ke pule mo ia. (Fakakiteaga 5:9, 10; 14:1, 3) To eketaha a ia ke fakahoko e finagalo he Atua ke he lalolagi nei. Ko e heigoa ka taute he Kautu he Atua ma e tau tagata ka nonofo he lalolagi?

• Fakaoti katoatoa e gagao mo e mate. “To nakai pehe mai foki taha kua nofo ai, Kua gagao au,” ti “nakai tuai fai mate.”​—Isaia 33:24; Fakakiteaga 21:4.

• Tamai e mafola mooli mo e haohao mitaki. To “lahi e monuina [mafola] he fanau hau,” mo e “to takitokotaha a lautolu mo e nofo i lalo hana vine, mo lalo foki he hana mati; to nakai ha i ai foki taha ke fakamatakutaku ki ai.”​—Isaia 54:13; Mika 4:4.

• Moua e gahua fai kakano. “To oti ai kia lautolu ne fifili e au e tau mena ne eke ai ke he tau lima ha lautolu. Nakai gahua teao a lautolu.”​—Isaia 65:22, 23.

• Utakehe e tau lekua he takatakaimotu. “To fiafia ha ko lautolu e tutakale, mo e motu nakai fai vai; to olioli e motu taluē, mo e fiti mai tuga ne kaute.”​—Isaia 35:1.

• Fakaako e tau tagata ke taute e tau mena kua lata ke moui tukulagi. “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.”​—Ioane 17:3.

Manako e Atua ke moua e koe e tau monuina nei. (Isaia 48:18) Ko e vala tala ka mui mai to fakamaama e mena ka taute e koe mogonei ke fai vala he moui fiafia nei anoiha.